Einn er blindur hinir bara heimskir

Helgi Hjörvar á sér afsökun því hann er blindur en Lilja Rafney og hinir þingmennirnir eiga sér enga slíka afsökun.  80% þjóðarinnar vilja ekki leyfa framsal kvóta og vilja að réttlátur arður renni í ríkissjóð vegna gífurlegs hagnaðar útgerðarinnar í kjölfar gengishruns krónunnar. Vandamálið er bara að menn koma sér ekki saman um eina sameiginlega lausn sem hægt væri að bera undir atkvæði landsmanna í þjóðaratkvæðagreiðslu.

Þær leiðir sem þingmenn hafa viðrað  eru fólgnar í annars vegar föstu gjaldi en hins vegar skattlagningu hagnaðar.  Þessi gjöld hafa ekki skilað sanngjörnum arði.

Og allt tal stjórnarandstöðu um uppboðsmarkað fyrir aflaheimildir lýsa mikilli vanþekkingu á því kerfi sem þeir þó sjálfir bera alla ábyrgð á að hafa skapað og viðhaldið í 30 ár.  Með uppboðsmarkaði fyrir aflaheimildir gerist tvennt.

• Eignaréttur myndast á óveiddum kvóta
• Þeir ríku eignast allan kvótann og þeir veikari fá ekkert. Einyrkjar eiga ekki séns í slíku kerfi.

Auðlindaskattlagning hefur verið rædd en gengur ekki upp í praxis. Þá er bara eitt til ráða sem er innheimta hráefnisgjalds. Lausn sem ég hef lengi talað fyrir en fáir virðast skilja eða þá bara að ég er ekki rétti maðurinn til að eigna svo frábæra lausn.  Það hefur lengi háð pólitíkinni að lausnir verða að koma frá réttu aðilunum til að vera þingtækar.

Ef menn taka sig nú saman og viðurkenna að stríðið gegn útgerðinni og LÍÚ er ekki háð í nafni þjóðarinnar þá fyrst er hægt að ræða um sameiginlega lausn á þessu ágreiningsefni sem felst í framsali kvóta og braski með aflaheimildir.

Mjög hóflegt hráefnisgjald gæti skilað ríkissjóði 30 milljörðum á ári miðað við núverandi aflaheimildir. Er það ekki þess virði að hætta þessu stríði og semja frið gegn því gjaldi?

 

Vilja makríllinn á uppboð

Svo koma 4 mögur ár.....

Er lægðin yfir landinu
lyfti sér um millibör
Þeir sem stóðu að strandinu
stýra vilja okkar för

Meðal þeirra megum sjá
minni spámenn standa
þurfalinginn Þorstein Má
og þann sem stjórnar Granda 

Sigmundur með maðkað mél
munstrað áhöfn getur
Ásmund setur oní vél
á útkíkkið hann Pétur

Með Bjarna aðeins eiga sess
Illugi og Stjáni
Og vara Hanna vegna þess
að varla er hann bjáni

Ekki fleiri nefna nöfn
nenni ég að sinni
enda fleyið enn í höfn
útaf áhöfninni

 

 

Egils saknað

Egill greyið bitlaus, ber
bókum yfir hengur.
Spegill þjóðar ekki er
Efstaleitis lengur

Glöggir menn sjá að þetta eru sléttubönd því snúið við hljómar vísan:

Lengur Efstaleitis er
ekki þjóðar spegill
Hengur yfir bókum ber
bitlaus greyið Egill

Klámið heldur áfram á RÚV

Heyrði umræður á Útvarpi Sögu í morgun og þar var mörgum mikið niðri fyrir vegna óviðeigandi umfjöllunar um dauða Hermanns Gunnarssonar í Kastljósi í gærkvöldi.  Sjálfur er ég hættur að horfa á þessa sjónvarpsstöð vegna tilfinningakláms og annars kláms sem þar ríður húsum.  Slepjan lekur þar af hverjum þætti og engu skeytt um hvort efni höfðar til breiðs hóps eða þröngs.  Ef tilgangurinn er að auka á óvinsældir þessarar stofnunar allra starfsmanna þá er það að virka vel.  Fleiri og fleiri sjá ekki tilgang í að horfa eða hlusta  en það skiptir engu máli því þeir sjá sjálfir um áhorfs og hlustunarmælingar og hagræða þeim tölum eftir hentugleikum þegar auglýsingarými er selt hæstbjóðanda af samtengdri auglýsinga og dagskrárdeild. Heppnir að nýr menntamálaráðherra staðfesti ekki lög sem tóku á auglýsingaharkinu.  Nú geta þeir áfram sýnt auglýsingar á hærra verði eftir að dagskrárliður hefur verið kynntur. Nokkuð sem hvergi tíðkast í skylduáskrift nema í boði spilltra stjórnmálamanna og hrokafullra embættismanna.

Undirlægjuháttur Þorsteins Pálssonar

Sakna sumir ESB
sem sinnar heimasætu
Og bukta myndu búk og hné
bara ef þeir gætu

blogg Gunnars Braga

Karl Th. og trukkalessan

Höfundinum ei til hróss
að hafa birt á Pressunni
meinsemi gegn "móður ljóss"
en mælt með trukkalessunni

 

Ásmundur Einar

Til að kaffæra kjaftanna vaðal
kominn er maður sem kann
Ásmundur orðinn er aðal
nú aðstoðar Sigmundur hann

Ásmundur: Tel mig hafa tíma

Kveðið við Sæma

Hér er meiningin að safna saman tækifærisvísum sem birtust fyrst sem athugasemdir annars staðar. Nú sem fyrr verða bloggin hans Sæma oft að yrkisefni því kallinn kann að stuðla óbundið mál.

Um Kára Stefáns, kulda og fleira

DeCode Kári rífur kjaft
hvorfið jarðarmenið
Ef'ann hefði bara haft
heiðarleikagenið

Komin er nú kuldatíð
krapaél og bloti
Upp að stytti eftir bíð
og að þessu sloti

Handprjónaða húfu loks
og hanska á sig setur
Leynda kima Kópavogs
kanna vill hann betur

Um svefnlyf, skák og Steina Briem

Þegar Sæmi er syfjaður
og sofið ekki getur
Hann leikur skákir lyfjaður
það lætur honum betur

Er rakstu burtu Steina Bríem
sem breytti reglum Braga
Á Ómars bloggi eins og lím
er hann alla daga

Sæmundur setur öll sín blogg upp í Word og afritar svo inn í textagluggann, þetta tekur tíma en aðferðin gerir bloggið hans sérstakt og ólíkt öðrum

Að ýmsu leyti brauztu blað
þinn bloggið tekur tíma
Alla daga ertu að
afrita og líma

Um Elínu Hirst og bloggfærslu Björns Vals

Alltaf Sæmi æðrulaus
eins og sézt hér
Þjóðrembu á þingið kaus
Það var sagt mér

Jóhannes Laxdal Baldvinsson, 13.10.2013 kl. 08:53

Laxdalinn löngum slyngur
lætur sem þjóðremba sé
að kjósa sem kommalingur
kvenmanninn pírata fé.

Óvandað svar við óvandaðri vísu.

Sæmundur Bjarnason, 13.10.2013 kl. 13:51

Vísnagerð nú vanda skal
og vega engan annan fyrst
ég berjast vil með Birni Val
gegn bófaflokki Ellu Hirst

Jóhannes Laxdal Baldvinsson, 13.10.2013 kl. 16:45

Vegandann ég víst hef misst

vandi er að ríma.

Björninn Val ég vil samt fyrst

við þig láta glíma.

;)

Sæmundur Bjarnason, 13.10.2013 kl. 20:22

Um bruna og fötluð stæði

Bernsku sinnar haga. Hann
hylja kann
Engu frá að segja fann,
fyrr en brann

--------------

Ef engan fyndi stoppi stað
í stæði fatlað legði
Og kæmist eflaust upp með það
ef enginn frá því segði

Keppni í gáfum

Útsvarið í sjónvarpinu var vel heppnuð fjölskylduskemmtun á meðan Ólafur B. Guðnason sá um að semja spurningarnar. En þetta nýja snið og nýji dómarinn hefur breytt þessum þætti í harðsvíraða keppni í gáfum þar sem dómarinn keppir við alla hina, bæði liðin og stjórnendur þáttarins, í gáfum og fer alltaf með sigur. Þetta er ömurleg  breyting og full ástæða fyrir RÚV að skipta þessu spurningaljóni út.  Útsvar á ekki að vera keppni í gáfum og þáttakendur eiga ekki að þurfa að standa á gati fyrir framan alþjóð vegna kvikindisskapar dómarans.  Stefán Pálsson er búinn að vera of lengi í þessu hlutverki.  Hann er farinn að keppa við sjálfan sig og keppendur útsvars hafa ekki séns.

Pólitík er ígildi holdsveiki

Menn (konur eru líka menn) sem hafa afskipti af pólitík á Íslandi eru ekki öfundsverðir.  Yfirleitt er þetta fólk útskúfað úr þjóðfélaginu og litið hornauga hvar sem það fer og þegar því er hafnað fær það oft ekki störf við sitt hæfi.  Þessu er hægt að breyta með því að breyta flokkunum.  Henda út flokkseigendaklíkunum og auka lýðræðið innan flokkanna.  Pólitík á að vera hugsjónastarf byggt á þjónustu en ekki eiginhagsmunapoti. Það þarf að auka gegnsæi og upplýsingaflæði og láta fólki finnast það skipta máli.  Þetta er svo einfalt en samt svo flókið vegna þess að eiginhagsmunaklíkurnar sem eru búnar að sölsa undir sig Ísland vilja ekki sleppa tökunum.  Það eru þær sem gera pólitíkina holdsveika.

Ólína Þorvarðardóttir fær ekki starf við sitt hæfi vegna þess að hún er pólitískt brennimerkt. Hún hafði tækifæri til að breyta pólitíkinni en í staðinn breytti pólitíkin henni. 

Er eðlilegt að eina leiðin útúr pólitíkinni sé í gegnum pólitískar stöðuveitingar?  Mér finnst það ekki.

Þessu þarf að breyta. Hreinsum hina holdsveiku!