Lýðskrumari eða leiðtogi

Ég játa að ég á erfitt með að sjá í gegnum Sigmund Davíð forsætisráðherra.  Það er svo auðvelt að trúa því sem hann segir að maður gleymir í hvaða flokki hann er og ef hann er öðruvísi, valdi hann þá Framsóknarflokkinn af því pabbi hans á hagsmuna að gæta eða hefur Sigmundur einlægan áhuga á að leiða frjálslyndan miðjuflokk?  Auðvitað langar mann að treysta því fólki sem gefur kost á sér að starfa í pólitík.  Það er ekki sjálfsagt mál að í þau störf veljist vandað og heiðarlegt fólk.  Og það hentar ekki öllum að vera sífellt á milli tannanna á fólki. En Sigmundur hefur í reynd aldrei gefið höggstað á sér.  Hann  vinnur bara vinnuna sína og skeytir ekki um aursletturnar sem andstæðingarnir þyrla upp.  Veit sem er að þær slettur hitta þá sjálfa fyrir sem hreyta skítnum.  Þetta er meðal þess sem mótar afstöðu manna, hvort pólitíkusar gefa höggstað á sér.

Ég hef nú fylgst vel með því sem fram fór á þinginu á síðasta kjörtímabili og ég dáðist alltaf að því hvað Sigmundur Davíð var málefnalegur og fylginn sér.  Þótt hann sæi Jóhönnu og Steingrím gera hvert glappaskotið af öðru þá fylltist hann aldrei mikillæti eða klappaði sjálfum sér á brjóst í sjálfsupphafningu fyrir að hafa lagt upp réttar lausnir sem ekki var fylgt.  Núna þykist Sigmundur geta lagað ástandið og við verðum að gefa honum séns eitthvað lengur. Ef hann er tilbúinn í slaginn gegn hagsmunaöflunum og embættismannakerfinu þá er full ástæða til að styðja hann í þeirri ætlan. Og hann þarf allan stuðning þjóðarinnar ef ætlunarverkið á að takast. 

Ef fólk ætlar fyrirfram að leggjast ofan í skotgrafirnar eins og fótgönguliðum Samfylkingarinnar hefur verið skipað að gera, þá megum við eiga von á logandi illdeilum.  Gylfi Arnbjörnsson er jú einn af valdamestu mönnum Samfylkingar og hann getur sjálfsagt þvælst fyrir.  Sjálfstæðismenn hafa enga stefnu svo það þarf ekki að búast við neinu af þeim.  Ef hér verða breytingar á efnahagsmálum Íslands þá verður það vegna aðgerða Sigmundar Davíðs.  Aftenging vísitölu og leiðrétting verðtryggðra lána er það sem brennur helst á mönnum. Ef byrjað verður á að taka vísitöluna úr sambandi þá er það sú dúsa sem almenningur getur japlað á í vetur.  Það myndi skapa svigrúm og frið fyrir næstu skref og verða gott innlegg í komandi kjarasamninga.

Við sjáum til. Gefum Sigmundi meiri tíma.