Fréttastofa RÚV hatar Ólaf Ragnar

Fréttastofan þarf að fara í endurhæfingu.  Einu sinni voru efnistök og fréttamat hlutlæg en ekki lengur. Fréttamenn RÚV gera ekki lengur greinamun á persónulegum skoðunum og hlutlægum fréttaflutningi og oftar en ekki litar gremja þeirra og óánægja með pólitískt ástand þær fréttir sem þeir svo flytja þjóðinni. Nýjasta dæmið var viðtal Arnars Páls Haukssonar við Þorstein Pálsson, í Speglinum áðan.  Og hvert skyldi efnið hafa verið? Var verið að tala við Þorstein vegna starfa hans sem stjórnarformanns MP Banka?  Nei það var verið að leyfa honum að fabúlera um forsetann og stjórnarskrána og hans túlkun, Þorsteins, á brotum forsetans á stjórnarskránni og hvernig Ólafur hafi í embættistíð sinni fótum troðið þingræðið! Hvorki meira né minna!  Nú vill svo til að þetta er algerlega ný túlkun á stjórnarskránni og það hvað Þorsteinn telur að sé formlega rétt, er bara hans eigin túlkun.  Í stjórnarskránni eru engin fyrirmæli um hvernig forsetinn eigi að bera sig að við synjun laga. Og þessi túlkun Þorsteins, að ef forsetinn segi eitthvað í útlöndum sem ekki sé í samræmi við skoðanir sitjandi utanríkisráðherra, þá eigi ríkisstjórnin að gera um það bókun í ríkisráði og bera fram kvörtun við þau erlendu ríki sem í hlut kunna að eiga.  Come On Þorstein!  Fyrr má nú hata Ólaf Ragnar en hrynja svona málefnafátækur ofan af sjálfgerða kögunarhólnum. 

Og talandi um þingræðið og það hvernig síðasta ríkisstjórn og fréttastofa RÚV, sakaði Ólaf ítrekað um að ráðast gegn þingræðinu þegar hann synjaði icesavelögunum staðfestingar eins og frægt varð í beinni útsendingu þar sem Jóhann Hauksson varð sér og RÚV til ævarandi skammar. Enn á ný taka hatursmenn Ólafs upp þessa umræðu.  Nú í sambandi við útkomu tveggja skáldsagna fyrrverandi ráðherra í icesavesvikastjórninni. 

Það þarf að útskýra það fyrir mér hvernig heimild sem ótvírætt er í stjórnarskránni um synjunarvald forsetans getur verið aðför að þingræðinu?  Kjörnir þingmenn fá umboð sitt frá þjóðinni og þegar þjóðin ákveður að taka þetta umboð tímabundið til baka og úrskurða í máli þar sem þingið fer gegn þjóðinni, þá er það dæmi um góða stjórnskipun og þroskað lýðræði en ekki veika stjórnskipun eins og Þorsteinn Pálsson hélt fram og Arnar Páll Hauksson tók svo greinilega undir.  Forsetinn hefur ekki enn synjað lögum staðfestingar að eigin frumkvæði.  Hann hefur í öll þrjú skiptin farið að óskum mikils fjölda kjósenda sem hafa skrifað undir áskoranir þess efnis!

Hver skyldi hafa ótvíræðara umboð, Forseti Íslands sem er kjörinn í beinum kosningum af meirihluta gildra atkvæða eða til dæmis þingmaður úr fámennasta kjördæminu sem hefur á bak við sig 2-3 þúsund atkvæði, en atvikin haga þannig að þessi þingmaður verður utanríkisráðherra. Á þá persónuleg skoðun þessa þingmanns að vega meir en skoðun sem Forsetinn lætur í ljós í nafni embættis síns?  Mér finnst það alls ekki.

Og hver segir að forsetinn geti ekki afturkallað umboð sitt um framsal valds til ráðherra ef honum svo sýnist?  Það stendur ekkert um það í stjórnarskránni að hann geti ekki sjálfur farið með vald sitt.  Það stendur bara að hann feli ráðherrum vald sitt og sé við það ábyrgðarlaus af framkvæmd ráðherranna.  Þannig er hægt að túlka stjórnarskrána en ekki bara á þann þrönga hátt sem viðgengist hefur.  Kannski hræðast menn hvert það getur leitt og vilja ekki opna þá Pandóru öskju sem von er.

En Þorsteinn Pálsson er ekki rétti maðurinn til að túlka stjórnarskrána.  Hann skeit svo rækilega í nytina sína í þessu viðtali að hann á sér ekki viðreisnar von.

Og fréttastofan þarf sárlega á endurhæfingu að halda.  Í dag er hún allt annað en hlutlæg. Í raun mætti halda að Fréttastofan undir stjórn Óðins Jónssonar sé pólitískur miðill Vinstri Grænna frekar en nokkuð annað. Áhrif Björgu Evu svífa enn þar yfir vötnum eins og margir hafa skynjað og haft orð á undanfarin ár. Því þarf Vigga Hauks að breyta

Hallærislegur Gísli Marteinn

Sú ákvörðun Páls Magnússonar, að hlýða pólitísku valdboði úr Valhöll og ráða kjörinn borgarfulltrúa Sjálfstæðisflokksins til að stjórna spjallþætti á RÚV, á eftir að hafa eftirmála.  Nú þegar hefur málið valdi óróa meðal pólitískt skipaðrar stjórnar RÚV ohf. og víst er að sú óánægja á eftir að vinda uppá sig.  Ég er ekki í þeim hópi sem telur það merki um pólitísk afskipti stjórnarinnar að bóka óánægju með framgöngu útvarpsstjóra í þessu máli.  Ráðning Gísla Marteins var algerlega á skjön við reglur stofnunarinnar um pólitískt hlutleysi og opið ráðningarferli. það er ekki í starfslýsingu Páls Magnússonar , að hann eigi að ráða dagskrárgerðamenn eða þáttastjórnendur prívat og persónulega. Hann kom ekki að ráðningu dóttur sinnar og hann átti ekki að koma að ráðningu Gísla Marteins. Stjórnarmenn RÚV ohf..yfirmenn Páls, eru í fullum rétti að gera athugasemdir við þetta gerræði/flokksræði án þess að vera sakaðir um pólitísk afskipti.

En svo er það frammistaða Gísla sjálfs.  Nú hefur hann stýrt 2 þáttum og því miður þá stendur hann ekki undir  væntingum.  Uppbygging þáttarins er ætlað að höfða til almennings en raunveruleikinn er annar. Hugleikur er nógu hallærislegur í eigin teiknimynd þó hann sé ekki látinn stuða virðulegar miðaldra konur eins og Rögnu Árnadóttur og Gerði Kristnýju með blaðri sínu. það var auðheyrt að Rögnu leið illa í þessu kaffiboði Gísla Marteins og ég efast stórlega um að fólk muni standa í biðröð eftir að komast í þennan þátt þegar á líður. 

Eins finnst mér tengingin við samfélagsmiðlana og skjáskotin af skilaboðunum til Gísla vera mistök. Verður þetta virkilega svona?  Fá 2 aðila í kappræður og grilla annan en steikja hinn með hjálp net-trölla?  Nei takk, Gísli Marteinn. Snúðu þér aftur að borgarmálum.  Þú varst góður þar.  Í þessu nýja hlutverki ertu bara hallærislegur.

Vistvænt malbik?

Að leyfa malbikun göngustíga úti í náttúrunni virkar á mig eins og umhverfisspjöll.  Hvernig datt mönnum í hug að malbika Almannagjá og núna Dimmuborgir?  Hvað næst?  Þegar svona er gengið fram á vinsælustu ferðamannastöðunum þá er ekki nema von að menn sjái ekkert athugavert við að malbika Gálgahraun. Fólkið sem situr við skrifborðin er á góðri leið með að eyðileggja landið.  Nú þarf Alþingi að taka í taumana og móta stefnu um, hvernig staðið skuli að uppbyggingu ferðamannastaða í almannaeigu. Upphitaðir malbiks-göngustígar ríma ekki við vistvæna náttúruvernd í mínum huga.  Með fullri virðingu fyrir fötluðum þá verða þeir bara að hafa önnur ráð hér eftir sem hingað til til að njóta íslenskrar náttúru í sinni upprunalegu mynd. Það á að vera grunnstefið í allri uppbyggingu, að varðveita hina upprunalegu mynd.

 

Göngustígar malbikaðir í Dimmuborgum