N1 stjórnin

Það er fátt hættulegra lífskjörum í bananalýðveldi en að hleypa milljarðamæringum að stjórn ríkisins. Milljarðamæringarnir munu alltaf taka afstöðu með spilltu fjármálakerfi gegn hagsmunum almennings.  Hér er þetta borðleggjandi vá. Vegna afleiðinga hruns fjármálakerfisins, sem þeir áttu sjálfir sök á, þá eru gífurlegir hagsmunir í húfi að möguleikar fjárfesta til skyndigróða séu ekki skertir.  Þess vegna eru fjárfestarnir, Bjarni og Sigmundur að mynda N1 stjórnina. Þeir munu fyrst og fremst standa vörð um sína eigin hagsmuni,  ekki almennings.  Þessi stjórn mun ekki gera þær lagfæringar á íslensku þjóðfélagi sem svo sárlega skortir.  Hún mun festa í sessi forréttindi hinna ríku á kostnað almennra launþega. Ef einhverjar leiðréttingar verða gerðar á skuldum fasteignaeigenda þá munu þeir sjálfir verða að punga út fyrir þeirri lækkun í skertum lífeyrisréttindum, aukinni verðbólgu og almennt lakari lífskjörum næstu áratugina.  Það er fyrirsjáanlegt.

Nú kemur það okkur í koll að engar siðareglur eru til hér um starfsemi stjórnmálaflokka.  Lögin um fjármál flokkanna og styrkina eru bitlaus þegar milljarðamæringar geta krýnt sjálfa sig sem formenn stærstu flokka á íslandi.   Við höfum vítin frá ítaliu og BNA til að varast. Stjórnmál, viðskipti og fjármálafurstar eru fatal blanda.

Þess vegna eiga Bjarni og Sigmundur að stíga til hliðar og hleypa næstráðendum sínum að.  Með þá 2 við stýrið verður enginn sátt og ekkert traust.  Alveg sama hversu góðir gæjar þeir eru að öðru leyti. Flokkarnir þeirra eru betur settir án þeirra við stjórnvölinn næsta kjörtímabil.