Takk Andri Snær!

Hætt er við að grein Andra Snæs í Fréttablaðinu í dag falli í skuggann af fréttum um mögulega málshöfðun fyrir Landsdómi. Það er miður, því allir eiga að leggja við hlustir þegar Andri Snær talar. Þeir sem ekki leggja sig niður við að lesa Fréttablaðið geta lesið greinina á heimasíðu Andra Snæs. Í þessari grein bregður fyrir mun hvassari tón í garð þeirra sem tala fyrir stóriðju og álversframkvæmdum og þessum áformum líkt við sturlun. Ég er viss um að margir hafa hugsað hið sama en ekki kunnað að koma orðum að þeirri hugsun á jafn kjarnyrtan hátt eins og Andri Snær gerir í niðurlagi greinar sinnar

"Við erum lítið samfélag og það þarf að vera vinnufriður hérna. Að Björk taki sér frí úr vinnunni til að berjast gegn vitleysunni er bara lítið dæmi um þá truflun sem þúsundir Íslendinga verða fyrir á hverjum degi út af þessum látum. Það er hræðilegt að mikilvægur hópur karla á landinu mælist hálf klikkaður. Það verður ekki líft hérna ef menn vilja efna til átaka í kringum hvert einasta náttúruundur á landinu. Það er óþolandi að ekki sé hægt að láta fallegustu svæði á Íslandi í friði. Það er ömurlegt að þurfa að eyða svo mikið sem mínútu í að hugsa um svæði eins og Torfajökul, Kerlingarfjöll eða Þjórsárver sem ættu að vera óumdeild. Við erum lítið samfélag, meðvirkni grasserar hérna og menn eru kurteisir. En næst þegar klikkaði frændi þinn kemur í heimsókn og sýnir þér nýja útfærslu af virkjun í Þjórsárverum: Segðu honum að hoppa upp í rassgatið á sér."

Mikið er ég sammála. Takk Andri Snær