Ég skal vera Björn

Framsóknarmenn með forsætisráðherrann í fylkingarbrjósti eru greinilega komnir í kosningaham þótt enn séu full 2 ár eftir af kjörtímabilinu. Einn ráðherrann er búinn að ráða sér kosningastjóra og Hallur Magnússon farinn að skrifa athugasemdir. Þetta eru eins áreiðanleg merki um að Framsókn sé komin í kosningaham eins og koma lóunnar að vori. Gott og vel.  Það er þeirra mál. Þeir verða dæmdir af verkum sínum eins og allir. 

  En það pirrar mig að forsætisráðherrann skuli vera svona pirraður út í Kára Stefánsson að hann hafi ráðið almannatengil flokksins í að dreifa skít um Kára Stefánsson!Þetta segir Kári og ég trúi honum.  Hann hefur enga ástæðu til að ljúga um samskipti sín við Inga Frey Vilhjálmsson á Stundinni.  En sá piltur var höfundur flökkusögu sem gengur nú um netheima og er ætlað að sá efasemdum um heilindi og framgöngu Kára Stefánssonar í sambandi við gjöf Íslenskrar Erfðagreiningar á jáeindaskannanum til LSH.  Og það var meira að segja gengið svo langt að blanda bróður Kára inní málið til að láta gerninginn lykta af frændhygli og spillingu og draga þannig úr trúverðugleika Kára Stefánssonar. Þessi skrif Inga Vilhjálmssonar eru forkastanleg og á skjön við góða blaðamennsku og hann verður að skýra þau nánar. Ef Framsóknarflokkurinn telur að gagnrýni Kára á of lágt framlag til heilbrigðismála komi til með að skaða flokkinn í næstu kosningum þá er þeim í lófa lagið að hækka framlag ríkisins verulega í stað þess að styrkja bændur um 140 milljarða samkvæmt nýjasta velgjörðargjörningi landbúnaðarráðherrans sem er jú varaformaður flokksins.

Flokkur með góða samvisku þarf ekki þjónustu PR ráðgjafa. Og forsætisráðherra með sjálfsvirðingu og sæmilega góða geðheilsu er ekki að munnhöggvast við fólk út í bæ og alls ekki í gegnum samfélagsmiðla.

Er Stjórnarskráin jaðarmál?

Annað hvort eru menn enn að melta þessar 3 breytingar sem hugmyndir eru uppi um að gera á stjórnarskránni eða að það er bara enginn áhugi fyrir þessu máli!  En það er víst lögmál að þeim mun ómerkilegri sem mál eru, þeim mun meiri umræðu fá þau.  Og þetta er í réttu hlutfalli við gáfnafar landmanna eða öllu heldur hjarðhugsunina sem lætur stjórnast af trendum á samfélagsmiðlunum.

Þessu verðum við að breyta. Við megum ekki láta fámenna hópa stjórnmálamanna, embættismanna og fræðimanna standa í vegi fyrir þeim lýðræðisumbótum sem kallað var eftir árið 2009 og sem leiddi af sér skipan á fulltrúum í stjórnlagaráðið alræmda, eftir tilræði Hæstaréttar til að ónýta kosninguna til stjórnlagaþings.

Öllum sem hafa velt fyrir sér stjórnskipuninni hér á landi, óháð stjórnmálahagsmunum, er ljóst, að henni þarf að breyta í grundvallaratriðum. Það er ekki hægt að sætta sig við að vilji meirihluta kjósenda, eins og hann birtist í þjóðaratkvæðagreiðslunni um nýju stjórnarskrána, sé hunsaður af stjórnarherrum sem njóta í raun aðeins rúmlega 30% trausts kjósenda samkvæmt síendurteknum könnunum.

Í þessu ljósi er svo sem ekki margt sem þarf að segja um þessar 3 breytingatillögur sem litu dagsins ljós í fyrradag eftir rúmlega 2 ára yfirlegu tuga manna úr þingflokkum, ráðuneytum og frá fræðasamfélaginu. Þessar tillögur breyta í raun litlu og engin þörf á að bæta þeim við núverandi stjórnarskrá. Stjórnarskrána á ekki að skrifa á lagatæknimáli sem enginn skilur. Sú frumhugsun var greinilega sniðgengin við samsuðuna á þessum 3 frumvörpum.  Að það þurfi til dæmis að lesa í gegnum nokkrar blaðsíður af fylgiskjölum til að sjá að merkingin þjóðareign þýðir alls ekki endilega að þjóðin eigi fiskinn heldur eins og segir í skýringagrein 3.1.2 :

Í 2. málsl. 2. mgr. hinnar nýju greinar er áréttað að enginn geti fengið þau gæði sem teljast til þjóðareignar eða réttindi tengd þeim til eignar eða varanlegra afnota og aldrei megi selja þau eða veðsetja. Tekið skal fram að ákvæðið mun ekki sjálfkrafa raska þeim óbeinu eignarréttindum sem kunna að felast í afnota- eða hagnýtingarrétti sem þegar kann að hafa verið stofnað til gagnvart landsréttindum og auðlindum sem samkvæmt frumvarpinu munu teljast í þjóðareign, sbr. það sem segir um réttarvernd slíkra heimilda í köflum 4.5 og 4.6.

Er boðlegt að leggja svona fram við þjóðina?  Og ég er líka á móti þessari útfærslu á þjóðaratkvæðagreiðsluréttinum. Hvernig geta menn litið fram hjá icesave þjóðaratkvæðagreiðslunni og sett inn fyrirvara eins og þennan?:

Fjárlög, fjáraukalög, lög um skattamálefni og lög sem sett eru til að fram-fylgja þjóðréttarskuldbindingum verða ekki borin undir þjóðina samkvæmt þessari máls-grein.

Samkvæmt þessu verður ekki hægt að hafna næstu nauðasamningum eða aflátssamningum sem einhverjum brjálæðingum í ríkisstjórn Íslands, dettur í hug að binda þjóðina með í framtíðinni  Svona er náttúrulega ekki boðlegt. Þjóðinni er vel treystandi fyrir öllum sínum ákvörðunum hvers eðlis sem þær eru og því eru allir fyrirvarar óþarfir.

Og til að jarða allt jafn snyrtilega þá sé ég ekki hvar þessi almenna viljayfirlýsing um náttúru og umhverfi á heima í Stjórnarskránni.  Fyrst Stjórnarskráin er grundvöllur að allri annarri löggjöf þá þarf hún ekki að innihalda svona marklausa frasa:

Náttúra Íslands er undirstaða lífs í landinu. Ábyrgð á vernd náttúru og umhverfis hvílir sameiginlega á öllum og skal verndin grundvallast á varúðar- og langtímasjónarmiðum með sjálfbæra þróun að leiðarljósi. Stuðlað skal að því að fjölbreytni náttúrunnar sé viðhaldið og vöxtur lífríkis og viðgangur tryggður.
Allir skulu njóta heilnæms umhverfis. Almenningi er heimil för um landið og dvöl þar í lögmætum tilgangi. Ganga skal vel um náttúruna og virða hagsmuni landeigenda og annarra rétthafa. Mælt skal nánar fyrir í lögum um inntak og afmörkun almannaréttar.
Í lögum skal mælt fyrir um rétt almennings til upplýsinga um ástand umhverfis og áhrif framkvæmda á það svo og til þátttöku í undirbúningi ákvarðana sem áhrif hafa á umhverfið.

Hverjir voru að biðja um svona ákvæði í Stjórnarskrána?  Ef hér hefði verið lagt til bann við mengun og bann við sölu á landi eða landsréttindum til útlendinga þá hefði það verið eitthvað til að ræða í alvöru en þessa marklausu viðbót getum við slegið útaf borðinu án frekari umræðu

Nýr vinkill á Borgunarmálið

Nú þegar áhuginn á Borgunarklúðri Landsbankastjórnenda virðist vera að dofna er ekki úr vegi að velta upp nýjum vinkli á það mál. En sá vinkill snýr að svikagjörningi stjórnenda Borgunar með forstjórann í farabroddi. Nú er það svo að þótt tekist hafi að "plata" Steinþór Pálsson og Landsbankinn sé ekki lengur eigandi að þriðjungshlut í Borgun þá á ríkið samt enn meirihluta eða 63.47% í fyrirtækinu í gegnum Íslandsbanka og ætti því tæknilega að geta skipt um stjórnendur í Borgun ef pólitískur vilji er til þess.  Bjarni Benediktsson virðist búinn að átta sig á því að pólitískri ábyrgð lýkur ekki hjá ráðherra efnahagsmála þótt búnar séu til stofnanir eins og Bankasýsla og Fjármálaeftirlit.  Sem viðskiptavinur Íslandsbanka þá finnst mér það eðlileg krafa að Haukur Oddsson víki.

Hvað fá Norðmenn fyrir loðnuna?

Þar sem ekki er búið að skilja á milli útgerðar og vinnslu á Íslandi þá hefur stórútgerðarmafían komist upp með refsivert athæfi varðandi samráðsverðlagningu á uppsjávarfiski. Þess vegna væri það þarft framtak hjá Valmundi Valmundssyni að leita eftir þessum upplýsingum hjá norsku útgerðinni og birta þær opinberlega.  Það yrði þá leiðbeinandi verð fyrir íslensku sjómennina.

Fyrsti loðnufarmur ársins á Þórshöfn

G(óðir) & G(egnir) handvaldir af Steinþóri...aftur!

Nú þarf greinilega að hafa snarar hendur við að úthluta bestu bitunum úr eignasafni Landsbankans til góðra og gegnra sjálfstæðismanna eða hver trúir að byggingafélag sé að fjárfesta í byggingalóðum sem ekki stendur til að nýta á næstu árum?  Þessar ósvífnu útskýringar Landsbankastjórans eru móðgun við heilbrigða skynsemi hvorki meira né minna. Að selja byggingaland sem er verðmetið á 3.2 milljarða, fyrir 1/3 af þeirri upphæð er gjöf en ekki gjald.  Hvernig sem á það er litið.  Opið og gegnsætt söluferli felst ekki í örlætisgjörningum svo því sé haldið til haga.  En auðvitað er ekki hægt að hafa eftirlit með öllu sem þessir menn eru að bralla svo krafan er einfaldlega að allt þetta fólk víki. Bankastjórnin. bankasýslan og stjórn bankans.  Þetta fólk er trausti rúið.  Og miðað við að alþingi hefur nú þegar heimilað sölu á 30% hlut í Landsbankanum þá gengur ekki að einkavinir fari ránshendi um eignasafn bankans í "opnu og gegnsæu" baktjaldamakki Steinþórs Pálssonar

Loksins umræða um TISA

http://nordichouse.is/event/tisa-open-meeting/

Opinn fundur í boði Dögunar(Stjórnmálaafls) í salnum í Norrænahúsinu Vatnsmýri, klukkan 8 í kvöld fimmtudag 28 janúar.

Fundarstjóri: Benedikt Erlingsson leikari og leikstjóri.
1. Bergþór Magnússon fulltrúi úr samninganefnd Íslands um TISA kynnir samningaviðræðurnar
2. Gunnar Skúli Ármannsson fulltrúi Dögunar
3. Kristinn Hrafnsson starfsmaður Wikileaks

Fulltrúum stjórnmálaflokkanna á Alþingi hefur verið boðið á fundinn og óskað er sérstaklega eftir svörum við eftirfarandi spurningum:
A) Hvað vitið þið um samningaviðræðurnar?
B) Vitið þið meira en almenningur?
C) Eruð þið hlynnt eða andvíg því að Ísland taki þátt í TISA samningaviðræðunum?
D) Eruð þið hlynnt eða andvíg því að TISA samningurinn verði samþykktur án umræðu á Alþingi?
E) Eru þið hlynnt eða andvíg því að TISA samningurinn fari í þjóðaratkvæðagreiðslu?

Þetta er löngu tímabært framtak því þátttaka okkar í þessum samningaviðræðum hefur staðið lengi en farið dult. Í hvers umboði er líka óljóst því talað er um að undirritun þessa samnings feli í sér fullveldisafsal. Þeir sem ekki komast á fundinn geta hlustað á beina úsendingu á http://livestream.com/

Ætti að vera forsíðufrétt!

Þökk sé kvótabröskurum þá virðist sem fréttir um komu nýrra skipa sé orðið hálfgert feimnismál. Ég minnist til dæmis ekki að hafa séð frétt um þegar nýjasta fjölveiðiskip Granda kom til landsins. Sá bara frétt um aflabrögð í fyrstu veiðiferð grafin inní miðju blaði. Þetta ætti að vera umhugsunarefni fyrir þá sem starfa í greininni. En kannski líka áminning fyrir fjölmiðla um að það er fleira fréttnæmt en skætingur á fésbók. Það á að vera forsíðufrétt stærstu blaða og fyrsta frétt á RUV þegar nýtt skip bætist við flota landsmanna. Sérstaklega þegar um er að ræða útgerð sem hefur vaxið úr nánast engu. Ég óska Flosa Jakobssyni til hamingju með þessi tímamót í útgerðinni.

Bolvíkingar fögnuðu nýjum togara

Atómljóð

Á Hlemmi stjórnmálanna standa 6 vagnar í röð.

• Leið A Reykjavík-Brussel (Hraðferð)
• Leið B Reykjavík-Sauðárkrókur-Fljótshlíð
• Leið D Garðabær-Flórída-Tortilla
• Leið S Reykjavík-Brussel
• Leið V Rekjavík-Bakki (UM Vaðlaheiðargöng)
• Leið þ Hlemmur-Alþingi

Og fólkið ráfar um í leit að réttum vagni. Flestir forðast Leið D,  sem sker sig úr. Það er nefnilega ekki venjulegur strætó heldur lúxusrúta frá Kynnisferðum í stæðinu. Og Leið A er víst ekki lengur á leið. LÍN gerði fjárnám í vagninum en farþegum bent á leið S í staðinn. Þegar líður að brottför er ljóst að flestir munu velja leið Þ.

 

 

Áhyggjur Birgittu réttmætar

Hugmyndafræðilegur tilveruréttur Pírata er svo veikur að í raun getur tiltölulega fámennur hópur yfirtekið hreyfinguna. Ekki bara frjálslyndir hægri menn heldur ekki síður vinstri sinnaðir forræðishyggjusósialistar. Einn slíkur flaut inn í borgarstjórn Reykjavíkur í síðustu kosningum.

Píratar þurfa því að þétta raðirnar og fara að starfa eins og alvöru stjórnmálaafl. Koma upp á yfirborðið með skýra pólitíska sýn á það samfélag sem það vill byggja upp.  Það er greinilega mikil óánægja með flokkana á þingi en þessarar skoðanakannanir eru ómarktækar að því leyti að mjög fáir taka afstöðu í því úrtaki sem valið er.

En Píratar eru alltof værukærir í vímu velgengninnar. það er bara 1 ár og 3 mánuðir í næstu alþingiskosningar og það er ekki langur tími. Ef Píratar vilja tryggja sitt fylgi verða þeir að fara að tala einum róm um grunngildin. Ef grunngildin ganga gegn frjálshyggustefnunni þá þurfa menn ekkert að óttast því kjósendur sjá í gegnum pólitísku loddarana en ef grunngildin eru óljós þá er eins líklegt að allt springi framan í þá eins og gerðist með Borgarahreyfinguna og Dögun.

Vill frjálshyggjumenn úr Pírötum

Þegar loðnan hvarf

Í fyrra munaði hársbreidd að fiskifræðingar lýstu yfir hruni loðnustofnsins. Þá fannst engin loðna sem heitið gæti á hefðbundnum slóðum á hefðbundnum árstímum.  Samt var öllu tjaldað til í loðnuleit hjá Hafró, sem er dálítið skondið hjá stofnun sem þykist vita nákvæmlega hve mörg tonn af hverri fisktegund er í sjónum!  Svo allt í einu birtist loðnan og öllum létti. En sérstaklega fiskifræðingunum á Hafró. Hinn öflugi uppsjávarveiðifloti okkar náði að ryksuga upp leyfilegan kvóta og engu var skeytt um hvort loðnan næði að hrygna og tryggja þannig næga viðkomu! Þessi breyting á varúðarreglunni sem skýrir breytta aflareglu núna segir mér að hrygningin hafi mistekist sem er stóralvarlegt mál.

Því loðnan er mikilvægasti liðurinn í fæðupíramída hafsins. Loðnan er undirstaða þess að þorskurinn þrífist. Þess vegna eiga menn að láta þorskinn njóta vafans og banna alfarið alla loðnuveiði í grunnnót í 2 ár.  Grunnnótin drepur allt kvikt.  Líka allan ungfiskinn og seiðin í fjörunni fyrir suður og suðaustur landi.

En auðvitað þora menn ekki að taka slíka ákvörðun. Fjárfestingin í flotanum krefst sífellt meiri veiði og menn munu bara teikna inn nauðsynlegar lóðningar ef með þarf til að leyfa eins mikla hrognatöku og Brynjar og félagar þurfa til að geta borgað af nýju skipunum og tekið sér áfram umtalsverðan arð.

 

Ný aflaregla minnkar afla