Staðnir að verki

Gaman væri að vita hver kippti í spottann og stoppaði söluna á Icelandic Group til Samherja afsakið Tríton. Nokkrir koma til greina svo sem Steingrímur J, menn úr Landsbankanum eða jafnvel háttsettir lífeyrissjóðsmenn. Því ekki hef ég trú á að Finnbogi og félagar taki mikið mark á fjölmiðlum eða bloggurum. Og þó það sé fagnaðarefni að Framtaks sjóðurinn ætli að taka upp opnara og gegnsærra ferli við sölu á eignum útúr Vestia þá er framkvæmdastjórinn og stjórn sjóðsins búin að glata trausti og því væri öllum fyrir bestu að skipta þeim öllum út. Þessir menn sem völdust þarna til starfa tilheyra hrunmönnum og þeir eiga ekki að gramsa í strandgóssinu

Hætta viðræðum við Triton

Hugmyndavinna verði virkjuð á Alþingi

Allir sem vinna að nýsköpun nýta sér Brainstorming(hugarflugsfundi). Þetta er albesta aðferð til að hugsa út fyrir boxið eins og oft er sagt. Á svona fundum kvikna oft hugmyndir sem breyta vinnuferlum og skapa nýjar afurðir. Afurð er ekki endilega vara. Afurð er það sem verður til með vinnu. Á Alþingi fer fram vinna og afurðirnar eru alls konar lög og reglugerðir og ályktanir, en allt er þetta gert með aldagömlum aðferðum, allt er bundið á klafa íhaldssamra vinnubragða og alþingismenn eru hræddir við breytingar.  Þetta sjáum við og heyrum á þeirra málflutningi. Stjórnkerfisbreytingar ná ekki fram að ganga, stjórnarskrárbreytingar ná ekki fram að ganga og breytingar sem Atlanefndin lagði til, ná ekki fram að ganga!  Hér þarf nýja hugsun. Alþingismenn þurfa í stað hálfvita hálftímans, að taka upp hugarflugsfundi.  Og sé þeim vel stjórnað, þá er ég viss um að vinnubrögðin munu breytast. Jafnvel hjá íhaldssömustu kurfunum eins og Einari K Guðfinnssyni. Því alþingismenn eru ekki heimskir. Þeir bara líta út fyrir að vera það

Hálfvita hálftíminn og Ögmundur

Langt er síðan ég vakti athygli á fíflaganginum í fangelsismálum hér á landi. Þá óraði mig ekki fyrir því að inni á borði Innanríkisráðherra hefði legið fullkomin lausn á vandamálinu í fleiri mánuði! Hvernig stendur á því að enginn þingmaður lætur sig málið varða? Af hverju fer enginn upp í hálfvita hálftímanum og spyr Ögmund út í þetta. Og þá er ég að tala um að girða utan um vinnubúðirnar á Reyðarfirði eins og fram kom í fréttum RUV nú áðan.  Og af hverju gerir enginn athugasemdir við byggingu þessa fangelsis sem áætlað er að kosti 1700 milljónir en mun örugglega kosta yfir 2 milljarða?  Hvers lags ábyrgðarleysi er hér á ferðinni. Og af hverju er verið að ræða við embættismenn um þetta?  Páll Winkel ræður engu, hann gerir bara það sem honum er sagt.

Hagfræðingar og kvótakerfið

Jón Steinsson rekur mikinn áróður fyrir tilboðsleið í fiskveiðistjórnun. Jón Steinsson er fræðimaður sem kann að leiða út flóknar formúlur. Fiskveiðar eru ekki slík vísindi að hægt sé að setja inní reikniformúlur. Satt að segja myndi ég frekar leita álits veðurfræðinga heldur en hagfræðinga eða fiskifræðinga. Það var til dæmis Páll Bergþórsson, veðurfræðingur og fræðimaður, sem fyrstur manna kom með þá kenningu að eldgos og framburður eldgosaefna til sjávar hefði afdrifarík áhrif á klak nytjafiska fyrir Suðurlandi. Tökum meira mark á almennri skynsemi heldur en háskólagráðum. Lífið er ekki reikniformúla

Þjóðarhagur er huglæg* stærð og ekki hægt að reikna þjóðarhag til peninga. Þannig er ekki hægt að reikna út arð þjóðfélagsins af fiskveiðum í beinum peningum eða sem ákveðið hlutfall af einhverri ebítu. Það er ekki hægt að selja veiðiréttinn á slíkum forsendum. Ekki frekar en það ætti að selja nýtingarrétt orkunnar með slíkum hætti. Svona hugsun er þjónkun við kapitalismann og leiðir til arðráns. Eina réttlætanlega greiðsla fyrir auðlind er að arðræninginn verði skyldaður til að kosta uppbyggingu á innviðum þjóðfélagsins. Þá væri alla vega tryggt að arðurinn færi til þjóðarinnar. Slíkt var reifað í tengslum við leigu á landi undir herstöð bandaríkjanna, en vegna misskilinnar þjóðernishyggju varð ekkert af að bandaríkjamenn legðu hraðbraut frá keflavík til Reykjavíkur 1960. Hvað hefði það getað sparað mörg mannslíf? Reikni nú Jón Steinsson

Því sá sem eignast nýtingarréttinn tekur til sín arðinn. Allt tal um annað er bara lygi. Það verður því að tryggja að arðinum verði varið í framkvæmdir, eitthvað concrete.  Ekki í formi peninga sem pólitíkusar stela í eigin þágu eða flokkanna

*

huglægur - Íslensk orðabók

hug·lægur. L. 1. sem miðast við huga eða hugsun. sem lætur stjórnast af eigin hugþótta í dómum sínum eða mati. sem stendur manni næst, sækir á hugann. 2.

 

Pólitík - Þroski - Einhyggja

Ég er þeirrar skoðunar að með aldrinum öðlist menn og konur þroska og vizku sem ekki lærist í skólum. Þetta kalla ég pólitískan þroska. Ungt fólk getur verið fluggáfað og vel menntað en samt skortir það þennan þroska sem þarf til að geta stjórnað þjóð eða mótað reglur samfélagsins með hag heildarinnar að leiðarljós. Skýringin er sú að mínu mati að ungt fólk er upptekið af sínu eigin lífi og sínum eigin hagsmunum. Það er að búa í haginn fyrir sig og sína. Þetta fólk er greinilega vanhæft til að vera í framlínu stjórnmálanna og stjórna þjóð sinni. Það liggur í augum uppi. 

Þess vegna vil ég að við ræðum alvarlega hlutverk og starfsemi stjórnmálaflokkanna. Ég vil til dæmis banna allt ungliðastarf flokkanna. Þetta er ekkert annað en innræting og inngrip. Mér finnst stjórnmálaskólar flokkanna ekkert betri en Hitlers æska Nasistanna í Þýzkalandi á sínum tíma. Öll slík félagamyndun er nú bönnuð í Þýskalandi og víðar og þykir sjálfsagt mál. En hér í Hálfvitalandi þykir engum neitt athugavert við svona fyrirkomulag. Þótt þessir ungliðar klæðist hvorki einkennisbúningi né marseri í takt úti á götu, þá marsérar þetta fólk saman í takt við þá pólitísku einhyggju, sem þeim er innrætt. Og þetta fólk hefur komist til valda í þjóðfélaginu . Til mikils skaða. Þetta fólk heldur að aðeins sé til einn sannleikur í hverju máli. Þetta fólk sér aldrei heildarmyndina.

Þess vegna þarf nýja hugsun, nýtt lýðveldi með nýjum leikreglum. Stemma þarf stigu við að ungt fólk veljist í miklum mæli til starfa á Alþingi eða í sveitastjórnum.

Þegar menn setja ekki lengur eigin hag í fyrsta sæti, þá eru þeir tilbúnir. Fyrr ekki.

Mér finnst  til dæmis ég fyrst núna geta hugsað hlutlægt* um pólitík. Og er ég þó kominn hátt á sextugsaldur. En kannski er ég bara svona seinþroska

*

hlutlægur - Íslensk orðabók

(um ytri veruleika). raunverulegur, hlutverulegur. hlutlæg þekking og huglæg túlkun. 2. (um dóma og hugmyndir). ótruflaður af tilfinningum eða persónulegum löngunum, raunsannur ( objectivus ).

 

Sveitastjórnir vilja braska með kvótann

Hvenær tekur þessi frjálshyggja enda gott fólk? Hve marga snúninga á að taka á fiskinum í sjónum áður en hann verður svo dýr að ekki verður hægt að veiða hann? Hvers lags blind fégræðgi stjórnar hér ennþá? Eina leiðin til að vinda ofan af þessu rugli er að afnema fiskveiðistjórnunarlögin og hverfa til baka til 1980 og móta nýja stefnu. Þessi frjálshyggju tilraun með undirstöðuatvinnuveginn er glötuð. Sveitastjórnir verða að vakna. Þær bera ábyrgð. Það dugar ekki að segja eins og Daníel Jakobsson sagði, "þetta kemur okkur ekki við!" Hverjum kemur þetta meira við?  Byggðakvótinn er spillingartæki stjórnmálanna. Segjum nei við spillingu. Frumbyggjaréttur er ekki bara eitthvað sem Grænlendingar eða Alaskabúar eiga rétt á. Við eigum líka kröfu til að nýta okkar frumbyggjarétt. Ef Alþingi vill ekki laga kerfið með algerri uppstokkun þá skora ég á sveitastjórnir að taka málin í sínar hendur. Sveitastjórnir eru næsta stjórnsýslustig á eftir ríkinu og það er aðlilegt að það taki við þegar ríkinu mistekst.

Hvenær kviknar loginn hér?

Það sem er að gerast í Afríku á sér ekki rætur í efnahagskreppunni sem búin var til af bröskurum kauphallanna. Þjóðir Afríku eru loksins að vakna til vitundar um þá kúgun sem þær hafa verið beittar af valdaræningjum,alveg eins og hér sem oftar en ekki ríkja í skjóli erlendra auðhringa eða hernaðarríkja.alveg eins og hér Þessir einræðisherrar hafa makað krókinn á kostnað þjóða sinna, alveg eins og hér, stolið og veðsett allt kvikt, alveg eins og hér ,og skotið undan til skattaskjóla erlendis,alveg eins og hér

Logi byltingar fer yfir

Svikin liggja í loftinu.

Nú er ég virkilega hræddur um að ríkisstjórnin ætli að svíkja í fiskveiðistjórnunarmálinu.
Fyrsta vísbendingin var flokksráðsfundur Samfylkingarinnar. Síðan kom bloggfærsla Ólínu, þá grein Björns Vals og núna síðast þær fréttir að Jón Bjarnason sé að setja lokahönd á ný eða breytt fiskveiðilög. Í samvinnu við hverja spyr ég nú bara. Getur hann bara farið sínu fram í trássi við flesta aðra eins og þegar hann var að krukka í kerfið í fyrra?

Hér á þessari bloggsíðu hefur verið talað fyrir afnámi fiskveiðistjórnunarlaganna og þeirri hugmyndafræði sem í þeim felst alfarið hafnað. Síðuhöfundur vill að við tökum upp sjálfbæra, heildræna  atvinnu og byggðaþróunarstefna sem byggi á frjálsum fiskveiðum og fullvinnslu hér innanlands. Þegar ég tala um frjálsar þá á ég náttúrulega ekki við óheftar óábyrgar veiðar.

Margir segja að frjálsar veiðar leiði til offjárfestingar og ofveiði. Þetta er rangt. Vegna þess að við erum að tala um nýja atvinnu og byggðastefnu þar sem allt ferlið frá veiðum til fullvinnslu er skipulagt. Byrjað yrði að stofna vinnslufyrirtæki og gera sölusamninga. Síðan þegar fyrir lægi hver hráefnisþörfin væri þá yrði gerður samningur við sjómenn um veiðar og enginn fengi veiðileyfi nema hafa tryggt sér samning um kaup á aflanum. Fylgst væri með að hver vinnslustöð gerði aðeins veiðisamninga um það magn sem þeir ráði við með góðu móti. Sjómenn mættu heldur ekki stunda aðra atvinnu nema að mjög litlu leyti. Sjómannsstarfið yrði gert að lögverndaðri iðngrein. 

Hérna áður fyrr fór allt úr böndunum vegna þess að tengslin á milli veiða og vinnslu rofnuðu. Fjárfesting í útgerð fór úr böndunum og aflinn varð svo mikill að hann lá undir skemmdum og sífellt stærri hluti var seldur óunninn úr landi. Þegar gæðamálin voru svona léleg fékkst lágt verð og þetta var aðal ástæða þess að kvótakerfinu var komið á, ekki vegna þess að um háskalega ofveiði væri að ræða. Og þó ég vilji tengja saman veiðar og vinnslu þarf samt allur afli að fara um uppboðsmarkað. En þann markað mega ekki þeir spenna upp sem senda út ferskan fisk í flugi. Þeim markaði þarf náttúrulega að sinna eins og öðrum en hann má ekki skekkja verðgrundvöll landvinnslunnar. Ég veit að afrakstur fiskstofnanna verður kannski ekki helmingi meiri en er í dag en hann ætti vel að standa undir almennri velsæld allra ef við svo kjósum. Þetta er bara spurning um að skipta kökunni réttlátlega

Sóknaráætlun 2020 olli miklum vonbrigðum. Sérstaklega sú uppgjöf sem lýsir sér hjá sveitastjórnarmönnum þegar þeir lýsa sóknarfærum og styrkleika. Þeir eru hættir að reikna með útgerð og fiskvinnslu. Þeir hafa brennt sig á að reikna með að kvótinn haldist í byggðunum. Þeir vilja frekar treysta á ferðamennsku, iðnað, og matvælavinnslu. Fiskveiðar og vinnsla koma yfirleitt ekki fyrr en í fjórða og fimmta sæti. Þetta er svo dapurleg framtíðarsýn að helst jafnast á við arðrændar nýlendur Evrópumanna í  Afríku á 19. öld. Hvernig útgerðarmenn eru búnir að fara með landsbyggðina og fólkið er glæpur sem þarf að bæta fyrir, ekki síður en hina illu meðferð barna á vistheimilum ríkisins á síðustu öld. Þótt hún virðist liggja ríkisstjórninni þyngra á hjarta en eyðing byggða til að skapa gróða í vasa stórútgerða

Ríkisstjórnin er hugmyndalaus, stefnulaus, ráðalaus og huglaus

Helvítis fokking fokk

"að hræra í innyflum hvers annars"

Ólíkt oftast hafast að
íhald, kjána kæra
Jóka stjórnlynd stundar það
í Steingríms slátr' að hræra

Kliður fór um kattahjörð
kviður snéri niður
friður horfinn, viðbrögð hörð
í hviðum krepptust iður

Palladómur um Silfrið

Silfur Egils hefur tekið greinanlegum breytingum sem felast í breyttu vali á viðmælendum og miklu hófstilltari gagnrýni en áður tíðkaðist. Mig grunar að áhrifamikil öfl hafi samið um þessar áherzlubreytingar og sett Agli stólinn fyrir dyrnar. Enginn ber á móti að þáttur Egils og umfjöllun hans um þjóðfélagsmál hafa skipt sköpum á margan hátt og komið róttækum breytingum í gegn meðan kerfið var í lamasessi og stjórnmálamenn í sárum. Nú eru þeir óðum að eflast og koma til baka og nú skal gagnrýnin beizluð það er augljóst. Við munum líka ákall Kristrúnar Heimis um að Agli bæri skylda til að hjálpa stjórnvöldum og hætta þessari háværu gagnrýni. Þarna birtist fyrsti vísirinn að þögguninni sem er að bera árangur. Einnig hefur gagnrýni hræmiganna borið þann árangur að meira jafnvægis er nú gætt en áður að rödd íhaldsins heyrist þótt enginn skilji í raun hvaða erindi sumir sjálfstæðismenn hrunsins eigi í þjóðfélagsumræðu sem snýst um endurreisn. Mörgum finnst það ósvífni af þeim að draga sig ekki í hlé og alla vega afþakka að taka þátt í borgaralegri umræðu. En að Silfri dagsins. Umræða dagsins var bitlaust stagl sem skildi ekkert eftir sig. Jóhann Hauksson varð sér enn og aftur til skammar og ekkert nýtt kom frá Þorgerði, hún talar alltaf í hringi blessuð konan. Eygló var prúð og málefnaleg að venju en skrýtið fannst mér af henni og Agli að eigna Framsókn heiðurinn af stjórnlagaþingsfrumvarpinu. Sú umræða var farin af stað löngu áður, að hér þyrfti að stofna nýtt lýðveldi. Var það ekki öðlingurinn Njörður P Njarðvík sem fyrstur stakk upp á því ? Kristinn Pétursson fjallaði af yfirburða þekkingu um kvótakerfið. Það var gott að hluta á hann og sýndi að róleg og yfirveguð umræða skilar meiru en æsingur, skammir og upphrópanir. Að lokum var svo útlendingahornið.  Útlendingahornið í Silfrinu er svona eins og Rykkornið í Kiljunni.  Maður lætur sig hafa að fylgjast með þættinum til að missa ekki af þessum hornum þáttanna. þessir útlendingar sem Egill er alltaf að draga í þættina eru oftar en ekki frægir fyrirlesarar og það er ómetanlegt að fá innsýn í þeirra heim svona ókeypis.  Vonandi er að Egill hressist og bjóði ritstýringaröflunum byrginn. Endurreisnin er í raun ekki hafin og það er full þörf á áframhaldandi beittri gagnrýni án aðkomu stjórnmálamanna.  Þeir hafa sinn hálfvita hálftíma á þingi. Látum þeim það nægja