Duglegur þingmaður hún Eygló

Það er gleðilegt að sjá að sú manneskja sem mest hefur barist gegn verðtryggingunni, skuli hafa verið skipuð formaður í nefnd ríkisstjórnarinnar. Eygló er þekkt að dugnaði og einurð og hefur í störfum sínum á Alþingi ekki látið það þvælast fyrir sér að vera framsóknarmaður.

Verðtrygging í nefnd

Athugasemdir

[Jón Bragi (IP-tala skráð) 16.11.2010 kl. 19:03]

En hún virðist því miður vera of ung til þess að muna eftir og láðst að kynna sér það hvers vegna verðtryggingin var tekin upp á sínum tíma þ.e. fyrir 30 árum.

Mín kynslóð tapaði öllu því sem við áttum í formi sparimerkja og innistæðna í bönkum til kynslóðarinnar á undan sem tók lán og byggði yfir sig einbýlishús og fjármagnaði aðrar framkvæmdir án þess að borga nema örlítið brot af láninu til baka.

Þess vegna var verðtryggingunni komið á og hefði mátt gerast fyrr. Verðtrygging snýst einfaldlega um það að ef ég lána þér lambsverð í dag þá vil ég fá greitt lambsvirði þegar þú borgar mér til baka en ekki bara eina klauf eða svo. Þeir sem fengu lambsverð gefins inná bankabók árið 1960 gátu keypt sér kannske karamellu fyrir það 15-20 árum seinna.

Hins vegar var óréttlætið fólgið í því að laun voru ekki látin fylgja vísitölu en það er allt annað mál. Að gera hróp að sjálfri verðtryggingunni og telja hana upphaf og endir alls ills og að allt verði réttlátt og gott ef hún verður afnumin finnst mér vægast sagt heldur grunnhyggið. Að bera ástandið á Íslandi við önnur lönd er líka dálítið hæpið. Í löndunum næst okkur hefur verðlag verið það stöðugt að hægt hefur verið að hafa vexti þannig að aldrei hefur verið hætta á að vextir á lánum eða inneignum verði neikvæðir. Þetta hefur því miður verið sjaldgæft og aldrei staðið lengi á Íslandi.

[Jóhannes Laxdal Baldvinsson, 16.11.2010 kl. 21:46]

Takk fyrir innleggið Jón Bragi, Já það er óhætt að segja að hér hefur efnahagsstjórnunin verið með endemum. Og samningarnir um EES voru ekki til að bæta það eins og hrunið sannaði. Við erum m.a. bundin af þeim samningum varðandi vísitölumælingar. Þótt við vildum breyta vísitölugrunninum þá megum við það ekki. Að setja í gang endurskoðun á verðtryggingunni núna virkar eins og menn viti ekkert hvert beri að stefna. Vonandi birtir til með nýju fólki. Þetta lið sem nú stjórnar er ráðalaust

[Sigurður (IP-tala skráð) 17.11.2010 kl. 05:15]

Jón Bragi,

Rannsóknir sýna að verðtryggingin kunni beinlínis að vera verðbólguhvetjandi, auk þess sem hún dregur úr kostnaðarvitund neytenda við lántöku. Fleiri neikvæðar hliðar verðtryggingarinnar má tína til. Hlutverk nefndarinnar verður væntanlega að leggja mat á jákvæðar og neikvæðar hliðar verðtryggingarinnar og gera tillögur til ráðherra á þeim grundvelli.

[Jón Bragi Sigurðsson, 17.11.2010 kl. 11:39]

Takk sömuleiðis Jóhannes.

Og hvernig var kostnaðarvitundin meðal lántakenda og neytenda Sigurður þegar engin verðtrygging var? Og hvað gerði fólk með peningana sína þegar hvergi var hægt að geyma þá án þess að þeir rýrnuðu stórlega? Jú þeir hlupu með þá og eyddu þeim um leið og þeir fengu þá sem var mjög svo verðbólguhvetjandi. Og það var satt að segja ekki fyrr en eftir að verðtryggingu var komið á sem tókst að hemja þá óðaverðbólgu sem hér hafði herjað allan sjöunda og áttunda áratuginn og fór uppundir 50% prósent þegar verst lét.

Ég er alls ekki að halda því fram að allt sé eins og það á að vera með núverandi verðtryggingu og auðvitað er það óréttlátt að vísitala sé aðeins notuð til að hækka lán en ekki laun. En við megum hins vegar ekki gleyma ástæðu þess að hún var tekin upp og hvernig ástandið var áður en hún kom til.