Varla betri hjólaborg

Klíkan sem ráðið hefur skipulagsmálum Reykjavíkur undanfarin ár með Hjálmar Sveinsson í broddi fylkingar ætlar greinilega að efna til nýrra átaka við borgarbúa og nú með breytingum á Grensásvegi. Og allt í nafni betri hjólreiðasamgangna. Ætla má að þeir sem ráða, noti ekki hjól sem samgöngutæki dags daglega. Því ef tilgangurinn er að gera Reykjavík að betri hjólaborg, þá ráðast menn ekki á gatnakerfið og torvelda umferð bifreiða. Það er alröng aðferð. Miklu nær er að auka öryggi hjólreiðamanna á götum og gangstéttum heldur en að þrengja götur og auka þar með umferðarþungann. Ég hef notað reiðhjól sem aðal samgöngumáta í bráðum 20 ár hér í Reykjavík og ég verð að segja að þeir hundruðir milljóna sem eytt hefur verið í að bæta hjólamenninguna hefur verið eytt í stíga fyrir hjóladólga en ekki fyrir okkur sem notum hjól dags daglega í snatt og útréttingar. Áður en farið verður af stað í þessa vitleysu á Grensásveginum ættu menn kannski að byrja á að spyrja "alvöru" hjólreiðafólk hvað betur mætti fara.

Grensásvegur verði þrengdur

Gálgahraun, Stefán og Hanna Birna

Ég held það væri ekki úr vegi að spyrja nánar útí skyndilega afsögn Stefáns Eiríkssonar úr embætti lögreglustjóra Reykjavíkur. Mér finnst einsýnt að það að var tekið fram fyrir hendurnar á honum í sambandi við harkalegar aðgerðir lögreglunnar gagnvart mótmælunum við Gálgahraun í fyrra. Ég trúi ekki að Stefán hafi fyrirskipað þessa hörku.  Miklu frekar eru þarna að finna fingraför yfirboðara Stefáns, annars vegar ríkislögreglustjóra, hins vegar innanríkisráðherra. En við fáum sennilega aldrei að vita hvernig afskiptum Hönnu Birnu af störfum Stefáns Eiríkssonar var háttað. Stefán mun varla segja frá og þaðan af síður Haraldur eða Hanna Birna. En þessu leikriti verður að fara að ljúka og það er bara einn endir í boði og hann er sá að Hanna Birna hverfi alfarið úr pólitík. Það er ekki nóg að hún hverfi úr ríkisstjórn.

Tryggvi og Hanna Birna boðuð á fund

Ógagnsær ríkisrekstur

Launadeila lækna og ríkisins snýst ekki um krónur og aura.  Hún snýst um pólitík.  Læknar og annað heilbrigðisstarfsfólk lagði á sig mikla vinnu og gekkst undir nánast ómannlegt álag til að halda kerfinu gangandi á tímum niðurskurðar og efnahagsþrenginga.  Þetta gerðu þessar stéttir vegna loforða stjórnmálamanna um leiðréttingu á kjörum og starfsaðstöðu þegar úr rættist.

En núverandi stjórnvöld hafa sýnt hug sinn í verki varðandi forgangsröðun þegar kemur að uppsetningu ríkisreiknings núverandi ríkisstjórnar. Í stað þess að styrkja heilbrigðiskerfið er haldið áfram að höggva í undirstöðurnar bæði af heilbrigðisráðherra en ekki síst fjármálaráðherra.  Þessir 2 ráðherrar ætla greinilega að ganga af samfélagsrekinni heilsugæslu dauðri og þeir ætla ekki að leiðrétta kjör lækna.

Afleiðingin er augljós.  Læknar munu unnvörpum hætta að vinna fyrir ríkið og setja upp einkareknar læknastofur líkt og mörg dæmi er um nú þegar.  En munurinn verður sá að þá verður ekkert val fyrir sjúklinga hvort þeir leita til einkastofa eða heilsugæslulækna.  Því þá verða einfaldlega engar heilsugæslur og engir ríkis-spítalar.

UM þetta snýst þessi kjaradeila.  Og hvað segir landlæknir þá?  Þessi sami landlæknir og horfði upp á Björn Zoega keyra Landsspítalann í þrot.  

Ég held að við þurfum að hugsa þetta upp á nýtt. Fjárlagagerðin í höndum Alþingis er tímaskekkja.  Alþingismenn eiga ekki að útdeila krónum og aurum eða standa í þrefi um meðferð fjármuna við ríkisforstjórana.  Og ríkisforstjórarnir eiga ekki að reka þessar stofnanir á ölmusu frá Alþingi. Alþingi gæti hins vegar sett ramma um starfsmannafjölda sem ríkið hefði efni á að borga laun og sjá til þess að launareikningurinn sé að fullu efndur en ekki tíðkað að fresta greiðslum í lífeyrissjóði og þar með búinn til sveigjanleiki til að fjölga stöðugt stöðugildum.

Ef við þurfum 1 lækni á hverja 5 þúsund íbúa sem dæmi þá verður bara svo að vera og ríkið greiðir bara þann launakostnað án ágreinings.  Eða af hverju skyldu lögfræðingar og allir sérfræðingarnir í þjónustu ríkisins geta ákveðið sína gjaldskrá en ekki mikilvægustu starfsmennirnir sem eru læknarnir og sérfræðingarnir á spítölunum og rannsóknarstofunum.

Hér þarf að skera niður óþarfa stoðrekstur á vegum ríkis og sveitarfélaga og einbeita sér að grunnþjónustunni. Aftur..

Milljarðslækkun ekki rædd

Byggðastefna sunnanmanna

Það var skynsamlegt að fækka lögsagnarumdæmum og þar með sýslumönnum.  En þar með var skynsemin á enda því menn að sunnan skilja ekki þær takmarkanir, sem vestfirsku fjöllin setja íbúum sínum. Allir sem einhvern tíma hafa búið á Vestfjörðum vita að Suðurfirðirnir, þ.e byggðin við Arnarfjörð og Barðastrandarsýslurnar eru ekki í vegasambandi við Norður-Ísafjarðarsýslu nema 7-8 mánuði á ári. Þess vegna er óskiljanlegt af embættismönnum fyrir sunnan að staðsetja þjónustustofnanir á sviði löggæslu og heilbrigðismála á suður svæðinu.  Þetta þýðir í raun mikinn kostnað og óþægindi fyrir meirihluta íbúa svæðisins sem búa á norður svæðinu. 

Ef takast á að halda Vestfjörðum í byggð þá má ekki skerða þjónustuna eins og nú eru áform uppi varðandi sameiningu heilsugæslu og löggæslu og staðsetja stofnanirnar á fámennara svæðinu.

Suðursvæði Vestfjarða ætti frekar að tilheyra þéttbýlinu við Breiðafjörð heldur en Vestfjörðum sem sérstökum landshluta. Enda eru samgöngur um Breiðafjörð tiltölulega öruggar með nýrri og fullkomnari Breiðafjarðarferju. 

Því ættu lánlausir ráðherrar í ríkisstjórn hinna ríku, að hlusta nú einu sinni á heimamenn og gera ekki kerfisbreytingar sem gætu haft óafturkræfar búsetubreytingar í för með sér.

Til að fólk vilji búa út á landi þarf gott aðgengi að grunnþjónustu. Læknis og löggæsla falla undir þá þjónustu.  Svo og skólar sem því miður er verið að rústa af þriðja ráðherra þessa ömurlega stjórnmálaafls sem Sjálfstæðisflokkurinn er orðinn í skugga Davíðs og Hannesar Hólmsteins.

Hefði þetta verið gert ef Elliði Vignisson væri bæjarstjóri á Ísafirði?

 

Óskynsamleg ákvörðun innanríkisráðuneytisins

Er Grandi að bræða síldina?

Bloggfærsla Faxagengisins vakti athygli mína vegna þess að ég fæ ekki betur séð en verið sé að fara illa með afla.  Faxinn og Lundey eru bæði gömul skip og ekki útbúin fullkomnum kælitönkum eins og nýju skipin.  Samt eru þau látin moka upp miklum afla sem síðan er siglt með austur á Vopnafjörð þar sem Grandi er með bræðsluverksmiðju og fullvinnslulínu.  Hvað mikið af afla þessara skipa fer í bræðslu?

Þetta er birtingarmynd þeirrar "hagræðingar" sem svo mikið er dásömuð af eigendum kvótans og leigupennum þeirra. Fá og stór skip veiða 95% af takmörkuðum kvóta og vegna fjarlægðar verksmiðjanna frá veiðisvæðinu þá næst ekki besta nýting á hráefninu. Mest af síldinni er nú unnin fyrir austan en veidd útaf Breiðafirði. Sigling austur á Vopnafjörð, Norðfjörð og Hornafjörð tekur sennilega 30-40 klst og síðan getur bætzt við löndunarbið.  Þetta finnst sjávarútvegsráðherra ekkert tiltökumál.

Og sjómenn þegja þunnu hljóði!  Hvers vegna er ekki búið að breyta kerfinu þannig að útvegurinn veiti fleirum atvinnu og við náum að hámarka verðmæti aflans?  Auðvitað á að byggja verksmiðju við Breiðafjörð og láta heimamenn veiða til manneldis.  Með réttum útbúnaði geta smábátar vel komið með úrvalshráefni í land.  Það hefur tekist að tæknivæða makrílveiðar smábáta og á sama hátt verður hægt að tæknivæða síldveiðar þeirra en forsendan er náttúrulega að þeir fái að veiða!

En kannski er of seint í rassinn gripið.  Síðustu ár hefur obbinn af síldarstofninum nefnilega annað hvort orðið sjálfdauður í síldargildru Vegagerðarinnar í Kollafirði eða étinn upp af hvölum inná Breiðafirði. En með það er farið eins og mannsmorð.

 

Ekkert breytzt hjá RÚV!

Ég er einn af þeim sem vænti mikils af nýjum útvarpsstjóra. Þær væntingar hafa ekki gengið eftir nema síður sé.  Breytingarnar í yfirstjórninni virðast ekki hafa haft neitt með breyttar áherzlur í rekstri stofnunarinnar að gera.  Aðeins verið að styrkja tengslanet Magnúsar innan stofnunarinnar. 

• Hjá fréttastofu RÚV eru sömu efnistök og þegar Óðinn var fréttastjóri. Engar breytingar þar.
• Vefurinn er sízt betri og engar uppfærslur hjá Podcastinu í langan tíma
• Dagskrá Sjónvarpsins hefur ekkert breytzt (enda sami aulinn þar við völd)
• Hætt hefur verið stuðningi við RÚV appið
• Stofnunin er enn jafn sjálfmiðuð og áður! (nægir að vísa á vetrardagskrárkynninguna þar sem sjálfshólinu linnir ekki)

Hægt er að nefna margt annað.  Svo sem poppvæðingu Kastljóssins og fyrirhugaða endurvæðingu RÚV-AK.  Ef Magnús Geir ætlar ekki að gera neinar breytingar á efnistökum RÚV þá ætti hann að segja upp hið fyrsta. Hagræðing í rekstri og útleiga á skrifstofum hefur ekkert með fjölmiðlun að gera.  Hann má hafa verið góður rekstrarmaður í leikhúsi en það er bara ekki það sem þarf.  Sérstaklega ekki núna þegar vegið er að frjálsri fjölmiðlun og valdablokkir eru að eflast sem vilja stjórna miðlun upplýsinga.

Til hvers er RÚV að gera poppmenningu svona hátt undir höfði á kostnað þjóðmenningar?  Getur Magnús svarað því?  Hvers vegna þarf 3 umsjónarmenn í þátt sem heitir Poppland og er á Rás 2 og hvað kostar það?  Sjónvarpsfólk á DR1 segir oft; "Danmark er dejlig" en þulan hjá RÚV segir bara "RÚV-Annað og meira"!!  Alveg eins og áður.  Því þar hefur ekkert breytzt með nýjum stjóra.

 

Frjálshyggjubullukollur

Það sem Sigurði Kára mistókst árið 2008 vill nú Vilhjálmur Árnason freista að ná í gegn á næsta þingi.  Þar er átt við afnám á einkasöluleyfi ÁTVR.  Vilhjálmur gengur þar erinda stórkaupmanna  sem eru áberandi í eigendafélagi Sjálfstæðisflokksins.  Því sjálfur er hann bindindismaður og hefur því engra hagsmuna að gæta.  Svona hafa þingmenn Sjálfstæðisflokksins látið nota sig í hagsmunagæslu fyrir þá sem fjármagna flokksstarfið og er þetta ekkert tiltökumál og varla til að agnúast útí ef ekki hefði verið sagt frá öðru þingmáli sem téður Vilhjálmur hyggst leggja fram á næsta þingi.  En það þingmál er í algjörri andstöðu við hið fyrra.  Fyrst vill Vilhjálmur stuðla að aukinni áfengisneyzlu og síðan boðar hann hert viðurlög við heimilisofbeldi sem er óhjákvæmileg afleiðing áfengisneyzlunnar sem Vilhjálmi finnst hið bezta mál.

Annað hvort vilja menn hafa vit fyrir öðrum eða fylgjandi frelsi.  Að vera bæði er dæmi um ósamkvæmni sem ekki er sæmandi hjá kjörnum fulltrúa á löggjafarþingi Íslendinga.

Sigurður Ingi og sjóræningjarnir

Athygli vakti í liðinni viku að færeyska makrílveiðiskipið Næraberg fékk heldur kuldalegar móttökur hjá íslenzkum yfirvöldum, þegar það leitaði hér hafnar vegna bilunar í aðalvél. Ætla má að tilskipunin hafi komið úr ráðuneytinu og þá frá mönnum með takmarkaða lögfræðiþekkingu og enn minni söguþekkingu.

Því lögin sem ráðherrann vísaði í voru sett til höfuðs þeim útgerðum sem stunduðu "sjóræningjaveiðar" á djúpkarfa suður á Reykjaneshrygg.  En í dag eru það Íslendingar sjálfir, sem stunda sjóræningjaveiðar úr makrílstofninum. Þar sem Sigurður Ingi klúðraði samningsviðræðum eins og frægt er með því að halda til streytu hagsmunum tveggja útgerða sem ætluðu að veiða í Grænlensku lögsögunni.

Þess vegna er skondið að heyra ráðherrann tala svona digurbarkalega um að fylgja lögum og reglu gagnvart færeyska fjölveiðiskipinu Nærabergi, þegar staðreyndin er sú að íslenzku skipin eru hinir eiginlegu lögbrjótar og ættu enga þjónustu að fá í íslenzkum höfnum á meðan Íslendingar eru ekki aðilar að makrílskiptasamningi Norðmanna og ESB. Við getum ekki hagað okkur eins og sjóræningjar þótt í eigin lögsögu séum á meðan við tökum þátt í fiskveiðisamstarfi á Norður-Atlantshafi á öllum öðrum flökkustofnum nema makríl.

Svona er hægt að snúa hlutunum á hvolf þegar menn þurfa að réttlæta eigin rangindi. Og menn komast upp með það því fjölmiðlunin snýst ekki um að upplýsa.  Hún snýst um eitthvað allt annað.

Rangt hjá Vilhjálmi Bjarnasyni

Þeir sem voru stórtækastir við að ná til sín fjármunum Sparisjóðanna voru Existabræðurnir Lýður og Ágúst Guðmundsssynir.  Og þeir eru sko engir fjandans slátrarar heldur stórþjófar á alþjóðavísu. Enda annar þegar hlotið fangelsisdóm og hinn sjálfsagt jafn sekur þótt ekki hafi komist undir manna hendur ...enn.

En eftir því sem tíminn líður þeim mun ljósara verður að fjármálahrunið á Íslandi var þaulskipulögð flétta þar sem öllum brögðum var beitt til að stela öllu steini léttara úr öllum baukum á íslandi.  Og enn eru menn að.  Stjórnendur endurreistra fyrirtækja stíga aftur trylltan dans í boði lífeyrisfurstanna og stjórnmálamenn hafa ekkert lært og vilja ekki einu sinni ræða hvað fór úrskeiðis.  5 tímar til að ræða sparisjóðaskýrsluna er móðgun við þá sem greiða þessar 600 milljónir sem kostaði að setja hana saman.

Skrefi nær samruna RÚV og Þjóðleikhússins

Með ráðningu leikhúsmannsins Magnúsar Þórðar í stöðu útvarpsstjóra aukast líkur á meira samstarfi leikhúss og útvarps.  Nú þarf bara að koma útvarpsmanni að í Þjóðleikhúsinu þegar Tinna hættir og þá verður hægt að renna þessum 2 ríkisstofnunum saman í eina öfluga menningarmiðlun. Samlegðaráhrif stjórnunar og starfsmanna eru augljós og eins mun stoðþjónusta allskonar nýtast betur í sameiginlegri stofnun en ef stofnanirnar eru 2. Leikmunadeild, förðunardeild, hljóðdeild og búningadeild og svo náttúrulega hin lifandi framsetning efnis. Enda eru menntaðir leikarar besta útvarpsfólkið og hægt að bjóða góðu fólki meira starfsöryggi í sameinaðri stofnun en nú er hægt að gera og margoft hefur komið upp á á undanförnum árum þar sem fagfólki er sagt upp og afleiðingarnar alltaf bitnað á fagmennskunni bæði í útvarpi og leikhúsinu. Enda hefur orðið greinilegur atgervisflótti úr Þjóðleikhúsinu á síðustu árum undir stjórn Tinnu Gunnlaugsdóttur. Margir tala um leikhús þjóðarinnar sem fjölskyldufyrirtæki hennar og fjölskyldu Arnars Jónssonar. Ég tek ekki afstöðu til þess en hitt er staðreynd að allir okkar beztu leikarar eru ekki fastráðnir í Þjóðleikhúsinu.  Þessu er vel hægt að breyta með samruna Þjóðleikhússins og Ríkiútvarpsins. Þar sem tekist yrði á við breytta tíma með fjármagni RUV og mannauði leikhússins.  Það getur ekki klikkað.  Vonandi grípa menn þessa hugmynd á lofti áður en ákvarðanir verða teknar um sölu útvarpshússins. Því húsnæði Þjóðleikhússins er líka óhentugt og stenst ekki nútímakröfur.  Þess vegna er lag að hugsa þetta allt upp á nýtt núna.