Brjáluð hugmynd raungerð

Þegar ákveðið var að halda áfram með byggingu Hörpunnar fannst mér nauðsynlegt að húsið yrði alhliða menningarsetur en ekki bara tónlistar og monthús. Í framhaldi af því viðraði ég þá hugmynd að Þjóðleikhúsið og Ríkisútvarpið gætu sem bezt sameinast og flutt starfssemina í Hörpu.  Nú er verið að vinna að svipaðri hugmynd fyrir norðan heiðar. Um er að ræða samvinnu Hofs, Sinfóníuhljómsveitar Norðurlands og Leikfélags Akureyrar.  Fyrst Norðanmenn sjá hagkvæmni í svona sameiningu með miklu minna og hagkvæmara menningarhús þá ætti að vera grundvöllur fyrir samskonar sameiningu hér fyrir sunnan þar sem við sitjum uppi með 4 óstarfhæfar rekstrareiningar þar sem Ríkið niðurgreiðir kostnað starfsseminnar. Sinfónían, Þjóðleikhúsið og Ríkisútvarpið eiga hvert í sínu lagi að sinna menningarmiðlun. En vandamálið er fámenni þjóðarinnar sem hefur ekki efni á allri þessari menningu EF hún verður rekin á sömu forsendum og hingað til. Og svo er hitt vandamálið að óábyrgir stjórnmálamenn byggðu 10x of stórt tónlistarhús sem við höfum ekki efni á að reka að óbreyttu. Þess vegna á að skoða hvort hugmyndin um sameiningu RÚV, Symfóníunnar og Þjóðleikhússins er nokkuð svo galin þegar allt kemur til alls.  Yfirstjórnir þessara stofnana að viðbættri yfirstjórn Hörpunnar kosta hundrað milljónir á ári. Það held ég sé ekki ofmat. Með sameiningu er hægt að spara þar 50 milljónir. Með því að minnka RÚV báknið má örugglega koma þeirri starfssemi fyrir í Hörpunni og selja ferlíkið í Efstaleiti.  Þar myndi sparast hundruð milljóna.  Við það að flytja starfssemi Þjóðleikhússins niður í Hörpu myndi rekstrargrundvöllur Hörpunnar stórlagast og starfsaðstaða Þjóðleikhússins sömuleiðis.  Greinileg samlegðaráhrif þar.  Og það myndi örugglega ekki skorta kaupendur að Þjóðleikhúss húsinu á Hverfisgötunni. Ef þessi hugmynd yrði að veruleika myndi ég glaður endurskoða heit mitt um að stíga aldrei fæti inní Hörpuna.

Athugasemdir

[Elín Sigurðardóttir (IP-tala skráð) 29.11.2013 kl. 10:48]

Getum við ekki troðið Landspítalanum inn þarna líka? Það væri líka hægt að lækka fasteignagjöldin :)

[Jóhannes Laxdal Baldvinsson, 29.11.2013 kl. 10:59]

Gott að þú minnist á Landsspítalann Elín. Byggingaráformin þar eru farin að líkjast ískyggilega mikið byggingarsögu Útvarpshússins í Efstaleiti.  En við sitjum uppi með fólk sem aldrei lærir af neinum mistökum heldur keppist við að gera sömu mistökin mörgum sinnum.  En höldum okkur við efni pistilsins, plís.

[Elín Sigurðardóttir (IP-tala skráð) 29.11.2013 kl. 11:11]

Ég var aðeins að stríða þér, sorrí. Fasteignagjöldin koma nú inn á efni pistilsins. Svo var Björn Bjarnason að koma með hugmynd sem alveg mætti skoða. Mér finnst hugmyndin þín alls ekkert fráleit. Allt má skoða :)