Inga Lind er draumahind - Kynþokki skiptir máli

Passar fagur rass við flís
á flottri íhalds drottningu
Sú læra þykka lokkadís
leyndi greind af lotningu.

 

Flokksvillingar og flokkaflakkarar

Við búum við svokallað fulltrúalýðræði. Stjórnmálaflokkar stilla upp listum með frambjóðendum og síðan greiðum við einum lista atkvæði okkar. Þetta heitir fulltrúalýðræði. Í reynd erum við ekki að kjósa einstaklinga heldur þá stefnu sem viðkomandi flokkur talar fyrir í kosningabaráttu eða í stefnuskrá eða í stjórnmálaályktunum. Síðan þegar kosningum er lokið og talning hefur farið fram þá fyrst kemur í ljós hverjir náðu kjöri. Hér lýkur hinsvegar skyldum frambjóðandans við kjósendur sína. Því í stjórnarskránni er af einhverjum ástæðum tekið fram að kjörinn Alþingismaður sé aðeins bundinn sinni persónulegu sannfæringu þegar greidd eru atkvæði á þingi.
Hvernig í andskotanum datt mönnum í hug að setja svona ákvæði í stjórnarskrá? 
Ef hér væri persónukjör þá væri þetta gott og gilt, en undir núverandi kosningakerfi hefur þetta ákvæði verið óskiljanlegt. Menn hafa svikið sína kjósendur og sagt skilið við þá flokka sem þeir voru í framboði fyrir en menn hafa aldrei sagt af sér og vikið sæti fyrir sínum varamanni. Nei, aldrei og þar krystallast ranglætið. Þingmenn hafa í gegnum söguna getað svikið sína samherja, selt sinn stuðning og þeir hafa haft sjálfdæmi um í hvaða flokki þeir hafi viljað starfa. Um þetta eru fjölmörg dæmi og öll jafn ógeðfelld. Og þingflokkarnir eru eins og hvítasunnusöfnuðir. Þeir gleðjast og fagna öllum sem afneita öðrum flokkum og koma til þeirra en á sama tíma bannfæra þeir eigin svikara. Minnisstæð eru orð sem Davíð Oddsson lét falla um frambjóðanda Frjálslynda Flokksins, Gunnar Örlygsson í kosningum 2003, þessi Gunnar hafði hlotið dóm fyrir umboðssvik að mig minnir og varð að fresta því að setjast á þing og það varð Davíð tilefni til að gera lítið úr Frjálslynda flokknum. Seinna á því sama kjörtímabili yfirgefur Gunnar síðan sinn þingflokk og gengur til liðs við þingflokk Sjálfstæðismann, þá er viðmót Davíðs breytt og hann býður flokkaflakkarann og fyrrverandi tugthúsliminn velkominn. Þá var gott að hafa sakamanninn í liði fyrst það var eigið lið. þannig hafa stjórnmálamenn alltaf hagað sér. Aldrei spurt að drengskap eða góðum siðum. Ég hef aldrei sætt mig við þetta flokkaflakk á þingi og fundist það svik við kjósendur. Og það að beinlínis skuli vera heimild fyrir þessu siðleysi í stjórnarskrá gerir það brýnt að kippa þessu ákvæði út við næstu endurskoðun stjórnarskrárinnar. Ef það misferst þá geri ég þá sjálfsögðu kröfu að nú strax semji Alþingi siðareglur sem banni flokkaflakk og skyldi þá sem ekki vilja styðja þá flokka sem þeir voru kosnir fyrir til að víkja fyrir varamönnum.

Og ef einhver ærleg taug væri í Þráni Bertelssyni þá myndi hann strax á morgun rita þingforseta afsagnarbréf og fara þess á leit að varamaður sinn tæki sæti á þingi fyrir Hreyfinguna.

Lilja Mósesdóttir og Ásmundur Einar eru á mörkunum í sinni andstöðu. Og ég veit að Lilja hlýtur oft að hafa íhugað úrsögn úr VG og að ganga til liðs við Hreyfinguna.  En það væri móralskt rangt og það er það sem stoppar hana. Hvort hún segir af sér þingmennsku kemur í ljós en það kæmi mér ekki á óvart. Margir félagsmenn hafa sagt skilið við þennan auma flokk síðustu 2 ár. Og því þá ekki þingmenn sem eru í grundvallaratriðum á móti félögum sínum sem svikið hafa flestar hugsjónir flokksins fyrir völd.

Ég heimta fjölmiðlalög

Ritstjóri Fréttablaðsins hefur varpað af sér grímu hlutleysis og tekið afdráttarlausa afstöðu með LÍÚ, sínum fyrri vinnuveitendum hjá Morgunblaðinu og gegn hagsmunum þjóðarinnar. Morgunblaðinu hefur verið beitt purrkunarlaust af núverandi ritstjóra í þágu eiganda sinna. Ríkisútvarpið er rammhlutdrægt í fréttaflutningi að ég tali ekki um stöð Jóns Ásgeirs, svo nú er svo komið að enginn fjölmiðill stundar lengur óhlutdrægan og vandaðan fréttaflutning. Þetta getur varla talist forsvaranlegt í upplýstu samfélagi. Því þurfum við fjölmiðlalög þar sem tekið verði á, hverjir megi eiga og reka fjölmiðla. Það verði hreinlega bannað að eigendur fjölmiðla eigi jafnframt meirihluta í óskyldum fyrirtækjum í samkeppnisrekstri eins og Davíð vildi á sínum tíma. Einnig þarf að koma á öflugu eftirliti með ritstjórnarlegu frelsi og tryggja hlutlægan fréttaflutning hjá RUV. Fjölmiðladómstóll kæmi vel til greina sem myndi fjalla um kærur á fjölmiðlafólk og einnig kærur vegna mismununar og hlutdrægni. Alla vega er það ástand sem nú ríkir óþolandi. Í fjölmiðlum er ekki sagt satt orð lengur, allt er litað einhverjum hálfsannleik sem gerir alla ringlaða og kemur í veg fyrir sanngjarna og heiðvirða umræðu. Á Alþingi eru menn alltaf annaðhvort að bera af sér sakir eða ásaka.

Og hjá atvinnu bloggurum er hatursáróður er orðið norm en ekki undantekning

Ég tel mig þekkja kjarnann frá hisminu enda búinn að fylgjast lengi með pólitíkinni og þjóðfélagsumræðunni. En það er fullt af fólki sem getur það ekki og verður því auðveldlega fórnarlömb einhliða áróðurs og innrætingar. Stjórnmálaskólar flokkanna eru gott dæmi um þetta. Það kann ekki góðri lukku að stýra.  Unga fólkið stendur berskjaldað og að ég tali ekki um allt auglýsinga áreytið. Er nema von að helmingur Íslendinga sé á þunglyndislyfjum og hinn helmingurinn á ofvirknislyfjum?

Jón Bjarnason segi af sér

Enginn ráðherra hefur gengist við ábyrgð í stóra hæstaréttarmálinu en almenningur heimtar að einhverjir axli ábyrgð og segi af sér. Þess vegna legg ég til að Jón  Bjarnason segi af sér. Það myndi leysa mörg vandamál fyrir ríkisstjórnina og friða almenning. Við vitum að Jóhönnu finnst miklu skipta að  hún fái frið fyrir þjóðinni og að þjóðin sé til friðs. Og hvað er þá betra en fórna riddara fyrir biskup? Jón er óútreiknanlegur eins og riddari og gengur ekki eftir beinum línum eins og skákmenn vita. Það gera biskupar hins vegar Þeir verða því oft leppar þegar andstæðingarnir skáka kónginum. Nú hefur Jóhönnu verið skákað og hún ber Ögmund fyrir sig og því er hann orðinn leppur en um leið getur hann ekki lengur valdað Jón Bjarnason og því er eins gott að fórna HONUM..Tær snilld!

Lilja biðst afsökunar

Tekið stórt upp í sig - Jóhönnu Sigurðar svarað fullum hálsi

Flokksstjórnarfundir Samfylkingarinnar eru eins og peppfundir á vernduðum vinnustöðum.
Verkstjórinn flytur ræðu og síðan er klappað og allir voða ánægðir því það er búið að setja
kaffi og kleinur á borðið og enginn nennir að spyrja spurninga. Það þarf heldur ekkert.
Verkstjórinn veit alltaf allt best og dýrin í skóginum eiga að vera vinir og ekki með leiðindi.Svona fundur var haldinn í dag hjá Samfylkingunni. Og af því ég er ekki flokks stjórnarmaður í Samfylkingunni þá ætla ég að vera með leiðindi og spyrja nokkurra spurninga út í þessa ræðu.

Jóhanna þú sagðir:

Við höfum þurft að glíma við réttláta reiði fólks þar sem hrunið hefur komið niður á öllu samfélaginu og allt of margir hafa liðið og þurft að takast á við mikla erfiðleika ekki síst fjárhagslega. Á sama tíma höfum við hinsvegar einnig verið að breyta íslensku samfélagi til hins betra. Innleiða breytt vinnubrögð, breyttar leikreglur og breytta forgangsröðun í anda hugsjóna okkar jafnaðarmanna. Í öllu þessu tel ég að okkur hafi miðað vel áleiðis þó verkinu sé fjarri lokið. 

Spurning:
Hvernig hefurðu breytt vinnubrögðunum? Hvaða nýjar leikreglur ertu að tala um og í hverju er breytt forgangsröðun fólgin? Og hverju er ekki lokið enn? Tölum bara hreint út eins og maður við mann. Því það erum við svona andlega þótt einhver munur sé á okkur líkamlega.

Þú sagðir líka:

Ef við lítum á efnahagsmálin þá blasir við, þrátt fyrir bölmóðinn, að  samdrátturinn hefur verið stöðvaður og hagvaxtarskeið er hafið,  kaupmáttur launa hefur vaxið undanfarið ár og störfum fjölgar nú á ný. Verðbólgan hefur ekki verið lægri í sjö ár, stýrivextir aldrei lægri, gengið hefur haldist stöðugt og styrkst og fjárlagahallinn hefur minnkað úr rúmum 200 milljörðum í tæpa 40. Skuldir ríkissjóðs eru mun lægri en reiknað var með, afgangur af viðskiptum við útlönd hefur aldrei verið eins hagsstæður, fullnægjandi gjaldeyrisforði hefur verið tryggður og skuldatryggingaálagið á Ísland er orðið lægra en það var fyrir hrun.  Þarf að hafa fleiri orð um árangur ríkisstjórnarinnar í efnahagsmálum ?

Já það þarf að hafa um það fleiri orð. Samdrátturinn hefur stöðvast vegna þess að 200 fyrirtæki eru komin á hausinn, 20000 hafa misst atvinnuna, fólk er búið að eyða sérlífeyrissparnaðinum og 3000 manns hafa orðið gjaldþrota eða eru í gjörgæslu umboðsmanns skuldara.Húsnæðismarkaður hefur verið í frjálsu falli og kaupmáttur launa rýrnað um 20%. Þjóðfélagið er að ná alkuli þess vegna hefur samdráttur stöðvast. Eðlilega. það er fullkreyst.  Afleiðing af þessu ástandi er minnkuð verðbólga og lækkaðir vextir, ekki vegna einhverra efnahagsaðgerða, því þær hafa ekki verið neinar. Svo eru það ríkisfjármálin og skuldir ríkissjóðs. Þegar búið er að taka 600 milljarða að láni væri skrítið ef fjárlagahallinn hefði ekki minnkað eða að gjaldeyrisforðinn hefði ekki vaxið. En varla telurðu það þér til tekna í lánabók lífsins?  Þarf að hafa fleiri orð um aðgerðaleysi í efnahagsmálum?

 

Þú segir:

 

Miklar umbætur hafa orðið í ráðningamálum á vegum hins opinbera. Sérstakar hæfisnefndir hafa annast mat á umsækjendum um auglýstar stöður ráðuneytisstjóra og sambærilegt vinnulag var viðhaft við skipan nýs Seðlabankastjóra og hæfiskröfur auknar í samræmi við ný lög þar um. Jafnframt hafa verið lögfestar löngu tímabærar breytingar á verklagi við skipun dómara. Þar hafa faglegar hæfisnefndir komið í stað geðþóttavalds ráðherra rétt eins og annarsstaðar.

Altalað er að aldrei hafi viðgengist annað eins pukur í ráðningum innan stjórnsýslunnar og einmitt núna. Stöður ekki auglýstar heldur þeim ráðstafað til vina og samherja á grundvelli skammtímaráðninga. Seðlabankastjóri var handvalinn það vita allir. Og breytingarnar á skipan dómara ná svo skammt að auðvelt er að sniðganga þær

þú segir:

Ríkisstjórnin hefur samþykkt tillögur stýrihóps Sóknaráætlunar undir heitinu Ísland 2020. Ísland 2020 er stefnumarkandi skjal sem felur í sér framtíðarsýn til ársins 2020, 20 mælanleg markmið um samfélagslega þróun og 30 tillögur að aðgerðum til þess að vinna að þeim. Með Ísland 2020 er í fyrsta sinn gerð tilraun til þess að horfa á þróun atvinnulífs og samfélags með heildstæðum hætti og skilgreina hverskona samfélag við viljum skapa til framtíðar.

 

Hvenær fékkst þú umboð til að hrinda þessari sóknaráætlun í framkvæmd? Og hvað kostaði þessi vinna og mun kosta til viðbótar? Eðlilegt er að svona kerfisbreytingar séu bornar undir þjóðina í kosningum en ekki sé anað útí breytingar sem lítil sátt er um. Til dæmis breytingarnar á ráðuneytunum og þá aðlögun á stjórnsýslunni sem aðildarviðræðurnar við ESB kalla á.

þú segir:

Fjölmörg önnur réttlætist- og þjóðþrifamál hafa náðst í höfn –  mál sem þvælst hafa fyrir öðrum ríkisstjórnum eða hefðu aldrei komist á þeirra borð, en hafa nú verið leidd til lykta af fyrstu meirihlutastjórn jafnaðarmanna á Íslandi. Ég nefni ég nokkur:

1. Langþráð sátt um sanngirnisbætur til barna á vistheimilum sem sættu misgjörðum.
2. Ein hjúskaparlög fyrir alla landsmenn tóku gildi. 
3. Sérréttindi ráðherra, dómara og alþingismanna í lifeyrismálum afnumin.
4. Kaup á vændi gerð refsiverð og súlustöðum lokað. 
5. Skattkerfinu breytt til stóraukinnar tekjujöfnunar, umhverfisskattar innleiddir og    skattrannsóknir og skatteftirlit stóreflt. 
6. Ný fagleg yfirstjórn í Seðlabanka og Fjármálaeftirliti. 
7. Nýr og ábyrgari lagarammi settur um fjármálakerfið og starfsemi fjármálaeftirlitsins    stórefld.
8. Skýrslu rannsóknarnefndarinnar hefur verið fylgt eftir, starfsemi sérstaks saksóknara og
9. fjármálaeftilitsins stórefld og dómurum fjölgað til að anna álaginu vegna hrunsins. Fimm
10. milljörðum verður varið aukalega til að efla embætti sérstaks saksóknara, dómstólana og
11. fjármálaeftirlitið.
12. Gríðarlegar réttarbætur hafa verið innleiddar fyrir skuldara sem nýtast mun skuldurum um    ókomin ár og verulega komið til móts við afleiðingar hrunsins hjá skuldsettum heimilum.     Hér er um yfir 350 einstakar aðgerðir að ræða og skuldaniðurfellingar og bætur sem nema     vel á annað hundruð milljarða.
13. Ný metnaðarfull loftslagsáætlun hefur verið mótuð og samþykkt. 
14. Unnið er að friðlýsingu Þjórsárvera í heild, Gjástykkis og fleiri svæða. 

Sei sei, mikið er nú gumað.

1. Kostnaður við Vistheimilanefndina ku hlaupa á milljónatugum, er það forsvaranlegt? Og var það forsvaranlegt að útdeila pólitískum bitlingi til Guðrúnar Ögmundsdóttur með því að ráða hana sem tengilið án þess að auglýsa starfið? Rétt áðan sagðirðu að það tíðkaðist ekki og enginn á fundinum gerði athugasemd!
2. að setja hjúskaparlög fyrir samkynhneigða er hneyksli en ekki manréttindi
3. Betur þarf að gera til að jafna lífeyriskjörin að ég tali ekki um þessi himinháu eftirlaun.
4. Vændislögin eru beggja blands, Ríkisstjórnin er of höll undir forræðishyggju
5. áliti Atlanefndarinnar var stungið undir stól
6. Þúsundir skuldara eru núna skuldaþrælar fjármálastofnana, til hamingju!
7. Eyjafjallajökuls gosið gerði að engu allan fagurgalann um árangur í lofslagsmálum. Okkur mun ekki endast  þessi öld til að vinna okkur inneign í losunarkvóta
8. Já fínt, friðlýsa og koma í veg fyrir arðbærasta virkjunarkost Landsvirkjunar. Og fyrir norðan er stríðið við landeigendur ekki unnið ennþá.
   

Nú hef ég skautað yfir það helsta í guminu en auðvitað var ræðan miklu lengri. Gott væri hins vegar að fá einhver svör. Margir eru nú spunameistararnir á launum og svo er víst bæði einkaritari og butler á launaskrá hjá Jóhönnu svo ekki ætti að skorta ritfæra penna til að skýra og útskýra ef það er hægt. Það er hægt að taka stórt upp í sig ef enginn hreyfir andmælum. Það merkir ekki að allt sé sannleikanum samkvæmt

 

Ekki rétti tíminn fyrir pólitískar sjónhverfingar

Margir gagnrýna ríkisstjórnina réttilega fyrir fljóthuga ákvarðanir og einstaklega ógegnsæja stjórnsýslu. Margir tala um launung og lygar. Og þá sjaldan ráðamenn tjá sig við fjölmiðla þá eru þeir ekki spurðir réttu spurninganna sem er náttúrulega vítavert. Það verður að senda karlmenn í verkin, ekki börn! Þess vegna komast ráðherrarnir upp með að gefa ófullnægjandi svör. Þessu verður ríkisstjórnin að breyta vilji hún eiga sér lengri lífdaga. Það dugar ekki að uppskera lófaklapp meðal klíkuvina á flokksfundum, sem eru hvort sem er aldrei með gagnrýnisgleraugun á nefinu. Mörg mál brenna á mönnum í sambandi við atvinnumál, byggðamál, heilbrigðisstefnuna, sölu ríkisfyrirtækja og endurreisn fjármálakerfisins. Gott væri ef t.d hið metnaðarlausa Kastljós tæki sér tak og ynni þáttaröð til kynningar á hvað ríkisstjórnin ætli sér með:

1. Innköllun kvótans
2. Dauða byggðanna
3. Minnkandi heilsugæslu á landsbyggðinni
4. Sölu Sjóvár og eigna Landsbankans
5. Endurreisn sparisjóðakerfisins 
6. Rannsókn á einkavæðingunni frá 1995
7. Rannsókn á þætti Davíðs Oddssonar og Seðlabankans í hruninu með tilliti til húsleitarinnar
8. Sakarannsókn á einkavæðingu sparisjóðanna og framferði stjórnenda þeirra í aðdraganda hrunsins
9. Hvað stjórnvöld ætli sér í sambandi við HS Orku?
10. Hvað stjórnvöld ætli sér í sambandi við gjaldþrot Reykjanesbæjar

Málin eru óteljandi sem stjórnvöld eru með á sinni könnu og samt spila ráðherrar VG solo. Enda er ríkisstjórnin samsett úr 10 smákóngalénum. Jón Bjarnason talar í gátum á meðan Steingrímur klæðist skikkju töframannsins og framkvæmir sjónhverfingar í fjármálaráðuneytinu.  Þetta er náttúrulega ekki mönnum bjóðandi. Okkur var lofað opinni og gegnsærri stjórnsýslu og það er kominn tími til að það sé efnt.  Góð byrjun væri að birta útskriftina af samtali Davíðs við enska seðlabankastjórann.

Það er ekki bara ögurstund í sjávarútvegsmálum, það er ögurstund í landsmálum yfirhöfuð

Ögurstund í sjávarútvegsmálum

Hælbítarnir og ljónið

Þessi líking á vel við baráttu sjálfstæðismanna við Jóhönnu Sigurðardóttur. Hingað til hefur strategían snúizt um að bíta í hælana á Jóhönnu og þreyta hana þar til hún gæfist upp. Vissulega hefur þetta sýnst verið að virka þar sem lítið lífsmark hefur verið með gömlu konunni í margar vikur. Og því hefur Hæstiréttur ætlað að veita henni náðarhöggið með ógildingu stjórnlagaþingskosninganna. En þetta verða sennilega afdrífaríkustu mistök sem hræmigurnar hafa gert í þessi 2 ár sem þeir hafa hímt í stjórnarandstöðunni lafhræddir og skjálfandi yfir rannsókninni á hruninu og reiði almennings. Ljónið rumskaði í þinginu sl. fimmtudag eins og alþjóð varð vitni að og nú er það reitt og hristir úfinn makkann hvíta sem aldrei fyrr. Og hótar hægri vinstri. Nú verður kvótinn innkallaður og það verður líka kosið upp á nýtt til stjórnlagaþings. Sjálfstæðismenn munu iðrast þess að hafa ráðist framan að ljóninu. Með smá þolinmæði og stjórnkænsku hefði þeim tekist að yfirbuga hana. En ekki lengur. Heimskan og hrokinn eru víst systkin og með lögheimili í Valhöll

Hræmigaður

Ég legg til, að við tökum upp nýyrðið hræmigaður, yfir illa lyktandi menn. Skírskotunin er augljós

Illa innrætt fólk getur svo leikið sér með orðið og fengið út úr því hægrimaður

Hróður Íslands

Kannski að Árni Johnsen og Sigmundur Ernir hafi ætlað að reisa sér minnisvarða á hinni íslenzku Golgata við hlið Davíðs með þessu frumvarpi um að veita rússneska rithöfundinum Madinu Salamovu íslenskan ríkisborgararétt. Hvað svo sem vakti fyrir þeim félögum þá hefði kannski verið betra að spyrja þá norsku fyrst?  En samkvæmt upplýsingum frá lögmanni hennar þá kærir hún sig ekkert um íslenskt vegabréf og lái henni það enginn .  En þetta frumhlaup þeirra Árna og Sigmundar gæti orðið tilefni milliríkjadeilu milli Noregs og Íslands.  Þarna er á vissan hátt um inngrip í norskt innanríkis og utanríkismál að ræða. Vonandi verða engin eftirmál en þetta er ekki til að auka hróður landsins. Vonandi taka flokkarnir á þessu og koma í veg fyrir fleiri svona frumhlaup mannvitsbrekkanna. Þeir sem áhuga hafa geta lesið frumvarpið hér. Sérstaka athygli mína vakti þetta orðalag.

Hún talar einstaklega fagra norska tungu af útlendingi að vera. Íslendingar vilja leggja sérstaka áherslu á að verja norska tungu sem barn íslenskrar tungu. Íslenska tungan hefur haft þrek til að standa af sér alvarleg áhrif annarra tungumála á síðustu 1000 árum á sama tíma og önnur norræn tungumál hafa tekið stakkaskiptum.

Er þetta ekki rasismi?  "af útlendingi að vera" og svo þessi þjóðremba varðandi tunguna!! Okkar tunga er líka á undanhaldi eins og önnur mál og mállískur. Með tilkomu netsins er enskan er að verða hið ráðandi tungumál.

Iceland Express Bridge Festival 2011

Iceland Express Bridge Festival 2011 stendur nú yfir í húsnæði Bridgesambandsins í Ármúlanum.
Það er af sem áður var þegar Icelandair kostaði þetta alþjóðlega bridsmót og það var haldið á Loftleiðahótelinu. Nú hefur bridgesambandið sett niður í mínum huga með samningi við Iceland Express. Hvenær ætla íslendingar að opna augun og fara í aðgerðir gegn hrunkvöðlunum? Við eigum öll sem eitt að hætta viðskiptum við fyrirtæki í eigu þessara glæpamanna. Er það til of mikils mælst?

Fyrir áhugasama bridsunnendur þá skal bent á að hægt er að fylgjast með mótinu live á slóðinni http://www.bridgebase.com/index.php

Heimasíða mótsins er  hér