Klónun og staðgöngumæðrun

Ég er einn af þeim sem er andsnúinn erfðakynbótum og klónun hverskonar lífvera af siðferðilegum ástæðum.  Þátturinn í sjónvarpinu í gærkvöldi styrkti þessa afstöðu enn frekar.  Og sú staðreynd að staðgöngumæðrun er forsenda klónunar nægir til, að fortakslaust á að hætta öllum áformum um að lögleiða staðgöngumæðrun kvenna hér á landi sem annars staðar.   Það skiptir engu undir hvaða yfirskyni slíkt væri leyft.  Lögleiðingin ein og sér mundi brjóta ísinn fyrir frekari tilraunum og ekki væri langt að bíða þess að vísindamenn færu að þrýsta á um leyfi til að klóna eitt stykki mann.

Þá myndi ríkt fólk ekki lengur vilja taka í fóstur eða ættleiða óskyld börn.  það myndi verða sprenging í mansali þar sem kvenfólk yrði hneppt í staðgönguþrælkun.  Og hvað vitum við nema afleiðingin yrði enn skaðlegri.  Hvað mundi ske ef vísindamenn gætu þróað efni sem gerði mannkynið ófrjótt? 

Þetta eru fullkomlega eðlilegar vangaveltur.  Erfðakynbætur á korni hafa einmitt leitt til svoleiðis raunverulegrar hættu fyrir "villt" korn. 

Við eigum að taka siðferðilega afstöðu.  Við erum ekki herrar sköpunarinnar.  Og við eigum ekki taka okkur vald til að koma í veg fyrir náttúrulega þróun. Við eigum að vera hluti af náttúrunni og læra að skilja lögmálin.  Og aðeins með því að fylgjast með eigum við að læra. Ekki með tilraunastarfsemi sem við vitum ekkert hvert leiðir þetta mannkyn.