Saumað að Steingrími í Kastljósinu

Kastljósið á sína spretti.  Einn af þeim var viðtal Sigmars við Steingrím J. Sigfússon í gærkvöldi.  Það er ekki oft sem við sjáum stjórnmálaleiðtoga engjast og kveinka sér undan beinskeittum spurningum þáttastjórnanda en það gerðist  svo sannarlega í gærkveldi.  Steingrímur sem oftast hefur verið látinn komast upp með að taka yfir svona viðtal  mátti þakka fyrir að Sigmar fór ekki ver með hann en hann þó gerði.  Sérstaklega var pínlegt að hlusta á aumar réttlætingar Steingríms fyrir meðferðina á Jóni Bjarnasyni.  Ég er svo sannarlega enginn aðdáandi Jóns Bjarnasonar en come on Steingrímur.  Jóni var treyst fyrir ráðherraembætti í 3 ár en núna er hann ekki einu sinni hæfur til að sitja í nefndum þingsins!  Er hægt að opinbera valdhrokann sem einkennir forystulið VG betur?  Eða eru þetta skilaboð til Ögmundar um að hafa sig hægan?  VG er flokkur í útrýmingarhættu. Embættismanna lista og menntafólkið sem hefur verið hryggjarstykkið í flokksstarfinu mun vera að hugsa sér til hreyfings. Ungliðarnir sem verða vitni að einræðistilburðum flokkseigendanna hljóta að finna sér nýjan vettvang.  VG er ekki og hefur kannski aldrei verið sósialískur umbótaflokkur sem berst fyrir hagsmunum alþýðunnar. Það hefur Steingrímur rækilega sannað með framgöngu sinni í þessari ríkisstjórn. Gömlu allaballarnir sem fylgdu Steingrími að málum eru nú búnir að stofna nýja sósialistahreyfingu. Eftir stendur menntaelítan og háskólafeministarnir og Björn Valur Gíslason.  Ég hef í raun aldrei skilið hvernig Björn Valur endaði í flokki eins og VG.  Ætli hann skilji það nokkuð sjálfur.