Er sjómannaverkfall yfirvofandi?

Var að hlusta á viðtal við Valmund ,formann SSÍ, í Bítinu á Bylgjunni. Samkvæmt honum byggja kröfur sjómanna á 3 grundvallaratriðum: 

• Allur afli fari á markað
• Sjómönnum verði bætt afnám sjómannaafsláttarins með dagpeningum
• Lágmarksmönnun á fiskiskipum tryggð

Stórútgerðin virðir þessar kröfur ekki viðlits og það er pínleg staða fyrir sjómenn að vera í. En þetta er staða sem var fyrirsjáanleg og undirritaður hefur margoft fjallað um hér á þessu bloggi. Sjómenn eru vegna fiskveiðilöggjafarinnar réttlausir og ofurseldir ákvörðunum stórútgerðarinnar, sem á 90% veiðiheimildanna í boði kvótaflokkanna á Alþingi. Þessi deila ef deilu má kalla, verður því aðeins leyst með aðkomu löggjafans. Þetta hljóta sjómenn að vita en þeir eru í úlfakreppu hinnar undirliggjandi ógnar að verða sviptir atvinnunni ef þeir dirfast að rífa kjaft. Enda er formaðurinn einn á báti í þessari deilu enginn hefur enn komið fram undir nafni og tekið undir með Valmundi.

Þess vegna verður að skapa stemningu í þjóðfélaginu fyrir breytingum á fiskveiðilöggjöfinni.  Stemningu sem stjórnmálamenn gætu ekki hunzað. Því það hefur sýnt sig að þeir standast ekki þrýsting neikvæðrar fjölmiðlaumræðu. En nú er ekki lengur hægt að treysta á hlutleysi fjölmiðla. Eftir að DV rann inn í Vefpressuna er hér bara 1 tiltölulega óháður fjölmiðill, Kjarninn. Og svo náttúrulega sjálfstæðu bloggararnir eins og Jónas.is og Kristinn sleggja. Egill dæmdi sjálfan sig úr leik með því að þiggja laun fyrir sína daglegu pistla enda passar hann vel að styggja ekki valdhafana.

Og þó að Píratar hafi tekið undir kröfuna um breytingu á kvótakerfinu þá skortir þekkingu meðal þingmanna þeirra til að fylgja því eftir. Þeir eru jafnheilaþvegnir af áróðri Hafró og allir hinir þingmenn kvótaflokkanna. Það eina sem þeir staglast á er krafan um uppboð á kvótanum eins og það breyti einhverju! Uppboð á aflaheimildum mun aðeins gera kerfið verra að mínu mati. Þá yrði einokunin fyrst fullkomin því auðvelt væri að yfirbjóða alla samkeppni og stórútgerðin myndi endanlega eignast allan fisk í sjónum.

En að breyta hugarfari heilaþveginnar þjóðar er ærið verkefni og gerist aðeins með litlum skrefum.  Fyrsta skrefið væri að þingmenn breyttu lögunum þannig að veiðarnar og vinnslan yrði aðskilin.  Þetta eitt og sér væri afar þýðingarmikið skref til að minnka völd einstakra útgerðarmanna.  Og ég er viss um að þetta myndu sjómenn sætta sig við til lausnar sínum kjaradeilum að sinni.  Þeir vita að krafan um dagpeninga vegna fjarvista nær aldrei fram að ganga og mönnunin er öryggismál en ekki kjaramál.