Kennitöluflakk

Um bankasölu engin sátt
samfélagið ólgar,
en ríkiseignum ræna brátt
raðgjaldþrota dólgar

Usual suspect

Jóni Ásgeir gefum Gaum
gaman vær' ef Óli
færi hans að far' í saum
á földu skattaskjóli

Milljarða gjaldþrot og lítið greitt

Rúningur á Rangá

Þá, sem eiga aur sem sand
allir elt' á röndum
Nú er okkar Ísaland
orðið land með löndum

Af fólksins frægð og feiknar auð
Friðrik blindar glýja.
Og eins og bóndans eðli bauð
bezt þau tald' að rýja.

En tæpast rekur til þess nauð
og trist af Kardashian,
að láta lít' á sig sem sauð
og sjálfsagt sé að rýj'ann.

Kvikmyndatökur við Hótel Rangá

Ólafur bjargar Íslandi

Af grunni skeknar skorðurnar
Nú skal brúa bilið.
En hverjum ætlar hann orðurnar
ef enginn á þær skilið?

 

 

 

 

Ef rétt get skeknar skorðurnar
og skarað eignabilið,
allir fá þá orðurnar
því enginn á þær skilið.

60% ánægð með Ólaf Ragnar

Eignaskjól en ekki skattaskjól

Þeir leyndina telja lögvarða
með ljóstrun á sér brotið,
sem eignum uppá milljarða
undan hafa skotið

Skýrari viðbrögð gegn skattaskjólum

Vinstra vorið

Eins fljótt og vinstra vorið kól
nú visnar gagnalekinn,
en umræðan um eignaskjól
aftur verður tekin.

Tregða við kosningar ógnar stöðugleika

Fellur á silfrið

Eftir frægan fréttaþátt
formennirnir þinga
Í sæti Simma samdist brátt
að setja Sigurð Inga

Nú veltur á hvað Bjarni kýs
og hvort sér bjarg' úr ösku
því eins og fyrr með Óla grís
ekkert er í tösku

Hann lofar kannski að kjós' í haust
og kröfum þannig svara.
Og iðrast smá í tal' um traust
en treystir völdin bara

Svo taka þykist þurfa til
því það var látið danka
- En við frændur gerir skatta skil
og skenkir nokkra banka.

 

Ennþá að hugleiða skattagrið

Óheppnir þjófar

Það hlýtur að koma þessu óheppna pari til refsilækkunar að hafa stolið þessum úlpum úr rangri verzlun.  Ef þau hefðu vitað af túristaokrinu á Íslandi þá hefðu þau stolið þessum úlpum úr útivistarbúð á Laugarveginum en ekki Bláa Lóninu. Engum Íslendingi dettur í hug að kaupa úlpu sem kostar 80 þúsund krónur eða meira. Flestir myndu telja slíka verðlagningu þjófnað en hann er víst lögverndaður eins og fleiri glæpir á Íslandi.

Stálu úr verslun Bláa lónsins

Mr. og Mrs. Nobody

Hvað er að beinum og milliliðalausum samskiptum?  Af hverju eru kjörnir fulltrúar okkar Reykvíkinga svo hræddir við að svara fyrir pólitískar ákvarðanir að þeir þurfa að eyða takmörkuðu skattfé okkar í ráðningu upplýsingafulltrúa skóla og frístundasviðs?

Samkvæmt upplýsingum á vef Reykjavíkurborgar sitja 14 pólitískir fulltrúar í Skóla og Frístundaráði

Aðalmenn 

Skúli Helgason

Líf Magneudóttir

Sabine Leskopf

Eva Einarsdóttir

Kjartan Magnússon

Marta Guðjónsdóttir

Jóna Björg Sætran

Varamenn 

Þorkell Heiðarsson

Sigríður Pétursdóttir

Margrét Norðdahl

Nichole Leigh Mosty

Örn Þórðarson

Herdís Anna Þorvaldsdóttir

Rakel Dögg Óskarsdóttir

 

Hvernig væri að blaðamenn spyrðu einhvern af þessu fólki útí umdeilt bann við ágengri markaðsstarfsemi stórfyrirtækja inní skólum borgarinnar? Þá þyrftum við kannski ekki að lesa um ómerkilegt karp frá Mr. og Mrs. Nobody sem enga ábyrgð bera.

Ólafur Hand gagnrýnir Reykjavíkurborg

Húsafriðun og byggingalist

Arkitektar eiga það sameiginlegt með borgarstjórnarmeirihluta Samfylkingar að þeir þola engum að fjalla um arkitektúr og húsafriðun nema fáum útvöldum. Þess vegna meðal annars eru þessi mál í brennidepli í dag. Það er búið að klúðra svo mörgu.  En það er ekki eingöngu slæmir verktakar heldur miklu fremur slæm pólitík sem borgararnir eru að mótmæla. Arkitektarnir eru þó enn í skjóli en það kann að breytast þegar frá líður og fleiri skipulagsslys líta dagsins ljós.

Friðun Bernhöftstorfunnar var einstök á sínum tíma og markaði upphaf að auknum skilningi varðandi friðun gamalla húsa. En forsendan fyrir þeirri friðun var, að þar var um heildstæðan klasa húsa að ræða. Ekki stök hús í breyttu umhverfi. En því miður þá hafa öfgamenn náð undirtökum í nefndum og ráðum og nú sjást menn ekki fyrir í friðunardellunni. Nýjasta dæmið er fjaðrafokið vegna Exeter hússins í Tryggvagötu. Í fyrsta lagi þá liggur ekki fyrir hvernig það hús var gert upp. Hvað var mikið af því húsi endurnýjað og hvað mikið var orginal. Þetta skiptir máli. Og er hægt að tala um húsafriðun þegar leyft er að þrengja að gömlum húsum með forljótum karakterlausum, steinsteypukumböldum og byggja undir kofann og lyfta honum upp. Þetta allt var leyft með framkvæmdaleyfinu í Tryggvagötu. Og átta sig svo á því að framkvæmdin er önnur en kontoristar gerðu ráð fyrir er kannski bara smjörklípa til að leiða athyglina frá ófremdarástandi í gatnamálum borgarinnar. Því það vill svo "heppilega" til að málið er á borði sama borgarfulltrúans.

Niðurrif Exeter hússins er nefnilega síst meira spellvirki en niðurrif fjölda annarra húsa sem enginn gerir athugasemd við.  Til dæmis Íslandsbankahúsið í Lækjargötu. Og hvað um þessa uppbyggingu á Tryggvagötunni? Finnst mönnum flott teikningin af húsinu sem á að byggja við hliðina á exeter húsinu horfna? Þar á nefnilega að fullnýta lóðina með því að grafa niður jarðhæðina og byggja 5 hæðir í stað fjögurra eins og húsin við hliðina eru. Að hækka exeter húsið um eina hæð við hliðina á því byggingarslysi er bara klúður en engin redding.

Næst þegar svona árekstrar verða á milli hins gamla og þess nýja þá væri nær að varðveita hið gamla með því einfaldlega að finna því nýjan stað.  Ef það hefði verið gert í þessu tilfelli þá hefði það aldrei verið rifið.  Svo það er fyrst og fremst við skipulagssvið borgarinnar að sakast en ekki verktakann.