Álitsgjafinn Vilhjámur Egilsson

Ekki er nóg með að tveggja milljóna maðurinn Vilhjálmur Egilsson sé skeleggur talsmaður Samtaka Atvinnulífsins, heldur dregur hann ekkert af í pólitískri leiðsögn fyrir ónýt stjórnvöld. þessum fyrrum þingmanni Sjálfstæðisflokksins finnst flestu illa ráðið og sérstaklega er honum uppsigað við þá sem þvælast fyrir honum og vinum hans í stóriðjusveit SA.  Í fréttum á stöðinni hans Jóns Ásgeirs, þótti við hæfi að birta álit hans á fyrirhuguðum stjórnkerfisbreytingum. Fann hann því flestu allt til foráttu og sérstaklega virtist honum uppsigað við fyrirhugaða eflingu umhverfisráðuneytisins. Ekki er ég viss um að margir séu sammála Vilhjálmi í því

Útlenska hóran eða hið tvöfalda siðgæði

Á Ingólfstorgi útlenzk hóra
ennþá býður sig
Á Goldfinger þær æra óra
án þess að selja sig

Össur er ekki vondur maður

Í seinni tíma hef ég velt fyrir mér hvort ekki sé tímabært að safna saman fleygum orðum, Össurar Skarphéðinssonar og gefa út á prenti. Maðurinn er sveimhugi og afburða ljóðrænn og skáldlegur í orðavali.  Hver annar myndi til dæmis sjá ljóðræna fegurð í að leggja sæstreng til Færeyja?! Hverjum öðrum myndi detta í hug að líkja samþingkonu sinni við hryssu með strok í genum, eða sjálfum sér við ísbirni!  Þess vegna segi ég að Össur er ekki vondur maður.  Hann hefur bara lent á pólitískum glapstigum.  Það er ekki mannvonska,  þótt Páll Vilhjálmsson sé þeirrar skoðunar.  Hvernig væri að stofna feisbúk grúppu um að bjarga Össuri

Össur kynnir norðurslóðaverkefni

Viðvaningar á dekki

Ég man alltaf fyrsta skiptið sem ég gægðist út á dekk á síðutogaranum Úranusi RE 343. Þetta var vorið 1965 og ég nýfermdur sveitastrákur að norðan hafði fengið að fara þennan túr sem 2. kokkur. Við vorum þá á karfaveiðum á Grænlandsmiðum. Sjómennska á síðutogara var hættulegt starf. Þegar trollið var tekið eða því kastað þurfti samhenta áhöfn ef ekki átti illa að fara. Hver maður þekkti sitt hlutverk og hverju starfi fylgdi ákveðin virðing og viðurkenning. Næst á eftir að vera vaktaformaður, 2.stýrimaður eða bátsmaður, þótti mest virðing fólgin í að vera pokamaður. Pokamaðurinn bar ábyrgð á að aflinn héldist í trollinu og það þótti hin mesta háðung að fá fráleyst. það skeði þegar pokahnúturinn raknaði upp í sjónum. Að vera hleramenn var líka ákveðin virðingarstaða. Aðeins vönum mönnum var treyst í það starf. þeim til aðstoðar voru svo viðvaningarnir oftast settir. Góðir hleramenn kenndu svo viðvaningunum rétt handtök og kenndu þeim að forðast hættur sem allstaðar lúrðu í leyni. Aðeins þannig var hægt að gerast fullgildur sjómaður. Læra af sér reyndari mönnum. Þetta var lífsins skóli.

Í stjórnmálum gilda aðrar reglur. Þar er ekki spurt hvort þú kunnir.  Hér er óhæfu fólki falin ábyrgð hægri vinstri og enginn spyr um reynslu eða þekkingu. Og efst í píramída vanhæfninnar tróna svo viðvaningarnir í Ríkisstjórninni. 10 viðvaningar á dekki og enginn kafteinn í brúnni! Er nema von að hér sé flestu illa stjórnað?

Rányrkja með flottrolli

Uppsjávarfiskar ferðast um í torfum sem geta verið margar mílur að flatarmáli. Áratugahefð hefur verið fyrir veiðum úr þessum stofnum með nót. Nótin virkar svona eins og tertuhnífur. Skipstjórar kanna alltaf fyrst stærð torfunnar og stefnu, síðan reyna þeir að skera ekki of stóra sneið utan af torfunni. Því enginn vill lenda í því að taka of stórt hol og eiga á hættu að sprengja nótina. Nótin getur líka aðeins veitt á takmörkuðu dýpi. Kannski mest 100 föðmum þær al dýpstu.  Flottrollið er allt öðru vísi veiðarfæri. Að veiða með flottrolli er eins og að vaða með lúkuna í miðja tertuna og gófla upp í sig án tillits til hinna og eyðileggja líka strúktúrinn og uppbygginguna. Það er margfalt skaðlegra af því með því er hægt tæknilega  að ryksuga allt kvikt í sjónum. til dæmis er ekki óalgengt að það fáist bæði lax og guðlax sem meðafli við flottrollsveiðar á síld, makríl og kolmunna. Þrátt fyrir þessa vitneskja hefur Hafró skellt skollaeyrum við varnaðarorðum sjómanna og gerir engar athugasemdir við notkun flottrollsins og jafnvel aðstoðar við gerð stærri flottrolla eins og fullyrt er að samstarf Hafró og Hampiðjunnar og Granda hafi þróað risa flottrollið Gloríu.

Þegar togað er með flottrolli í gegnum miðja torfu, þá splundrast hún og það tekur langan tíma fyrir hana að þjappa sér saman aftur og taka rétta stefnu. Þetta hafa atferlisrannsóknir sem myndaðar hafa verið af BBC sjónvarpsstöðinni bresku staðfest. Og þar hefur líka komið í ljós hvernig hvalir og önnur rándýr eins og selir, passa sig að tvístra aldrei torfum síldfiska, Þessi dýr sjávarins hafa greinilega meiri eðlisgreind heldur en fiskateljararnir á Hafró og  útrýmingarsinnar íslenska fjölveiðiflotans. Það er lágmarkskrafa að fram fari könnun á skaðsemi flottrollsveiða fyrir lífríki hafsins. Aðrar þjóðir stunda ekki svona skefjalausa rányrkju. Norðmennirnir sem núna stunda veiðar á loðnu úr sameiginlegum stofni og á sama svæði og íslendingarnir veiða ekki með flottrolli .  Jón Bjarnason hafði tækifæri til að gera fiskveiðar á Íslandi sjálfbærar. Hann klúðraði því og núna verður hann látinn taka pokann sinn. Farið hefur fé betra

Tillaga um aukinn loðnukvóta

Sykurhúð handa Ömma

Þegar börn vilja ekki borða eitthvað er iðulega brugðið á það ráð að strá yfir það sykri. Ögmundur hefur hingað til staðið staðfastur gegn samningi um ábyrgð ríkisins á icesave svikareikningum Landsbankans. Nú bregður við nýjan tón hjá ráðherranum Ögmundi.  Nú er þetta allt í einu orðinn miklu betri samningur þótt ekkert fast sé í hendi um það. Þetta er í grundvallaratriðum nákvæmlega sami samningur og endurskoðaði icesave 2 samningurinn. Ögmundur greyið hefur kynnt sig sem mann sátta, það er oftúlkun, Ögmundur er vingull sem er að kikna vegna þess að hann þarf að burðast með 2 aðstoðarmenn, sinn á hvorri öxlinni sem hvísla sitt hverju að honum. Ögmundur er líka enginn umbótamaður, hann hefur staðið í fararbroddi innan þingsins við að koma á tvöföldu lífeyrissjóðakerfi og hann hefur varið ofvöxtinn í embættismannakerfinu sem formaður BSRB til fjölda ára. Ögmundur þarf að víkja. Og hann mun víkja með digran eftirlaunasjóð í fanginu. Hann hefur séð til þess. Það er hans sykurhúð

Styður Icesave að óbreyttu

Afneitun Ólínu

3 þingkonur voru í spjalli hjá Sigurjóni á Sprengisandi í morgun.  Eygló Harðar, Unnur Brá og Ólína Þorvarðardóttir. Þær voru meðal annars spurðar um vantraustið á flokkana og vinnubrögðin á þingi og hið margumtalaða foringjaræði. Ólína fór þar með undarlega þulu. Hún gerði lítið úr vantraustinu á flokkana , taldi það storm í vatnsglasi sem gengi yfir, ástandið á Alþingi var um að kenna alltof mikilli nýliðun á þingi, þegar 27 nýir þingmenn komu inn og varðandi foringjaræðið þá sagði Ólína fullum fetum að í Samfylkingunni væri ekkert foringjaræði. Í Samfylkingunni ræddu menn málin og tækjust á!  Hvenær var það Ólína?  Og þegar henni var bent á að þingmenn fylgdu flokkslínu í öllum málum eins og hefðu verið tilbúnir að samþykkja icesave 1 án umræðu þá kom á hana og hún áttaði sig á að hún hafði slæman málstað að verja. Enda verða stjórnmálin ekki löguð innanfrá með fólki eins og Ólínu Þorvarðardóttur. Hins vegar sýndi Eygló Harðar enn og aftur hversu yfirburða þingmaður hún er. Róleg, yfirveguð, sanngjörn og ein af fáum sem hefur kynnt sér í þaula rannsóknarskýrsluna og gert sér grein fyrir afleiðingunum og hverju þarf að breyta. Aðrir þingmenn virðast hafa gleymt öllu ef þeir á annað borð vissu það einhvern tíma. Það er orðið tímabært að þingmenn dusti rykið af tillögum Atlanefndarinnar OG GERI BREYTINGAR.

Endurvekjum Auðlindina á Rás 1

Ein besta tenging landsmanna við það sem var að gerast í sjávarþorpunum og útgerðarstöðunum fékkst í gegnum fréttaþáttinn Auðlindina sem útvarpað var í lok hádegisfrétta áður en hlutabréfa-geðveikin heltók fréttastofuna. Þá urðu aflafréttir ekki lengur spennandi. Nú er öldin önnur. Allir eru uppfullir af áhuga á auðlindinni sinni og því ber að endurvekja þetta fréttamagasín og gera Steina Briem að ritstjóra. Þjónusta ríkisútvarpsins við landsbyggðina er enn í skötulíki, þrátt fyrir Landann sem er frekar í ætt við spaug en fréttir. Alla vega er þar ítrekað vakin athygli á því afkáralega frekar en því venjulega. Ég er landsbyggðarmaður af lífi og sál og ég sakna þess að fá ekki  fréttir af aflabrögðum og sjósókn beint frá hafnarvigtinni eða gegnum viðtöl við sjómennina sjálfa. það væri líka hollt fyrir latté lepjandi lista og menntafólk í 101 , að vita hvernig lífið gengur fyrir sig hjá þeim sem halda þessu þjóðfélagi á floti Menningargeirinn aflar ekki raunverulegra tekna, hann er að velta peningum sem verða til í gegnum gjaldeyris og aðra framleiðslusköpun.  Að halda því fram að peningar sem koma frá ríkinu efli hagvöxt er einhver meinloka sem þarf að leiðrétta.

Útbólginn landlæknir

Fáar stofnanir í ríkisapparatinu hafa tútnað jafn mikið út undanfarin ár og landlæknisembættið. Á þessum fjárlögum fær embættið 324 milljónir   en á árinu 2000 voru útgjöldin 161.416 á föstu verðlagi samkvæmt ríkisreikningi.  Semsagt þetta embætti hefur vaxið um 100% á 10 árum og ef það væri fjármálafyrirtæki þætti það góð frammistaða en þetta er ríkisstofnun og þess vegna er vöxturinn ekki jafn gleðilegur.  Helst má líkja þessum ríkisstofnunum við tilbera sem sjúga og sjúga endalaust þar til þær standa á blístri. Og svo vogar landlæknir sér að afneita ábyrgð embættisins á eftirliti með öryggi á hjúkrunarstofnunum. Hans er ábyrgðin og það er hans að framfylgja fullnægjandi eftirliti . punktur basta. Útjaskaðir hjúkrunarfræðingar eiga ekki að þurfa að standa í klögumálum við þessar aðstæður. En kannski er öllum sama. Gamla fólkið er bara baggi á þjóðfélaginu og því er það bara gott að því fækki.  Og það sem landlæknir og ráðherra vita ekki af, það spillir ekki svefni hjá þeim. Og þeir skilgreina vitneskju sem formlega athugasemd. Ef athugasemdin er ekki formleg þá hefur ekki verið vakin athygli á málinu þótt viðkomandi hafi verið spurðir útúr í sjónvarpsviðtölum. Svona er norræna velferðarþjóðfélagið 2011

Björk setur þrýsting á Jóhönnu

Björk Guðmundsdóttir fullyrðir í viðtali við kanadíska dagblaðið National Post að íslensk stjórnvöld séu reiðubúin til að ógilda yfirtöku Magma Energy á HS Orku.

 

 

 

 

Þetta er klókt hjá Björk og setur þrýsting á íslensku ríkisstjórnina. Nú þarf Jóhanna að gefa opinbert svar og það dugar engin loðmulla.