Mbl.is falsar fréttir og Björn brjálast

RUV flutti 2 fréttir af viðskiptum Bjarna Benediktssonar við Glitni annarsvegar og viðskiptafélaga sína í Falsson & Co, hins vegar. Mbl.is segir í viðhengdri frétt aðeins frá fréttinni um samskiptin við Glitni og sem áður hafði birst í umfjöllun Stundarinnar. Lítið nýtt þar.

En hin fréttin er alvöru frétt og fjallar um aflandsfélagið Falson & Co, sem Bjarni átti þriðjungshlut í og upp komst í Panama lekanum fræga. Þá laug Bjarni blákalt að engin viðskipti hefðu átt sér stað í gegnum Falson & Co nema eitt verkefni sem hefði farið út um þúfur og hann í raun hefði tapað á Félaginu og svo klykkti hann út með að félagið hefði ekkert verið falið í skattaskjóli heldur verið komið fyrir í Lúxemborg og þetta með Panama hefði bara verið klúður bankans sem hann bæri enga ábyrgð á. Í frétt RUV er málið allt öðru vísi vaxið og sannar að allt sem Bjarni sagði okkur í fyrra um aðkomu sína að aflandseyjafélaginu Falson & Co var lygi. Haugalygi!

Þegar Bjarni skýrði hlutdeild sína í viðskiptum Falson & Co. vegna umfjöllunar um Panamaskjölin, sagði hann félagið hafa verið notað til fasteignakaupa í Dubai. Það var árið 2005. Í þessum tölvupóstsamskiptum kemur hins vegar fram að félagarnir stefndu að því að nota Falson & Co. til að fjárfesta í fleiri fasteignaverkefnum nokkrum árum síðar. Bjarni fór sjálfur til Miami þar sem hann skoðaði fasteignir sem hann stakk upp á að þeir þrír myndu fjárfesta saman í, í gegnum Falson.

„Er í Nicaragua á vegum þingsins. Stoppaði á Miami um síðust helgi á leiðinni niðureftir. Fékk kynningu á mjög spennandi díl. Spurning hvort við eigum að skoða hann saman í Falson. Þetta er á algjörlega brjáluðum stað neðst á South Beach,“ skrifar Bjarni í tölvupósti til félaga sinna í janúar 2008 þar sem hann leggur viðskiptin til. Í öðrum tölvupósti leggur Ægir Birgisson til að þeir félagar noti fjármuni sem fengust út úr viðskiptunum í Dúbai til að fjármagna viðskiptin í Miami. Samskipti Bjarna við þá sem selja þeim félögum íbúðina í Miami og sjá um vinnu við íbúðina fara í gegnum netfang hans hjá Alþingi en samskiptin við viðskiptafélagana í gegnum netfang hans hjá BNT hf.

Gögnin varpa líka ljósi á aðdraganda viðskipta Bjarna og félaga hans í Dúbaí. Þau benda til þess að Ægir Birgisson hafi haft veg og vanda að skipulagningu þeirra viðskipta. Í samskiptum hans við Brand Thor Ludwig, sem hélt utan um fjárfestinguna fyrir þá og stofnun Falson & Co., kemur skýrt fram að vilji er til að stofna félag á Seychelleeyjum.

„Gerum þetta líklega í Seychelles félagi - við verður 3 sem munum eiga það til jafns - fínt að láta Lais Lux sjá um þetta,“ segir Ægir við Brand. Brandur biður Ægi í kjölfarið að láta viðskiptafélagana velja sér nafn á félagið af lista Mossack Fonseca, panamísku lögmannsstofunnar sem stofnaði félagið.

„Nafnalisti yfir SEY félög.  Sendið mér tillögu að 2 nöfnum – forgangsraðað,“ segir í tölvupóstinum. Athygli vekur að Brandur beinir því til þeirra allra þriggja að fara yfir listann yfir nöfn Seychelleyjafélaga en ekki bara til Ægis. Bjarni hefur borið því við allt frá uppljóstrun Panamaskjalanna að hann hafi staðið í þeirri trú að félagið hafi verið skráð í Lúxemborg. Hvergi er að finna í gögnunum að það hafi verið til umræðu að stofna félagið þar.

Svona var frétt RUV og þetta er stórfrétt.  Af hverju segir mbl.is ekki frá þessari frétt?  Að þegja er að blekkja og tilraun til að láta eins og atvikið hafi ekki gerst.  Með öðrum orðum þá er þetta þöggun af hálfu mbl.is

Ef Björn Bjarnason hefði verið heiðarlegur þá hefði hann staðnæmst við seinni fréttina og getað hugsað með sjálfum sér. HU þetta hefur ekki komið í ljós áður. Nú þarf að láta fjölmiðla njóta sannmælis en ekki ráðast gegn þeim. Ef Björn væri heiðarlegur hefði hann ekki ausið úr skálum reiðinnar yfir fréttastofu RUV eins og hann gerði í morgun og lesa má hér.  Trúverðugleiki mbl.is og Björns Bjarnasonar hefur minnkað og nálgast alkul.

Bjarni Benediktsson er bara ómerkilegur lygahrappur sem í skjóli stöðu sinnar, hagnaðist á viðskiptum við glæpabanka sem var stjórnað af engum öðrum en höfuðóvini Sjálfstæðisflokksins til langs tíma, Jóni Ásgeiri Jóhannessyni.  Þótt Bjarni reyni að telja þjóðinni trú um að staða hans sem alþingismanns hafi engu skipt þá var alla vega Jón Ásgeir ekki sammála því mati.  Stóra plan Baugsmannsins Jóns Ásgeirs var nefnilega að flækja þingmenn, fjölmiðlamenn og bankamenn í einhverja orgíu svo hann hefði tryggingu fyrir að sleppa sjálfur þegar ránið væri fullframið. Þetta gekk fullkomlega eftir.  Þetta er Jón Sullenberger margbúinn að bera vitni um en enginn hlustar.  En Bjarni Ben er ekki búinn að bíta úr nálinni með þetta mál. Varla þorir hann að biðja sýslumann að setja lögbann á fréttastofu RUV líka?  Björn Bjarnason vill það en þorir Bjarni? Það kemur í ljós og fjölmiðlamenn eins og Helgi Seljan eru skíthræddir um stöðu sína þessa daga.

Gefur nákvæma mynd af samskiptum við Glitni