Vistvænt malbik?

Að leyfa malbikun göngustíga úti í náttúrunni virkar á mig eins og umhverfisspjöll.  Hvernig datt mönnum í hug að malbika Almannagjá og núna Dimmuborgir?  Hvað næst?  Þegar svona er gengið fram á vinsælustu ferðamannastöðunum þá er ekki nema von að menn sjái ekkert athugavert við að malbika Gálgahraun. Fólkið sem situr við skrifborðin er á góðri leið með að eyðileggja landið.  Nú þarf Alþingi að taka í taumana og móta stefnu um, hvernig staðið skuli að uppbyggingu ferðamannastaða í almannaeigu. Upphitaðir malbiks-göngustígar ríma ekki við vistvæna náttúruvernd í mínum huga.  Með fullri virðingu fyrir fötluðum þá verða þeir bara að hafa önnur ráð hér eftir sem hingað til til að njóta íslenskrar náttúru í sinni upprunalegu mynd. Það á að vera grunnstefið í allri uppbyggingu, að varðveita hina upprunalegu mynd.

 

Göngustígar malbikaðir í Dimmuborgum

Athugasemdir

[stefan benediktsson (IP-tala skráð) 5.11.2013 kl. 12:28]

Malbik er úr jarðefnum. Ég hef ekki setið við skrifborð í þessu máli og fagna því að menn skuli loks farnir að nota lausnir sem gagnast gestum og vernda náttúru.

[Illugi Jónsson (IP-tala skráð) 5.11.2013 kl. 13:17]

Göngustígarnir í Dimmuborgum eru upphaflega kindagötur, viltu það frekar...? Það er augljóst af skrifum þínum að þú hefur ekki hundsvit á aðstæðum í Dimmuborgum.

[Jóhannes Laxdal Baldvinsson, 5.11.2013 kl. 13:34]

Ég kom fyrst í Dimmuborgir 11 ára gamall og fannst mikið um. Síðan ferðaðist ég mikið um landið í fríum allt fram til 1990.  það sem er mér minnisstæðast var þessi tiltölulega ósnortna náttúra. Kindagötur eða ekki, þá féllu þessir stígar vel inn í umhverfið og þó að krafa um ósnortna náttúru sé ekki raunhæf þá eiga menn að hugsa úti í hvernig er best að gera hlutina að öllu athuguðu.  Með malbikun finnst mér að farin auðveldasta leiðin en ekki endilega sú besta.  Hvernig væri að þjappa hraunsalla sem nóg er af í þessar kindagötur til dæmis?  Það væri náttúruvænt..

[FORNLEIFUR, 6.11.2013 kl. 04:54]

Nú verða kindurnar ánægðar. Ég er alveg viss um að malbiksskjáturnar láti banna hunda, sem ekki hafa neitt vit, í Dimmuborgum.

Eru hjólabrettastrákar komnir í umhverfisverndina fyrir norðan? 

Sjálfseyðingarhvöt Íslendinga þekkir engin landamæri. Geta Íslendingar ekki gengið í guðsgrænni (grárri) náttúrunni? Það verður lengi hlegið að þessu.