Nýja kennitölu fyrir Guðlaug Þór og persónukjör

Ef ég væri Guðlaugur, þá myndi ég íhuga alvarlega að skipta um flokk.  Spillingin sem tengist Guðlaugi, er öll til komin vegna starfa hans fyrir flokkinn. Og fyrst flokkurinn vill ekki breytast þá eiga menn eins og Guðlaugur Þór ekki samleið með þessum flokki.   Ef Guðlaugur segði skilið við Flokkinn og gæfi kost á sér fyrir nýtt framboð eins og til dæmis Hægri Græna, yrði það ígildi syndahreinsunar. Og þannig væri auðveldara fyrir  okkur að taka hann í sátt sem fulltrúa okkar á þingi.  Og það myndi gera honum sjálfum auðveldara að hreinsa sig af ásökunum sem tengjast spillingarstjórnmálum Sjálfstæðisflokksins og valdablokkanna sem þar takast á. 

Því við skulum hafa það alveg á hreinu að það geta ekki allir verið þingmenn og það vilja ekki margir verða þingmenn.  Þess vegna eigum við að styðja þá sem eru þess verðugir og þar kemur Guðlaugur sterkur inn.  Dæmt af verkum hans, má fullyrða, að fáir taki honum fram í dugnaði, skapandi hugsun og eljusemi, ef nokkur.  Ef hér væri búið að innleiða persónukjör þá væri valið einfalt.  Guðlaug áfram á þing!