Fiskveiðistjórn undir Dögun

1. Að handfæraveiðar verði frjálsar
2. Að  fullt jafnræði verði i aðgengi að veiðiheimildum
3. Að fjárhags- og rekstrarlegur aðskilnaður sé tryggður milli veiða og vinnslu, allur afli fari á markað og verðmyndun sé 100% bundin fiskmörkuðum
4. Að greitt verði auðlindagjald fyrir afnotin sem renni til ríkis og sveitarfélaga
5. Að framsal, framleiga og veðsetning veiðiheimilda verði óheimil
6. Að aflahlutur sjávarbyggða sé tryggður og hluti veiðileyfa sé svæðisbundinn
7. Að öllum nýtanlegum afla sé landað og enginn hvati til brottkasts, m.a. með því að kvótasettum fisktegundum verði fækkað
8. Að settar verði framfylgjanlegar reglur um umgengni við auðlindina og hafsbotninn til að stuðla að endurnýjun, sjálfbærni og notkun umhverfisvænni veiðarfæra og aðferða við veiðar
9. Að veiðirágjöf verði endurskoðuð og fleiri aðilar komi að ráðgjöfinni

Flestir sem ekki hafa beinna hagsmuna að gæta, ættu að geta skrifað upp á þessa stefnu.  Þó eru 2 atriði í þessari stefnu sem þurfa endurskoðunar við.  Og það eru 2 fyrstu greinarnar.  Ég hef talað fyrir því að sjómennska verði lögvarin iðngrein og enginn geti orðið atvinnusjómaður nema hafa til þess gild réttindi.  Þetta tel ég mikilvægt í að bæta meðferð afla og ekki síður í að bæta meðferð fiskimiðanna.  Við þurfum að leggja áherslu á veiðar í atvinnuskyni en ekki veiðar í hagnaðarskyni.

Frjálsar handfæraveiðar og strandveiðar flokkast undir veiðar í hagnaðarskyni.  Ég er ekki hlynntur slíkum veiðum.  Hins vegar er öllum frjálst að stunda handfæraveiðar til eigin brúks.  Um það þarf ekkert að setja lög eða reglur. Hitt atriðið í stefnunni, sem ég tel að þurfi að endurskoða, er atriði nr.2, að fullt jafnræði verði í aðgengi að heimildum.  Þetta útfærir Dögun með því að koma á uppboðskerfi. Þetta gengur ekki ef við viljum byggja á veiðum í atvinnuskyni.  Með því að þrengja rétt manna til að stunda þessa atvinnu þá er ekki lengur um fullt jafnræði að ræða.  Enda eigum við ekki að auðvelda fjársterkum mönnum að sölsa undir sig veiðiheimildir sem þeir geta svo ráðstafað að eigin vild.  Afleiðingar slíkrar stefnu sér enginn fyrir.  Miklu nær er að innheimta veiðileyfisgjald sem ákveðna prósentu af markaðsverði afla hverju sinni.  þannig er ekki verið að íþyngja útgerðarmönnum með fyrirframgreiddum kostnaði vegna fyrirframkeyptra aflaheimilda og á þann hátt er jafnræði innan atvinnugreinarinnar best tryggt.  En auðvitað ekki fullt jafnræði allra sem ekki ætla sjálfir að hafa atvinnu af fiskveiðum.  Ef Dögun endurskoðar þessar 2 fyrstu greinar í stefnunni þá er hún ein flokka komin með heildstæða stefnu sem hægt er að byggja á til framtíðar.

Athugasemdir

[Jóhannes Laxdal Baldvinsson, 15.4.2013 kl. 12:22]

Uppboðskerfi með aflaheimildir gengur heldur ekki upp vegna þess að þar er verið að festa í sessi verslun með óveiddan fisk í sjó.  En það er einmitt inntakið í gr. 5 að koma í veg fyrir slíkt brask

[Hallgrímur Hrafn Gíslason, 15.4.2013 kl. 12:52]

Með frjálsum handfæraveiðum kemur grunnur að atvinnuveiðum.  Þá er hægt að stunda handfæraveiðar sem atvinnu.

Auðlindarentan verður tekin í gegnum fiskmarkaði, segjum 3 % sem yrði rukkað af uppboðsverðinu.  Með því að selja bæði frosinn og ferskann fisk á markaði, þá fæst raunvirði fyrir aflann um leið og hann kemur á land, allt uppi á yfirborðinu og sýnilegt.

[Jóhannes Laxdal Baldvinsson, 15.4.2013 kl. 13:11]

Hallgrímur, er þetta opinber stefna Pirata?

[Jóhannes Laxdal Baldvinsson, 15.4.2013 kl. 13:17]

Og þetta auðlindarentutal hugnast mér ekki.  Auðlindarenta er hugtak sem varð til í auðlindahagfræðinni og er notað til að afsaka upptöku ríkisins af "umframhagnaði" fyrirtækja sem nýta það sem pólitíkusar skilgreina sem "auðlind þjóðar"  Menn eiga ekki að tyggja upp hugsunarlaust einhverja frasa sem menn skilja ekki hvað fela í sér.

[Jóhannes Laxdal Baldvinsson, 15.4.2013 kl. 13:26]

Menn ættu að gúggla "Lúðvík Bergvinsson+auðlindarenta" og reyna svo að skilja útfærslu Steingríms J, í lögum um veiðigjöld,  nr. 74 26. júní_2012.  Þá sjá menn að þessi hugmyndafræði er ekki framkvæmanleg enda um púra sósialisma að ræða.

[Hallgrímur Hrafn Gíslason, 15.4.2013 kl. 19:37]

Hallgrímur, er þetta opinber stefna Pirata?

Ég hef ekki hugmynd um það,  finnst bara liggja beint við ef allur fiskur fer í gegnum fiskmarkað þá taki ríkið til sín skattinn þar                  ( auðlindagjald eða hvað sem menn vilja kalla það),

Til að fyrirbyggja misskilning er ég vélstjóri að rífa kjaft, ekki tengdur neinum flokki.