RÚV er ekki sameiningartákn

Leigupenninn Guðmundur Andri gagnrýnir gagnrýni án raka. Rithöfundinum lætur betur að nota háfleyg orð en færa efnisleg rök fyrir staðhæfingum sínum. Ekki einu sinni er það rétt í orðavaðlinum, að RÚV sé sameign þjóðarinnar. Það er með það eins og kvótann.

Í 1.gr fiskveiðistjórnarlaga segir, að kvótinn sé sameign þjóðarinnar.

Í 1. málsgrein laga um ríkisútvarpið segir "Ríkisútvarpið er sjálfstætt opinbert hlutafélag í eigu íslenska ríkisins"

Enginn nema Loðvík Sólkonungur hefur haldið því fram að hann sé Ríkið („L'État, c'est moi“), ekki einu sinni Guðmundur Andri! Og þar sem almenningur er ekki ríkið þá á almenningur ekki ríkisútvarpið.

En á nákvæmlega sama hátt og fámenn klíka sölsaði undir sig kvótann þá sölsaði vinstri sinnaða menningarelítan undir sig Ríkisútvarpið og berst gegn öllum breytingum með kjafti og klóm.

Við hvað eru menn svona hræddir? Af hverju forðast menn að horfast í augu við breytta tíma. RÚV er ekki persóna. RÚV er bara fólkið sem vinnur þar hverju sinni. Og því miður þá hafa ör mannaskipti leitt til þess að gæði þess sem RÚV stendur fyrir hefur minnkað. Og þótt mamma Guðmundar Andra hafi verið ein af þeim sem mótaði það ríkisútvarp sem allir vísa til og vilja aftur, þá eru bara aðrir teknir við sem hafa ekki þessa mannkosti sem gömlu útvarpsmennirnir og konurnar höfðu. Þegar menn eru tilbúnir að viðurkenna þessa staðreynd er hægt að ræða málefni R'UV við þetta lið á vitrænan hátt.

Það þýðir ekkert að fara alltaf með sömu möntruna um menningargildi þess liðna þegar þeir sem nú stjórna hafa lægri menningarstandard.  Og það þýðir ekki heldur að tala um allt efnið sem RÚV á og geymir þegar enginn metnaður er hjá dagskrárstjórum til að miðla þessu efni.  Sem dæmi þá hefur Sarpurinn varla verið uppfærður síðastliðið ár.  Hvort sem um er að kenna áhugaleysi eða trassaskap.

Og síðan er full ástæða til að gera athugasemdir við brot dagskrárstjórnar og auglýsingadeildar á heimildum til að selja auglýsingar og kostanir.  Í lögum um þennan svokallaða "fjölmiðil í almannaeigu" er sérstakur kafli sem fjallar um viðskiptaboð.  Þar er sérstaklega bannað að rjúfa venjulega dagskrárliði með auglýsingum. Nema um stórviðburði eða meiriháttar íþróttakappleiki sé. Þá er heimilt að senda viðskiptaboð. En hvað gerir ekki RÚV þegar Útsvar og það sem þeir kalla skemmtiþætti, er á dagskrá?  Jú þeir brjóta þessi fyrirmæli af ásetningi og gera eins mörg hlé og auglýsendur vilja á öllum þáttum með eitthvert áhorf og þeir komast upp með það því það fer enginn eftir lögum á Íslandi.

Og þó það standi skýrt í II kafla laganna að:

• Ríkisútvarpið skal skapa vettvang fyrir aðkomu almennings að stefnumótun fjölmiðlunar í almannaþágu með fyrirkomulagi sem nánar er kveðið á um í samþykktum Ríkisútvarpsins.

Þá er almenningur áhrifalaus. Ef almenningur réði einhverju þá væri löngu búið að aðlaga sjónvarp RÚV að fyrirmynd DR1.  Þar kunna menn að reka almannasjónvarp án auglýsinga. Þar er dagskrá sem hægt er að horfa á allan sólarhringinn og þar finna flestir eitthvað við sitt hæfi og geta treyst að þetta efni er á réttum stað í dagskrá á auglýstum tíma.  Þar er ekki þetta hringl og rugl í dagskrárliðum.

Og ef almenningur fengi einhverju ráðið þá væri íþróttarásin nýtt undir íþróttaefni og auglýsingar.  Og RÚV myndi njóta ágóðans af sölu efnis sem það stendur undir kostnaði af að gera en léti ekki einkafyrirtæki bæði framleiða og dreifa á sölumarkaði.

Um RÚV má segja eins og í Borðsálmi Jónasar:  Það er svo margt ef að er gáð, sem þörf er um að ræða....

Ræðum það sem er að og betur má fara. Þetta snýst ekki um pólitík nema að litlu leyti.

 

Af formannsraunum Bjarna Ben

Hyglir eigin ættliði
Einsa frænd' og pabba
En þegar ógnar þingfriði
þarf að spyrja Dabba

Að velja rétt ráð-herra spil
reyndist þrautin þyngri
Þótt þeir sem tilkall ættu til
teldust á einum fingri

Að sætta ólík sjónarmið
svo allir hlýði
er ekki versta verkefnið
í valdastríði

Nú sneyptir þurfa þingflokksmenn
að þrauka næstu árin
Í beinni sáum Brynjar N
bros' í gegnum tárin

Ég met það ei sem merki um
mannleika og hlýju
Í framan fíluhrukkunum
fjölga mun að nýju

Dómgreindarskertir þingmenn

Nú hefur Vilhjálmur Bjarnason bæzt í ört stækkandi hóp þingmanna og ráðherra, sem opinberar dómgreindarbrest fyrir alþjóð. Í fréttum Stöðvar 2 var vitnað í Vilhjálm þar sem hann sá ekki muninn á pólitískum afskiptum í þágu einkahagsmuna og pólitískum afskiptum til að koma í veg fyrir hagsmunaspillingu.

Vilhjálmur sem á sæti í Efnahags og Viðskiptanefnd vill ekki að alþingismenn skipti sér af vafasamri sölu Landsbankans á eignum bankans. Þótt allir sem þora á annað borð að tjá sig, lýsi yfir furðu með aðferðafræðina.

Ef þessi afstaða Vilhjálms kallar ekki á afsögn þingmannsins úr þessari nefnd þá er það enn eitt dæmið um andverðleikavandamálið sem hrjáir íslenzka stjórnmálastétt. Ef þetta er almennt viðhorf stjórnarsinna í þessari nefnd þá er fundarboðunin á mánudag málamyndagerningur..  Þá grunar menn að um þessa sölu hafi verið vélað á bak við tjöldin og það sé búið að ákveða hverjir fái að kaupa bankana. Alveg eins og þegar síðast var einkavætt með hrikalegum afleiðingum.

 

RÚV er ekki þjóðin

Hér áður fyrr þegar Ríkisútvarpið hét ennþá Ríkisútvarpið og útvarpaði alvöru dagskrá þá voru óskalagaþættirnir meðal vinsælasta útvarpsefnisins. Það átti jafnt við um unga sem gamla. Þessir óskalagaþættir áttu sér ólíka markhópa en allir hlustuðu , bæði ungir sem gamlir, til sjávar og sveita, jafnt sjúklingar sem heilbrigðir. Þá datt engum í hug að skírskota til þjóðarinnar. Þá var bara ein þjóð í landinu. Við öll vorum þjóðin.

Ekki lengur. Nú býr ekki lengur ein þjóð í þessu landi. Hér búa margar þjóðir. Bæði í eiginlegri og óeiginlegri merkingu.

Þessvegna meðal annars er svo mikilvægt að skilgreina hlutverk RÚV upp á nýtt.

Ráðherrar og þingmenn lenda ekki á biðlistum

Þetta fullyrti Ólafur Ólafsson, fyrrum landlæknir til 25 ára. Þýðir lítið fyrir elítuna að ljúga sig út úr því. En þeir munu reyna

RÚV orðið að poppsjónvarpi

Meiri djöfuls lágkúran sem ríkismiðillinn býður uppá.

Óskalög Þjóðarinnar

Stúdio A

Geðveik Jól

og svo er að renna upp söngvakeppnin með öllum sínum endurtekningum og upprifjunum.

Allt efni sem gæti alveg eins tilheyrt útvarpi eins og sjónvarpi. En hvert skyldi áhorfið vera?  Það væri fróðlegt að vita.

Netfrelsi

Níð og róg og neikvæð orð
á netið setur
lastari sem lyklaborð
lamið getur

Misheppnaður símahrekkur

Logi Bergmann er stríðinn með afbrigðum. En nýjasti hrekkurinn missir þó algerlega marks. Því karakterinn Kenneth Máni er ekkert fyndinn. Hann er miklu fremur ósmekklegur. Og ástæðan er sú að það er til fólk eins og karakterinn er að herma eftir. Fólk sem talar samhengislaust og hefur gaman af að hringja í Útvarp Sögu og tala við Pétur Gunnlaugsson.

Því Pétur er mikið ljúfmenni og hann leyfir öllum að tjá sig.  Líka Kenneth Mána.

„Við vildum athuga hvað hann gæti haldið Pétri Gunnlaugssyni lengi á línunni. Hann nær að teygja sig í átta mínútur, sem er ansi vel gert. Og það er ekkert samhengi í því sem hann er að segja, ekkert samhengi.“ Logi hlær þegar hann leggur áherslu á að samhengisleysið í orðum Kenneths Mána og útskýrir nánar:

„Hann talar meðal annars um að fara í fangelsi og borga sína skuld, en þurfa samt að borga skatta þegar hann kemur út. Þetta er auðvitað stórkostleg lína. Hann spurði líka: „Hvar er skjaldborgin?“ og Pétur var alveg með á því.“

Ef tilgangurinn var að hrekkja Pétur og gera gys að honum þá hefur grínið engan hitt fyrir nema gerandann og opinberar fordóma Björns Thors og Loga Bergmanns sem fannst þetta svona fyndið.  Ef þeir 2 myndu hlusta meir á Útvarp Sögu, en minna á síbyljuna á Bylgjunni þá kannski myndu þeir þroskast aðeins.  Ekki vanþörf á fyrir menn sem eru komnir á fertugs og fimmtugsaldurinn.

Hanna Birna fer huldu höfði

Ekki náðist í Hönnu Birnu við ritun færslunnar

Ráðslagið á RÚV

Alltaf kemur eitthvað nýtt í ljós um ráðslagið í ríkisrekstrinum. Við rekum opinbera Veðurstofu með fleiri hundrað starfsmönnum en svo er það einhver verktaki sem hirðir laun fyrir að birta spá ríkisveðurstofunnar í ríkisfjölmiðlinum!

Hvers vegna er ekki einhver vaktmaður á Veðurstofu Íslands látinn segja fréttir af veðri?  Þarna er verið að misfara með fé. Til Veðurstofunnar er ráðstafað tæpum 1500 milljónum á þessu ári. En á móti koma einhverjar sértekjur. En greinilega ekki fyrir þjónustu við RÚV. Þær sértekjur fær einhver annar.

Þarna er bix sem þarf að laga.  Engin ástæða til að kaupa veðurfréttaþjónustu af einkahlutafélagi.  Bendi á að ítarlegar upplýsingar um veður og færð eru sífellt uppfærðar á ótal miðlum á netinu og túlkaðar af reyndum veðurfræðingum eins og Trausta Jónssyni til dæmis.