Viðvarandi súrefnisleysi í ráðuneytinu

 Öllum er í fersku minni umhverfisslysið í Kolgrafarfirði í fyrravetur þegar allt að 70 þúsund tonn af síld og öðrum sjávarlífverum drápust vegna skyndilegs súrefnisskorts.  Í allt sumar hefur nefnd verið að störfum til að móta tillögur en hún virðist úrræðalaus og jafn dauðvona og síldin sem nú fer að búa sig til vetrardvalar á Breiðafirðinum.

Ákall frá bæjarstjórn Grundarfjarðar  vekur lítil viðbrögð nefndarinnar og formaðurinn lætur nægja að benda á að komið hefur verið upp mælitækjum til að fylgjast með súrefnisinnihaldi fjarðarins. Hvernig það eigi svo að koma í veg fyrir köfnun síldarinnar segir hann ekki og meðvirkur fréttamaður RUV hefur ekki fyrir því að spyrja! Þarna fór gott fréttaefni fyrir lítið.  Full ástæða er fyrir ábyrgan fréttamiðil að taka þetta upp á sína arma og kryfja það í hörgul.  En greinilegt er að Kastljósið hefur ekki áhuga á slori þegar tilfinningaklám er í boði.

Varðandi frammistöðu ráðuneytisins þá er vöntun á fólki sem þorir að taka ákvarðanir.  Síldargildrunni verður að loka.  Og það á að skjóta alla hvalina sem hafa undanfarin ár hámað í sig tugi þúsunda af síld á breiðafirði. Hvalkjötið eigum við að éta en láta ekki hvalina éta okkur út á gaddinn.

En það á líka að veiða meira af síldinni. Hafró viðurkennir í nýjustu skýrslu að þeir hafi vanmetið stærð stofnsins en mæla samt með meiri veiði í haust en síðasta haust þrátt fyrir síldardauðann skelfilega.  Það segir náttúrulega allt sem segja þarf um veiðiráðgjöf þessarar stofnunar sem kennir sig við vísindi en iðkar fals og gervivísindi.

Enn af útsendingarstjórn RUV

Stutt er síðan hálf þjóðin fór á límingunum vegna rofs á útsendingu frá fótboltaleik.  Í kjölfar hvers ,Páll Magnússon sá sitt óvænna og baðst afsökunar á ódæði útsendingarstjóra síns.  En máttur auglýsenda er mikill og enn á ný er dagskrá rofin til að koma auglýsingu í loftið.  En þetta gerðist í dag þegar þáttur um Tour De France var fyrirvaralaust rofinn til að koma auglýsingum í loftið. Þetta gengur einfaldlega ekki að bjóða mönnum upp á svona ófagleg vinnubrögð.  Ef menn geta ekki reiknað rétt lengd auglýsinga til að dagskrá riðlist ekki þá verða menn að kötta á auglýsingu en ekki auglýstan dagskrárlið.  Þar að auki er magn auglýsinga alltof mikið.  Hélt að settar hefðu verið takmarkanir á því hve margar mínútur mætti selja undir auglýsingar en sé ekki að eftir því sé farið.  Ég er reyndar þeirrar skoðunar að þegar magn auglýsinga er orðið jafn mikið og hér á landi þá virki þær öfugt við það sem ætlað er.  Það ættu auglýsingastjórar að rannsaka.  Það eru hér á landi fyrirtæki sem auglýsa tiltölulega sjaldan en virðast þrífast betur en þau sem gefa okkur engan frið hvorki í útvarpi né sjónvarpi.  Auglýsingahórerí RUV er ein af aðalástæðum fyrir óvinsældum miðilsins. En það er svo sem ekki bara auglýsingarnar því dagskrárstjórinn virðist engan metnað hafa til að þjóna áhorfendum miðilsins með framboði af því nýjasta sem verið er að sýna í nágrannalöndum okkar. Þó með einni undantekningu en það er sýningin á Broen II.  Jafnvel þótt ég horfi yfirleitt á útsendingu DR1 þá má hrósa RUV fyrir að sýna þættina ekki nema 2 daga gamla.  Yfirleitt hafa íslenzkir áhorfendur þurft að bíða í mánuði og ár eftir nýjustu þáttaseríunum og ég tala ekki um kvikmyndirnar. Engin kvikmynda RUV er yngri en 3 ára og flestar þaðan af eldri. Engin furða þótt menn neyðist út í ólöglegt niðurhal á helgarafþreyingu þegar ríkismiðillinn stendur sig svona illa.

Ekki næstu 20 árin

Skrítið hvað sumir þingmenn eru blindir á raunverulega fjárhagsstöðu ríkisins.  Nú þarf ekki þjóðarátak til að eyða 100 milljörðum heldur þjóðarsátt um að lækka skuldir ríkissjóðs og þessa geigvænlegu vaxtabyrði. Heilbrigðiskerfið er í molum og það batnar ekki við að ráðast í byggingarframkvæmdir á stað sem rúmar ekki allar þessar byggingar sem "verktakavinir" vilja ráðast í.  Ef snillingunum hefur tekist að eyðileggja gamla Landspítalahúsið þannig að það kosti 11 milljarða að gera við það þá þykir mér einsýnt að sameining spítalanna verði tekin til endurskoðunar ásamt kerfinu sjálfu og reynt að komast að skynsamlegri lausn.  Eins og tildæmis að ákveða hvaða deildir við ætlum að hafa og reka vel og hvaða deildir hægt er að láta lækna sjálfa reka. Eins og tildæmis augndeildina á Landspítalanum.  Hún er rekin  í samkeppni við einkastofur og einkastofurnar standa sig mun betur en Landspítalinn. Og hvað um aðrar deildir? Háls- nef og eyrnadeildin þarf ekki að vera hluti af ríkisspítala. Og svo framvegis.

Einkarekstur er ekki glæpur.  En einkavæðing þar sem gróðinn er bara einkavæddur er glæpur. 

Ræðum þetta í þinginu en ekki frumvarp þessara 3 þingmanna sem virðast ekkert hafa lært af hruninu.  Þessir nýju þingmenn okkar hljóta að hugsa öðruvísi en trénaðir flokkshestar sem aldrei hafa þurft að hugsa um eigin buddu. Gæslumenn almannafjár eiga að taka starf sitt alvarlega og láta ekki embættismenn leiða sig í ógöngur.

Borgarspítalinn stendur á góðum stað og hann hentar miklu betur undir Ríkisspítala heldur en gamli Landspítalinn. Lyflækningadeild, skurðdeildir, hjarta og krabbameinsdeildir rúmast vel í þeirri byggingu og þótt einhverju þurfi að bæta við þá verður það ekki nema brotabrot af þeim kostnaði sem menn ræða um að fara í, í sambandi við nýjan LSH.  Með þessu móti mundi líka minnka umferðarálagið á Miklubrautina og í framhaldinu mætti tengja Kringlumýrarbraut við framtíðabyggð í Vatnsmýrinni með einhvers konar slaufum sem nýttust einnig sem aðkoma að Borgarspítalanum.

Það eru óendanlegir möguleikar sem munu opnast í skipulagsmálum strax og fyrirhugað byggingarslys á landspítalareitnum hefur verið blásið af fyrir fullt að allt.

Að starfsemin sé rekin á 17 stöðum er ekki rök fyrir því að byggja 280 þúsund rúmmetra á landspítalalóðinni. Miklu fremur ábending um að minnka báknið sem nýja spítalanum er ætlað að vera á kostnað allra annarra heilbrigðisstofnana í landinu. Töfraorðið hagræðing nær nefnilega sjaldan upp í efstu lög ríkisstofnana. Og sparnaður á einum stað þýðir oftast meiri kostnað annars staðar. Því allt hefur sitt verð. Bara spurning hvaða bókhald þarf að fegra hverju sinni.

Vilja hraða spítalaframkvæmdum

Alger endurnýjun er forsenda fyrir viðspyrnu

Núverandi borgarfulltrúar Sjálfstæðisflokksins eru trausti rúnir og aðalástæða fyrir slakri útkomu flokksins í síðustu kosningum. Ef Sjálfstæðismenn vilja auka áhrif sín þá verður að bjóða fram nýtt fólk sem er algerlega með hreinan skjöld varðandi helstu átakamálin í stjórn Borgarinnar og fyrirtækja hennar. Orkuveitan er ekki komin á lygnan sjó og það þarf að taka pólitískar ákvarðanir um framtíð þessa óskafyrirtækis Reykjavíkurborgar á næsta ári. Það er mikil hætta á að ef ekkert verður gert þá fari OR í þrot.  Hvers vegna ekki er um þetta rætt á sér skýringar í því að núverandi borgarfulltrúar Sjálfstæðisflokks og Samfylkingar eru bullandi vanhæfir til að fjalla um málið vegna fyrri afskipta í ákvörðunum sem leiddu til slæmrar fjárhagsstöðu núna.  Þessvegna þaga allir þunnu hljóði.  Fregnir um nýja kandidata sem ætla að bjóða fram krafta sína í þágu borgarbúa eru því ánægjefni.  Vonandi að kjósendur flokksins í komandi prófkjöri séu sama sinnis að þörf sé róttækrar uppstokkunar. Sjálfstæðismenn þurfa ekki sterkan leiðtoga, þeir þurfa samhentan hóp sem vill vinna í þágu allra borgarbúa að meiri valddreifingu og meira sjálfstæði hinna mörgu úthverfa. Miðstýringin er orðin alltof mikil og báknið alltof þungt í vöfum. Póstnúmer 101 er ekki upphaf og endir alls.

Sigurjón tekur þátt í prófkjöri

Háskólinn og holan

Í Háskóla heimskunnar vestur á Melum
hirðum við lítt um það hverju við stelum.
Mottóið okkar, að menn bara muni
"merkin" rétt setja svo engan neitt gruni

-Í fjársvelti ríkisins byggðum má blæða
því byggja skal höll hinna íslenzku fræða.-

Atkvæðismunar á Alþingi neytti
ólánsöm Kata sitt samþykki veitti
Framkvæmdir hófust án frekari tafa
fenginn var verktaki, ýta og grafa.

-Í fjársvelti ríkisins byggðum má blæða
því byggja skal höll hinna íslenzku fræða.-

Ef byggja skal höll er að mörgu að hyggja
en helst er það fjármagn sem þyrfti að tryggja
Ei lengur neinn efast að íslensk við erum
eins og með Hörpu við mistök hér gerum

-Í fjársvelti ríkisins byggðum má blæða
því byggja skal höll hinna íslenzku fræða.-

Áður en börn okkar detta í brunninn
byrgja þarf svæðið og moka í grunninn
Uppi í Háskóla enginn er friður
því Illugi ákvað að skera þar niður

-Í fjársvelti ríkisins báðum má blæða
byggðum og byggingu íslenzkra fræða.-

Alþýðan þarf ekki höll hinna heimsku
í huga sér geymir svo fall' ekk' í gleymsku
dýrmætar sögur og dróttkvæðin þungu
dýrustu djásn hinnar íslensku tungu

-Í fjársvelti ríkisins báðum má blæða
byggðum og byggingu íslenzkra fræða.-

 

Ríkisstjórnin og "Holan"

Ofan í holuna með þetta hyski
sem heldur að arður af óveiddum fiski
eign hinna útvöldu eigi að vera
en alþýðan kostnaðinn ein megi bera

Fyrirheit sjálfum sér glæstust þeir gefa
en gjarnan skít öðrum er skammtað úr hnefa
Nú íslenzkufræðingar fá ekki stæði
í forgrunni musteris undir sín fræði