Fuglarnir og flotið

Nú þegar neyzlubrjálæðingar gera vel við sig í mat og drykk er við hæfi að minna á smáfuglana. Og af því veðurfræðingum ber saman um að framundan séu frosthörkur þá þarf að huga sérstaklega að litlu greyjunum.  Bezt er gefa þeim flotið  eða fituna af hangiketinu sem allir eru að sjóða. Það finnst þeim algert sælgæti. Bezt er að geyma soðið í pottinum og láta það storkna yfir nótt.  Það getur tekið allt að 12 tímum á eldavélinni. Eftir það er auðvelt að fleyta flotinu af með gataspaða og koma fyrir á góðum stað utandyra.  Þó engir fuglar séu í sjónmáli þá eru þeir ótrúlega naskir að finna það sem þeir eru sólgnir í.  Eins eru þeir mjög sólgnir í pöruna af svínasteikinni. Svo alls ekki henda í hugsunarleysi því sem næringarfræðingarnir og heilsupostularnir banna að sé borðað.  Gleðilega ljósahátíð.