Ríkisstjórnin hefur ótakmarkað umboð til að ljúga

Þessi nýja túlkun, að umboð stjórnmálaflokka takmarkist við stefnumál sem borin eru upp í aðdraganda kosninga, er jafn fáránleg og rök Árna Páls, að með því að taka stjórnarskrármálið af dagskrá á síðasta þingi, hafi í raun verið að þoka málinu áfram.

Fyrr en við gerum breytingar á stjórnarskránni í anda tillagna Stjórnlagaráðs, þá sitjum við uppi með óheiðarleg vinnubrögð stjórnmálamanna þar sem allt snýst um völd en minna hirt um þjóðarhag.

Atkvæðaseðillinn jafngildir óútfylltum víxli til 4 ára og með því að lýsa því yfir að menn gangi óbundnir til kosninga þá hafa kjósendur akkúrat enga tryggingu fyrir því að landinu verði stýrt í samræmi við þeirra vilja.  Afleiðingarnar eru kunnar.  Menn kjósa taktískt í stað sannfæringar og sitja svo uppi með Svarta-Pétur eftir kosningar. 

Í stað þess að játa ósigur í ESB málinu grípa nú margir til lágkúrulegra raka í örvæntingu yfir töpuðum málstað. Sérstaklega er þetta áberandi meðal Samfylkingarfólks, sem beinlínis grundvallaði stefnu flokksins á aðild að ESB.  Nú þarf þetta fólk að hugsa stefnuna upp á nýtt.  Það kann að verða erfitt með sama þreytta liðið í fararbroddi.

Á meðan situr ríkisstjórnin með pálmann í höndunum og getur í krafti baktjaldamakks og helmingaskipta farið sínu fram. Enda er þetta fyrst og fremst ríkisstjórn forsetans ekki ríkisstjórn fólksins þótt þeir hafi meirihluta þingmanna.  Á meðan forsetinn verndar þessa ríkisstjórn þá situr hún.  Skiptir engu hvað gert verður.  Þeir hafa ótakmarkað umboð kjósenda.

Hafa ekki umboð til að ákveða þetta

Athugasemdir

[Guðmundur Ásgeirsson, 21.2.2014 kl. 21:33]

Aða hvaða leyti var umboð Samfylkingarinnar til að ganga í ESB öðruvísi en umboð núverandi stjórnar til að ganga ekki í ESB?

Þarf ekki Árni Páll að svara þessari brennandi spurningu sem hann hefur núna lagt upp fyrir okkur?

[Jóhannes Laxdal Baldvinsson, 21.2.2014 kl. 21:57]

"Bara ef það hentar mér" lýsir best ómerkilegum málflutningi stuðningsmanna fimmflokksins.  Við þessi 53% sem viljum breyta pólitíkinni þurfum að fara að sammælast um grundvallarhagsmunamál þjóðarinnar,  sem er að setja hér ný stjórnskipunarlög.  Allt annað er karp um keisarans skegg.

[Kristján B Kristinsson (IP-tala skráð) 21.2.2014 kl. 22:32]

Sælir, ég er hræddur um að með rökum Árna Páls hafi VG verið heldur hressilega umboðslaus þegar umsóknin um ESB aðildina var samþykkt. ef þetta er ekki að pissa í skóinn sinn!

[Jóhannes Laxdal Baldvinsson, 21.2.2014 kl. 22:41]

Árni Páll er rangur maður á röngum tíma í vitlausum flokki.  Þess vegna tekur enginn mark á honum.