Markaðsmisnotkunin og innherjasvikin

Sá seinfæri hefur loksins gefið í skyn að hann muni kannski hugsanlega ákæra helstu stjórnendur stóru bankanna vegna markaðsmisnotkunar sem snérist um að halda uppi fölsku gengi á hlutabréfum bankanna í 3 ár fyrir hrun. Óbreyttum finnst þessi seinagangur á birtingu ákæra með öllu óskiljanlegur.  það er viðurkennt að dómsstólar höndla ekki flóknar ákærur og þess vegna hlýtur að vera betra að gefa út fleiri en eina ákæru því víst eru sakarefnin næg. En hvers vegna heyrist ekkert frá þeim seinfæra varðandi þau augljósu innherjasvik sem sumir fengu að komast upp með óátalið?  Hvað með Bjarna Benediktsson, formann Sjálfstæðisflokksins, sem hefur nú viðurkennt að hafa selt öll sín hlutabréf í Glitni vorið 2008, eftir að hafa aðstoðað föður sinn og frænda við að veðsetja bótasjóð Sjóvár til að koma í veg fyrir hrun á hlutabréfum í bankanum.  Ef þetta er ekki tilefni rannsóknar og ákæru þá verður að sýkna Baldur Guðlaugsson fyrir sams konar brot sem hann var sakfelldur fyrir í héraðsdómi. Hér eiga allir að vera jafnir fyrir lögum. Bjarni Benediktsson og Engeyjarættin eru ekki undanskildir.  Ekki frekar en aðrir innherjar sem hafa verið ákærðir og sakfelldir.