Sorglegt

Allt þetta ferli, síðan í desember á síðasta ári, þegar 25 þúsund tonn af síld drápust úr súrefnisskorti í Kolgrafarfirði, ber stjórnvöldum dapurt vitni. Fyrir það fyrsta þá var eins og enginn áttaði sig á alvöru málsins eða nauðsyn þess að bregðast við.  Ekki Umhverfisráðuneytið, ekki Sjávarútvegsráðuneytið , ekki náttúruverndarsamtök, ekki sveitastjórnir á Snæfellsnesi, enginn!  það var eins og allir væru að bíða eftir að einhver annar tæki af skarið og lýsti yfir ábyrgð.  Með því að hafa hægt um sig héldu menn að þeir gætu varpað allri ábyrgð af þessu umhverfisslysi af herðum sínum.  Það var ekki fyrr en seinna slysið varð, sem menn sáu að ekki var undan því vikist að grípa til aðgerða.  En jafnvel þá voru allar aðgerðir fálmkenndar og sú neyðarráðstöfun að grafa dauða síld í fjörunni var bara frestun á vandanum og um leið voru vistskilyrði fjarðarins gerð verri til framtíðar.  Þá strax átti að gera ráðstafanir til að loka þessari gildru.  Annaðhvort með því að rjúfa vegfyllinguna á stórum parti eða með því að loka fyrir streymið undir brúna.

Það þurfti ekkert að gera neinar frekari rannsóknir.  Það kom í ljós 2011 að þverunin hafði þau áhrif að eðlileg sjávarföll tepptust í firðinum.  Munurinn var talsverður í millimetrum og umreiknað í lítra sjálfsagt einhverjar milljónir lítra sem ekki náðu að endurnýjast við hver fallaskipti. Vegagerðin vissi semsagt upp á sig skömmina en þagði þunnu hljóði meðan allir voru að ásaka alla hina fyrir aðgerðaleysi.

Og þessi vöktun sem stjórnvöld komu á var sýndarmennskan ein enda of seint að bjarga nokkru þegar síldin væri gengin inn í fjörðinn.  Og þessar veiðar sem Sigurður Ingi heimilaði í 4 daga skipta engu máli.  Þessir fáu bátar geta kannski veitt 200 tonn en það er brot miðað við þau 100 þúsund tonn sem talið er að séu föst í þessari síldargildru. 

Að hafa svona gersamlega óhæfa embættis og stjórnmálamenn er sorglegt.  Það var hægt að loka rennunni undir brúnni með síldarnót í síðustu viku eins og ég benti á en ekkert var gert. Er ekki hægt að draga ráðamenn til ábyrgðar fyrir tómlæti?  Ég mæli með að þingið rannsaki þetta og dragi þá til ábyrgðar sem gerðu ekkert til að koma í veg fyrir að síldin gengi inní þessa manngerðu síldargildru.

„Látum ekki tvo milljarða drepast“

Athugasemdir

[Kristinn Pétursson, 24.11.2013 kl. 05:54]

Mínar upplýsingar segja að rannsókn Náttúrufræðistofu Vesturlands hefðir sýnt 97% sömu vatnaskipti eftir að brúin kom.

Það kafnaði líka síld í Grundarfirði - fyrir 7 árum - síldin er að leita í kulda - og það er vitað hvers vegna - til að spara orkuforðann og eiga nóg í hrygnnguna.   Hugsanlega má segja að þetta sé eina birtingarmynd ofverndar fiskistofna sem við sjáum.   Við sáum ekkert þegar það drápust 600 þúsund tonn af þorski 1999 - 2001 og þess vegna sagði enginn neitt við "vísindalegu skilgreiningunni" ofmat þá...

Ef auglýst hefði verið eftir tillögum  s.l. sumar - um tillögum að lausnum - þá hefði verið hægt að velja bestu tillögurnar og undirbúa hvað gera skyldi - en var ekki gert. 

[Jóhannes Laxdal Baldvinsson, 24.11.2013 kl. 07:57]

Kristinn, Þú getur fundið skýrslu Mannvits á vef Vegagerðarinnar. Þótt niðurstöðurnar séu ekki túlkaðar þá er mikill munur á yfirborðshæð innan og utan þverunar sem segir okkur bara eitt og það er að ekki er fullnægjandi fallaskipti. Svo dirfist ráðherrann að segja í viðtali að enginn ráði við náttúruna!  Allir virðast líta framhjá þeirri staðreynd að þarna er um manngerða síldargildru að ræða en ekki náttúrulegar aðstæður.  Síðan má gagnrýna hvernig staðið er að veiðum úr þessum stofni og hvort of lítið er veitt eða ekki. En það er bara allt önnur umræða.

[Guðmundur Ásgeirsson, 24.11.2013 kl. 15:58]

Það kaldhæðnislega er að umhverfissinaðri vinstristjórn mistókst að bregðast við þessu og afstýra umhverfisslysi í fyrra.

Eftir alla gagnrýni sem þau hafa beint að núverandi ráðherra, afstýrir hann svo sama umhverfisslysi og hinum mistókst.

Ef ég væri umhverfisjafnaðarmaður væri ég núna búinn að skrá mig úr VG sökum vonbrigða með árangursleysið.

[Jóhannes Laxdal Baldvinsson, 24.11.2013 kl. 16:55]

Hverju hefur Sigurður Ingi afstýrt, Guðmundur?  Ef þú ert að tala um leyfi til veiða þá skal það rifjað upp að smábátasjómenn hafa verið á hnjánum í ráðuneytinu að kría út þessi 1200 tonn sem eru til ráðstöfunar utan kvóta en alltaf fengið þvert nei hjá handlangara LÍÚ......þangað til hann varð hræddur og afskrifaði þessi 100 þúsund tonn sem menn sögðu honum að myndu drepast hvort sem er!!

En auðvitað er skömm Svandísar og ráðaleysi jafn ámælisvert svo og yfirhylming flokksbróður hennar, Árna Finnssonar, sem ég skil ekki að skuli enn vera í forsvari fyrir Náttúruverndarsamtök Íslands.   Í það embætti á ekki að velja flokkspólitiskt næturgagn.

[Einar (IP-tala skráð) 24.11.2013 kl. 17:00]

Vonandi að þeir nái slatta úr firðinum. Nái einhverjum þúsundum tonna. Því meira súrefni er til skiptana fyrir restina af síldinni ;)

Væri glórulaust að láta þessi verðmæti fara til spillis aftur.

[Jóhannes Laxdal Baldvinsson, 24.11.2013 kl. 17:15]

Kannski væri ráð að fanga eins og 2 háhyrninga og láta þá reka síldina út úr firðinum.  Og loka síðan fyrir og tryggja að síldin gangi ekki aftur þarna inn.  Alla vega þá er mjög krítískt ástand þarna og ekki verjandi að treysta bara á Guð og lukkuna eins og kotbænda er siður.