Af hverju er Hafró ekki sjálfbær?

Umræðan um fjárhagsvanda Hafrannsóknarstofnunar er bæði kostuleg og komísk. Ef vel væri að málum staðið og hægt væri að treysta faglegum vinnubrögðum þessarar mikilvægu stofnunar þá væru henni tryggðir nauðsynlegir tekjustofnar þannig að reksturinn væri sjálf bær og hægt væri að efla rannsóknarstarf til muna.  Ekki veitir af.  Þetta er auðvelt að gera með því að heimila skipum stofnunarinnar frjálsar veiðar til að standa undir rekstrinum.

En það þarf að byrja á að endurskilgreina hlutverk stofnunarinnar og færa stjórnunina frá hagsmunaaðilum og stjórnmálamönnum  yfir til óháðra akademískra aðila.  Núverandi fyrirkomulag er í einu orði sagt spillt!  Hafrannsóknarstofnunin hefur um langt árabil verið misnotuð af stjórnmálamönnum og hagsmunaöflum í greininni til að falsa vísindalegar aðferðir í nafni sjálfbærni. Afleiðingin hefur verið röng veiðiráðgjöf sem hefur haft það að markmiði að viðhalda einokunarstöðu örfárra útvalinna kvótagreifa.  Enda hafa þessir menn stjórnað stofnuninni undanfarin 20 ár í gegnum lepp sinn, Jóhann Sigurjónsson, "hvalasérfræðing"!!!

En til þess að breyta þessu og hámarka afrakstursgetu fiskstofnanna við Ísland þarf að brjóta á bak aftur spillt kerfi hagsmunaaðila og flokkakerfisins og þar stendur hnífurinn í kúnni.  Stjórnmálamenn hafa nefnilega búið til kerfi sem tryggir þeim völd og það kerfi heitir fjárveitingavald Alþingis.  Þar sitja fulltrúar allra flokka og véla um lífsafkomu allra landsmanna og vei þeim sem standa uppi í hárinu á kerfinu og fjárveitingavaldinu!

Afleiðingin er höft og einokun, skömmtun og kvótasetning alls konar takmarkaðra og ótakmarkaðra gæða.Og þeir sem vilja halda sinni vinnu gjöra svo vel og hafa sig hæga og rugga ekki bátnum.  Þess vegna þorir enginn að mótmæla spillingunni þó hún blasi við öllum.  Sjómenn létu örfáa stjórnmálamenn troða í gegn lögleiðingu kvótakerfis á öllum fisktegundum þvert á vísindalega nauðsyn og gegn almennri skynsemi sem varaði við skelfilegri sóun sem af þessu myndi hljótast.  Á það var ekki hlustað og nú stöndum við frammi fyrir raunverulegum vanda vegna allt of mikillar friðunar smáfisks og fiskveiðistjórnunarkerfis sem stjórnar því hvað er hirt og hverju er hent.  

En á þessa gagnrýni er ekki hlustað vegna þess að HAFRANNSÓKNARSTOFNUNIN GEFUR RANGRI VEIÐIRÁÐGJÖF VÍSINDALEGAN STIMPIL OG ÞAÐ ER ÞAÐ SEM GILDIR.

En vísindalega nálgunin er samt ekki meiri en það að aflareglan sem öll veiðiráðgjöfin byggir á er algert hugarfóstur sem engin vísindarannsókn styður.  þessi aflaregla er svo arfavitlaus að það er ekki einu sinni hægt að sanna hana sem vitræna kenningu.  Þetta er bara sett fram af reiknimeisturum Hafró sem aðferð til að úthluta kvóta.  Manna sem þykjast geta talið fiskana í sjónum, þar sem byggt er á 2 leiðöngrum á ári!  Vor og haustralli. 2 nokkurra vikna leiðangrar finnst þeim nóg til að reikna út allt sem máli skiptir til að veita "vísindalega" veiðiráðgjöf.

Þetta er svo arfavitlaust að ef þetta væri ekki grafalvarlegt þá myndi ég bara hlæja að þessu öllu saman og afgreiða það sem hvert annað rugl.  Rugl sem pólitíkin og flokkakerfið bera ábyrgð á.  Eins og Landeyjarhöfn.  Eins og þverun Kolgrafarfjarðar og manngerðu síldargildruna þar.  Eins og veiðigjaldaruglið og byggðakvótann.

En þetta er bara svo miklu stærra og varðar mannorð okkar sem fiskveiðiþjóðar að endurreisa hér virðingu haf og fiskirannsókna.  Og meðan menn þrátta um sameiningu háskóla þá eigum við engan alvöru sjávarútvegsháskóla!!!  Skítur það ekki skökku við?

Gerum Háskólann á Akureyri að Sjávarútvegsháskóla og færum Hafrannsóknarstofnun undir hann.   Tökum kaleik veiðiráðgjafar frá vísindamönnum og afhendum hann aftur kjörnum fulltrúum sem eiga að bera ábyrgðina þegar illa tekst til eins og hefur gerst í núverandi kerfi.  kerfi sem hefur grundvallast á reiknivillum en ekki vísindalegri niðurstöðu ítarlegra rannsókna.

Aflaheimildir greiða kostnað