Hvað er að frétta af Siðanefnd Alþingis?

Af hverju skyldi nú traust til Alþingis mælast svona lágt? Allt undir 50% er óásættanlegt fyrir kjörna fulltrúa þjóðarinnar. Gæti verið að skýringin á tortryggninni sé vegna sjálftöku þingmanna eða vegna fyllirísrauss Miðflokksins á Klausturbar eða vegna vandræðagangs forseta þingsins á að tækla það mál?  Eða kannski vegna alls þessa?

Eitt er víst að alþingi er ekkert að gera í því að efla traust almennings gagnvart störfum þess. Enda er stjórnarskráin í gíslingu flokkanna.  Afleiðingarnar eru að lýðræði er fótumtroðið. Þrígreining valds er hér bara að nafninu til og sjálfstæði þingsins gagnvart framkvæmdavaldinu er akkúrat jafn mikið og 12. ráðherrann, sem er titlaður forseti Alþingis, leyfir. Og 12. ráðherrann er skipaður í embættið af ríkisstjórn hverju sinni til þess að sjá um að þingið sé aðeins afgreiðslustofnun mála sem koma frá ríkisstjórninni. Þetta sætta þingmenn sig við vegna þess að þeir fá vel borgað fyrir litla vinnu og enga ábyrgð.  Enda harðneita þeir að segja af sér þingmennsku þótt almenningur krefjist þess og siðareglur ætlist beinlínis til þess. 

Ég veit ekki hvað almenningur getur gert til að þrýsta á um nýja stjórnarskrá. Ég held að það þurfi alvöru þjóðargjaldþrot eða hersetu erlends ríkis. En stjórnmálamenn eru löngu komnir fram yfir síðasta söludag. Þeir geta haldið sínar skrípakosningar og haldið áfram bullinu og þvaðrinu og lyginni og ráðið sér rándýra PR þjóna, en allt er þetta sýndarmennska.  Pólitík á Íslandi hefur aldrei snúist um almannahag og að þjóna umbjóðendum.  Þetta fólk sem kemst á framboðslista er þar af einni ástæðu og aðeins einni.  Það er öruggt að það gerir ekkert nema styðja við hagsmuni elítunnar og þeirra sem hafa tekið allt fémætt hér á landi til eigin nota. Kannski bæta þeir samt við nýrri grein í gömlu stjórnarskrána og hún mun hljóða svona:

Allar auðlindir skulu vera í einkaeigu. Auðmenn skulu undanþegnir öllum sköttum hér á landi gegn því að þeir haldi áfram að kaupa upp innviði landsins svo sem; Vegi, fjarskiptanet, flugvelli, ferðamannastaði, alla veitustarfsemi og orkuframleiðslu.  Einnig skulu auðmenn fá einkarétt á heilsutengdri ferðaþjónustustarfsemi og rekstur sjúkrahótels verður um alla framtíð í höndum Ásdísar Höllu og fjölskyldu hennar. 

Traust til Alþingis minnkar mjög

Konan með langa nafnið ætlar að selja Landsvirkjun

Konan með langa nafnið upplýsti á aðalfundi Landsvirkjunar í dag, að ríkisstjórnin hefði ákveðið fyrir nokkrum vikum að kaupa alla hluti í Landsneti. Ákvörðun sem gæti sýnst eðlileg í sjálfu sér nema af þeirri einföldu ástæðu að ríkið á nú þegar 65% í Landsneti í gegnum 100% eignarhlut sinn í Landsvirkjun og einnig eru engar kröfur eða þrýstingur á breytt eignarhald af hálfu ESB. 

"Engu að síður liggur fyrir að öllum helstu hagsmunaaðilum hér á landi finnst slíkur eigenda-aðskilnaður skynsamlegur. Það er að segja: Að til lengri tíma litið sé óheppilegt að flutningsfyrirtækið Landsnet sé í eigu raforkuframleiðenda og dreifiveitna. Frá sjónarhóli neytenda er auðvitað augljóst að sjálfstæði flutningsfyrirtækisins stuðlar að jafnræði annarra aðila á markaði,“ sagði Þórdís Kolbrún.

Það er sem sagt ekki fyrr en búið er að einkavæða Landsvirkjun sem þessi kaup á Landsneti verða skynsamleg!  Við vitum að hjá þessari ríkisstjórn er ekkert gagnsæi. Hver ráðherra er eins og kóngur og stjórnsýslan er meira í ætt við einveldi en þingbundið lýðveldi.  Hver var til dæmis aðkoma alþingis að þessari ákvörðun um að kaupa Landsnet?  Þarf ekki fjárveitingavaldið að samþykkja svona kaup?  Og eru áform Sjálfstæðisflokksins um að einkavæða Landsvirkjun komin lengra en almenningur veit? Ég er skíthræddur við þessa ríkisstjórn.  Ég held við höfum aldrei haft jafn samhentan hóp ráðherra áður, sem eru jafn forhertir í stjórnarathöfnum og öruggir með sig að þeir geti í skjóli meirihluta framkvæmt öll óhæfuverk sem þeim dettur í hug vegna þess að það sem sameinar þennan meirihluta er fyrirlitning á minnihlutanum og fullvissa um eigið ágæti og óskeikulleika.

Áhrifalaus á Íslandi

Gaman þætti mér að vita hvernig CEO Magazine í Ástralíu, fær það út að Katrín Jakobsdóttir sé á meðal 20 áhrifamestu konum í heiminum í dag.  Er hún áhrifamikil vegna þess að hún er forsætisráðherra Íslands?  Eða er þetta bundið við kyn hennar sem konu?  Ef þetta er kynbundinn áhrifamáttur þarf þá ekki að benda á eitthvað sem Katrín hefur sagt eða gert sem hefur skipt einhverjum sköpum?  Ég hef gruflað í huga mér dágóða stund en man ekki eftir neinu.  Hins vegar eru ótal dæmi, þar sem hægt er að benda á að orð og gjörðir eru sitthvað hjá þessari konu sem sett var í stól forsætisráðherra af Bjarna Benediktssyni, formanni Sjálfstæðisflokksins. Og þar með gerð áhrifalaus, ekki bara í ríkisstjórn heldur líka meðal íslensks almennings sem misst hefur allt traust á stefnu VG við það að sjá formann flokksins, svíkja hvert stefnumál Vinstri Grænna af öðru , í þjónkun við þann sem öllu ræður í ríkisstjórnarsamstarfinu.

Vill einhver ung kona líkjast Katrínu? Ef það er sá mælikvarði sem er notaður. Ég á bágt með að trúa því. Fyrirmyndir verða að hafa prinsip, lífsreglur sem þær fara eftir. Katrín hefur engin slík prinsip.  Fyrirmyndir verða að vera trúverðugar og segja það sem þær meina og meina það sem þær segja. Katrín hefur á sínum stutta ferli sem stjórnmálamaður blekkt fólk og fórnað eigin trúverðugleika í eftirsókn eftir stöðutákni.  Stöðutákni sem hefur ekkert gildi eitt og sér.

Katrín fer í sögubækurnar með sömu eftirmælum og Sigmundur Davíð. Bæði voru þau áhrifalausar hækjur Sjálfstæðisflokksins, sem notaði þau til að halda völdum í andstöðu við meirihluta kjósenda.  Þess vegna er þjóðfélagið að gliðna í sundur. Á Íslandi búa ekki 2 þjóðir heldur 3.

Til hamingju Katrín með það!

Katrín ein af 20 áhrifamestu konum heims

Endurkoma Kristjáns Arasonar í RÚV

Íþróttafréttakona RÚV, sem jafnframt er spyrill í Gettu betur, er greinilega mikill aðdáandi Kristjáns Arasonar sem frægastur er fyrir að hafa fengið milljarð að láni hjá Kaupthinking sem hann þurfti ekki að borga til baka.  Alla vega tókst henni að koma nafni Kristjáns að í síðasta þætti Gettu betur og svo var hún líka með fleðuviðtal við þrjótinn í íþróttatíma RÚV rétt áðan. 

Mér er misboðið því innherjasvik Þorgerðar og Kristjáns eru alls ekki gleymd. 

Þess vegna ætla ég að endurbirta níðbraginn sem ég orti fyrir nokkrum árum. Þessi bragur eða ríma, rekur sögu aðdraganda hrunsins. Þegar Bjarni Ben seldi bréfin sín í Glitni og Baldur ráðuneytisstjóri seldi sín bréf í Landsbankanum og svo er rakið hvernig Kristján og Þorgerður stofna einkahlutafélagið 7 hægri utan um lánið frá Kaupþingi. Fyrir þá sem eru búnir að gleyma þá skal það rifjað upp, að Þorgerður Katrín var menntamálaráðherra og varaformaður Sjálfstæðisflokksins á þeim tíma. Þess vegna hafði hún innherjaupplýsingar varðandi veika stöðu allra bankanna.
--------------------------------------------------------------------------

Til innherja alls ekki teljast
ef af Flokknum til ábyrgðar veljast
Þótt Þorgerður þætti ekki hlýðin
þá tókst henni að dáleiða lýðinn

-Sama hvað alþýðan argar
elítan alltaf sér bjargar-

Sem yfirmann íþrótta og menntar
af því að öllum það hentar
þingflokkur Þorgerði setti
og þjóðin tók andköf af létti

-Sama hvað alþýðan argar
elítan alltaf sér bjargar-

Þá var hér þjóðlíf í blóma
fólk þekkti ekki Steingrím og Dróma
Þá var hlegið og grillað í Hruna
það hljóta nú allir að muna.

-Sama hvað alþýðan argar
elítan alltaf sér bjargar-

En lofa skal dag hvern að kveldi
kænn gerðist Baldur og seldi
bréfin sín bankanum í
en Brown bar nú ábyrgð á því

-Sama hvað alþýðan argar
elítan alltaf sér bjargar-

Þá Þorgerður þurfti að fara
því gift var hún Kristjáni Ara
Það fannst engum undrunum sæta
enda áttu þau hagsmuna að gæta

-Sama hvað alþýðan argar
elítan alltaf sér bjargar-

Er læddist að Hafnfirska húmið
hjónin sér hröðuðu í rúmið
Andlega órótt í geði
enda fjárhagsleg staða í veði

-Sama hvað alþýðan argar
elítan alltaf sér bjargar-

Undir konuna settur er koddinn
Kristján vill fá sér á broddinn
Við atganginn allt fer í lakið
uppgefin leggjast á bakið

-Sama hvað alþýðan argar
elítan alltaf sér bjargar-

Þá formaður Flokksins til vara
frétt sagði Kristjáni Ara
að allt væri að fara til fjandans
-Fallvölt er frjálshyggja andans-

-Sama hvað alþýðan argar
elítan alltaf sér bjargar-

Og grípa þau verði til varna
og verjast með Einari og Bjarna
sem björguðu Engeyjar auðnum
undan nefinu á Lárusi sauðnum

-Sama hvað alþýðan argar
elítan alltaf sér bjargar-

En nú var úr vöndu að velja
verðbréfin mátti ekki selja
Græðgislán glóparnir taka
sem geta aldrei borgað til baka

-Sama hvað alþýðan argar
elítan alltaf sér bjargar-

Arðsemi bréfanna búið
bankahrun varð ekki flúið
En fléttan sem fullkomnar ránið
felst í að afskrifa lánið

-Sama hvað alþýðan argar
elítan alltaf sér bjargar-

Nú áhyggjum þeirra er að slota
enda 7 Hægri löngu gjaldþrota
En álögur væru hér lægri
ef lögsótt við gætum 7 Hægri

-Sama hvað alþýðan argar
elítan alltaf sér bjargar-

Borðar sínar pylsur sjálf

Konan með langa nafnið sem ég man aldrei hvað heitir lýsti því yfir á Alþingi í dag að ekki væri hægt að borða verðbólgu eða vaxtahækkanir. Þetta þóttu miklar fréttir og lagðist þingheimur undir feld í smástund til að melta boðskapinn.

Þá rifjaðist upp fyrir þeim að þingkonan var nýkomin úr lúxusreisu þingflokks Sjálfstæðisflokksins þar sem fólk baðaði sig uppúr bjór og snæddi humar og drakk dýrasta hvítvín með í boði Áslaugar Örnu varaformanns flokksins. Einnig rámaði þingheim í að aðstoðarkona ráðherra hafði séð ástæðu til þess að lýsa því yfir að hún borgaði sínar pulsur sjálf hvaða máli svo sem það skipti. Því það sem skiptir máli er auðvitað hver borðar pylsurnar en ekki hver borgar þær.  Það er enginn að fara að taka upp veskið og borga.  Reikningurinn er bara sendur á skrifstofu Alþingis þar sem Helgi Bernódusson lætur hann hverfa.

Hugtak í hagfræði

-lóðréttur jöfnuður: þeir sem geta borgað meira eiga að gera það.

Skilur einhver þetta hugtak?

 

Til hamingju Heiðveig María

Dómur Félagsdóms er alvarlegur áfellidómur yfir trúnaðarráði Sjómannafélags Reykjavíkur og fyrrverandi formanni Jónasi Garðarssyni.  Eftir þennan dóm þá er full ástæða til að láta ógilda kosningarnar frá því desember, þar sem þær voru ólöglegar og greinilega til þess gerðar að hylja yfir kolólöglega ráðstöfun á fjármunum Sjómannafélagsins og ráðstöfunum fyrrverandi formanns.  Það þarf að láta gera óháða opinbera rannsókn á bókhaldi Sjómannafélagsins og ég treysti Heiðveigu Maríu best til að biðja um slíka rannsókn.

Sjómannafélagið braut lög

Ráðningarsamtöl

Ráðningarviðtal 1

Ráðningarfulltrúinn: Velkomin Salvör Lilja. Okkur var falið að ræða hér við þá umsækjendur um starf hótelstjóra Grand Hótels, sem helst komu til greina. Eins og þú veist þá starfa á hótelum fjöldi af ófaglærðu fólki við alls konar störf. Og þar sem launakostnaður er fastur kostnaður skiptir miklu að halda honum sem lægstum. En á sama tíma þá hafa starfsmenn ýmis réttindi og þar á meðal rétt á veikindadögum. Hvað myndir þú gera til að fækka þessum veikindadögum ef þú yrðir ráðin hótelstjóri?

Salvör Lilja: Það væri náttúrulega best að ráða bara erlent vinnuafl, sem vissi ekkert um íslenska vinnulöggjöf. Útlendingarnir gera engar kröfur og eru ódýrari. Bara passa að fulltrúar Eflingar séu ekkert að þvælast inni á vinnustaðnum. En ef það er ekki kostur þá mundi ég búa til veikindalista og merkja við hvern starfsmann, hvenær og hve oft hann er veikur. Síðan mundi ég hengja listann upp á vegg og hóta fólkinu að það verði hýrudregið ef það tekur sína lögboðnu veikindadaga.  Jamm það er það sem ég mundi gera..

Ráðningarfulltrúinn: Takk fyrir þetta svar Salvör Lilja. Og til hamingju!  Þú ert ráðin

 

Ráðningarviðtal 2

Ráðningarfulltrúinn: Velkomin María Björk. Okkur var falið að ræða hér við þá umsækjendur um starf framkvæmdastjóra Almenna Leigufélagsins, sem helst komu til greina.  Eins og þú veist þá eru helstu eigendur Almenna Leigufélagsins, fjárfestar sem vilja helst ekki koma fram opinberlega svo þeir ætla að ráða framkvæmdastjóra sem verður ábyrgur gagnvart þeim en á sama tíma verður hann að tryggja frið um starfsemi leigufélagsins. Hvers vegna ættu þeir að ráða þig?

María Björk: Ég er rétta manneskjan í starfið vegna þess að mér finnst leigjendur algerir lúserar. Og það er svigrúm til að hækka leigu. Samkvæmt tekjusögu.is þá eru ráðstöfunartekjur leigjenda of háar. Þessir aumingjar eru meira að segja að fara til útlanda eins og við hin.  Ég mundi hækka leiguna svo enginn hefði efni á að kvarta. Allir mundu þurfa að leggja á sig meiri vinnu og hefðu ekki orku í neitt annað. Ef einhver myndi gera athugasemd og kalla þetta okur þá myndi ég fá Ásgeir Jónsson hjá Auðfræðasetrinu, til að skrifa skýrslu og segja að leigufélögin séu svo illa stödd að það sé meira svona góðverk að standa í þessu. Fjölmiðlamenn eru svo heimskir að þeir gleypa við öllu bara ef einhver doktor í Háskólanum segir það.  

Ráðningarfulltrúinn:  Vá! Þú ert sko örugglega rétti kandidatinn í þetta starf. Djísús kræst! við héldum satt að segja að slíkt viðhorf fyrirfyndist ekki lengur.  En til hamingju.  Þú byrjar svo bara strax í dag. Og þú færð fyrirframgreiddan bónus á morgun.

Veikindalisti hafi ekki hangið uppi

Sólveig Anna er frábær

Efling er að gera góða hluti.  Það er flest mennskt fólk sammála um. En Sólveig Anna þarf að passa sig á að taka ekki baráttuna of mikið inn á sig.  Sama hve miklu óréttlæti, ruddaskap og skilningsleysi hún mætir, þá verður hún að halda ró sinni. Fjölmiðlar og atvinnurekendur sitja um hvert hennar orð eins og hýenur, í von um að hún brotni.  Það má ekki ske.

„Svo sannarlega ekki einsdæmi“

Afleiðingar græðgi

Loðnuhrognin eru verðmætasti hlutur loðnunnar. Þess vegna stýra útgerðir loðnuveiðum með tilliti til þess að ná sem mestum hrognum. Á sama tíma er það lífsnauðsynlegt fyrir viðgang stofnsins að hrygning og klak heppnist sem best. Þetta er aðalástæðan fyrir því að stofninn hefur verið að minnka undanfarin 3 ár, að veitt hefur verið alltof mikið af hrygningarloðnu inni á fæðingardeildinni.

Á sama tíma og veiðigetan margfaldaðist var ekkert tillit tekið til þess við stýringar fiskifræðinga á hvar heppilegast var að veiða loðnuna. Flotanum var leift að elta hrygningargöngurnar og þurrka þær upp áður en loðnan hrygndi.  Og það voru engar rannsóknir gerðar á því hvort hrygning hefði yfirleitt heppnast né í hve miklum mæli. 

Það er ámælisvert eins og allt í kringum veiðistjórnun Hafró. Þetta er samsafn af fúskurum sem vita ekkert um ástandið í hafinu eða áhrif þeirrar veiðistjórnunar sem þeir bjóða uppá.

Ég legg til að leyft verði að veiða 100 þúsund tonn af loðnu en hrygningar stöðvarnar verði friðaðar. Þannig verði loðnuveiðar bannaðar innan línu sem dregin yrði í suður frá Reykjanestá að sunnan og að norðan innan línu sem dregin yrði í vestur frá Bjargtöngum.

Skikkum síðan Hafró til að vakta þetta svæði og meta hvernig hrygning hafi tekist og safna þannig gögnum til að spá fyrir um ástand stofnsins.

Það er jafn heimskulegt að banna alfarið loðnuveiðar eins og að leyfa veiðar á fæðingardeildinni. Getum við ekki verið sammála um að beita meiri skynsemi og minni græðgi?

Hefði mikil áhrif á allt samfélagið