Er Grandi að bræða síldina?

Bloggfærsla Faxagengisins vakti athygli mína vegna þess að ég fæ ekki betur séð en verið sé að fara illa með afla.  Faxinn og Lundey eru bæði gömul skip og ekki útbúin fullkomnum kælitönkum eins og nýju skipin.  Samt eru þau látin moka upp miklum afla sem síðan er siglt með austur á Vopnafjörð þar sem Grandi er með bræðsluverksmiðju og fullvinnslulínu.  Hvað mikið af afla þessara skipa fer í bræðslu?

Þetta er birtingarmynd þeirrar "hagræðingar" sem svo mikið er dásömuð af eigendum kvótans og leigupennum þeirra. Fá og stór skip veiða 95% af takmörkuðum kvóta og vegna fjarlægðar verksmiðjanna frá veiðisvæðinu þá næst ekki besta nýting á hráefninu. Mest af síldinni er nú unnin fyrir austan en veidd útaf Breiðafirði. Sigling austur á Vopnafjörð, Norðfjörð og Hornafjörð tekur sennilega 30-40 klst og síðan getur bætzt við löndunarbið.  Þetta finnst sjávarútvegsráðherra ekkert tiltökumál.

Og sjómenn þegja þunnu hljóði!  Hvers vegna er ekki búið að breyta kerfinu þannig að útvegurinn veiti fleirum atvinnu og við náum að hámarka verðmæti aflans?  Auðvitað á að byggja verksmiðju við Breiðafjörð og láta heimamenn veiða til manneldis.  Með réttum útbúnaði geta smábátar vel komið með úrvalshráefni í land.  Það hefur tekist að tæknivæða makrílveiðar smábáta og á sama hátt verður hægt að tæknivæða síldveiðar þeirra en forsendan er náttúrulega að þeir fái að veiða!

En kannski er of seint í rassinn gripið.  Síðustu ár hefur obbinn af síldarstofninum nefnilega annað hvort orðið sjálfdauður í síldargildru Vegagerðarinnar í Kollafirði eða étinn upp af hvölum inná Breiðafirði. En með það er farið eins og mannsmorð.

 

Athugasemdir

[Viðar Sigurðsson (IP-tala skráð) 22.10.2014 kl. 01:07]

Sæll Jóhannes, kannski betra að kynna sér staðreyndir áður en menn fara að tjá sig um þessi mál! já eða hreinlega bara að giska á hvernig þessum málum er háttað, en svona til gamans þá eru þessi skip sem þú ert að nefna bæði útbúinn RSW kælikerfi, Faxinn er með nýlegu kælikerfi, sjálfsagt með þeim öflugri í uppsjávarflotanum ef við miðum við burðagetu og er að skila síldinni inní vinnslunna undir O°C. Afli skipana fer allur í vinnslu enda fyrsta flokks hráefni. Undirritaður hefur séð síld sem smábátarnir hafa verið að landa í Breiðafirðinum og undantekningar lítið er þetta ljótasta hráefni sem hann hefur séð enda ekki við öðru að búast.

[Jóhannes Laxdal Baldvinsson, 22.10.2014 kl. 01:53]

Takk fyrir upplýsingarnar Viðar.  Eins og þú sérð þá fullyrti ég ekki að síldin færi í bræðslu heldur var þetta spurning.  En það er samt fáránlegt hvernig síldveiðarnar hafa verið stundaðar undanfarin ár. Og það er nokk sama hversu góð kælikerfi stóru skipanna eru ef þau þurfa að sigla langar leiðir og lenda kannski líka í brælu.  Og það mega vera meiri rosa afköstin í vinnslunni á Vopnafirði ef þeir ná að vinna úr þúsundum tonna sem bárust þangað í vikubyrjun.  Eins mættirðu lesa betur það sem þú gagnrýnir varðandi smábátana. Ég tek það sérstaklega fram að smábátar geta komið með úrvalshráefni með réttum búnaði.  Ég veit að sá búnaður er ekki til staðar í dag vegna þess að þeir fá ekki að veiða eins og þarf til að standa undir fjárfestingum.  Enda er ráðherrann handbendi stórútgerðarinnar eins og sást greinilega þegar hann stöðvaði makrílveiðarnar í haust.  Samt voru menn búnir að kosta miklu til að útbúa bátana margir hverjir.

[Viðar Sigurðsson (IP-tala skráð) 22.10.2014 kl. 18:16]

Sæll Jóhannes,Það er verið að vinna úr 450 tonna afla á sólarhring á Vopnafirði og líklega eru afköstin tvöfalt meiri hjá Síldarvinnslunni á Norðfirði.