149. löggjafarþing 2018–2019. Þingskjal 976, 579. mál.

Miðjan vekur athygli á mörgum málum, sem annars myndu fara framhjá fólki eins og mér.  Það nýjasta er frumvarp Unnar Brár og þriggja samflokksmanna hennar, um aukið frelsi í sölu á ólyfseðilsskyldum verkjalyfjum í almennum verslunum.  Í greinagerð með frumvarpinu er sérstaklega talað um að hægt verði að kaupa paracetamol verkjalyfið utan apóteka! 

Hvað er að Sjálfstæðisflokknum? Hvers vegna þessi ofuráhersla á fullt og ótakmarkað aðgengi að brennivíni og nú lyfjum? Hvers vegna að breyta því sem er í lagi og virkar vel?

Eitt af því sem fíklar misnota er einmitt verkjalyfið Panodíl.  Eru viðkomandi alþingismenn að misnota stöðu sína til að gera slíku fólki auðveldara með að nálgast þessi lyf eða eru þetta síðustu andvörp frjálshyggjunnar í flokknum áður en Viðreisnararmurinn gerir uppreisn á næsta landsfundi?

Alla vegana lýsir þessi málatilbúnaður einhverri þráhyggju sem ég skil ekki. En þó ég hafi zero tolerance fyrir svona rugli þá er ég með snjalla lausn. Við leysum bæði þetta mál og brennivínsmálið, með því einfaldlega, að leyfa sölu á ólyfseðilsskyldum lyfjum í útibúum áfengisverzlunar Ríkisins,  sem heitir víst núna bara Vínbúðin, en gæti allt eins heitið Brennivín og dóp ehf. 

Orkulöggjöf ESB og Ísland

Sá hluti orkulöggjafar ESB, sem við nú þegar höfum innleitt hefur ekki verið til góðs. Þetta rugl með að hver sem er geti virkjað og framleitt raforku, sem Landsnet er skuldbundið til að taka við inn á dreifikerfi landsnetsins, virkjunaraðilum að kostnaðarlausu, hefur leitt af sér mikla óafturkræfa umhverfiseyðileggingu og í dag eru margar smáar virkjanir í byggingu eða á teikniborðinu beinlínis vegna innleiðingar okkar á orkupökkum 1 og 2.  Einkavæðing HS Orku er afleiðing þessarar orkustefnu og hin misheppnaða einkavæðing á Orkuveitunni sömuleiðis.

Ríkisstjórnin kynnti drög að orkustefnu á síðasta hausti. Ekki veit ég hverjir skiluðu inn álitum, en þeir voru ekki margir. En í dag er engin orkustefna í gildi og þess vegna er staðfesting á orkupakka 3 frá ESB, sem endanlega gefur frá okkur yfirráð yfir eigin orkumálum, alls ekki tímabær og í raun ómöguleg.  Og Sjálfstæðisflokkurinn ætti að skilja og virða þann pólitíska ómöguleika en ekki að tala út og suður eins og ráðherrarnir hafa gert. Hér þarf að taka af skarið og sýna pólitískt hugrekki. Þrátt fyrir hýenurnar á þingi sem vilja þessa innleiðingu án þess að gera sér grein fyrir afleiðingunum. En hver tekur mark á Samfylkingu eða Viðreisn! Ekki þeir sem styðja fullveldi landsins. Svo mikið er víst.

Ég er þeirrar skoðunar að við eigum að vinda ofan af innleiðingu orkulöggjafar ESB í íslenzkri löggjöf. EES samningurinn átti upprunalega aðeins að snúast um F-in fjögur. Orkan og landbúnaður og sjávarútvegur voru undanskilin í EES samningnum. Nú eru síðustu forvöð að stíga á bremsuna gagnvart þessari hljóðlegu innlimun í ESB sem við erum að verða vitni að.

Ef ríkisstjórn og Alþingi ráða ekki við þetta mál, þá skulu þeir leyfa þjóðinni að segja sitt álit í bindandi þjóðaratkvæðagreiðslu. Ef orkupakki 3 verður staðfestur að hluta eða öllu leyti eru það slík svik við sjálfstæði landsins að jaðrar við landráðum.  Vill Alþingi taka áhættuna af þeirri reiði, sem innleiðing orkustefnunnar, til viðbótar við innleiðingar, sem stefna landbúnaði í hættu, gætu haft í för með sér?

Klárið vinnu við Orkustefnu og endurskoðið lög um rammaáætlun og virkjunarstefnu. Það er sú vinna sem ætlast er til af ykkur Alþingismönnum, að vera að ræða og komast að samkomulagi um. Ekki að hleypa íslenzkum landráðamönnum í orkuauðlindina til að leggja sæstreng til Evrópu.  Ef áhugi er fyrir því,  að byggja upp léttan umhverfisvænan iðnað, sem notar endurnýjanlega orku, þá skal það gert hér á landi. Ekki í Bretlandi eða meginlandi Evrópu.

Von á orkupakkanum innan 10 daga

Kjarasamningar eru mjög einfaldir á Excel-öld

Aðalsamningamaður SA kemur ekki svo í viðtöl hjá fjölmiðlum, að hann ýkji ekki umfang starfsins sem skýringu á eigin vangetu eða umboðsleysi öllu heldur.  Kjarasamningar eru í dag einfaldar exceltöflur. Þegar breytingar eru gerðar þarf bara að setja inn eina tölu og Voilá! allt skjalið uppfærist samkvæmt formúlunni á sekúndubroti.

Þessir samningar snúast ekki um að búa til nýtt excel skjal.  Þessi vinna ef vinnu skyldi kalla, snýst um kaffidrykkju og störukeppni. Það er baklandið í SA, sem vill ekki láta Eflingu kúga sig.

Því hefur þú þá svikið mig?

Úr Mósebók

En Laban átti tvær dætur. Hét hin eldri Lea, en Rakel hin yngri. 
Og Lea var daufeygð, en Rakel var bæði vel vaxin og fríð sýnum. 
Og Jakob elskaði Rakel og sagði: "Ég vil þjóna þér í sjö ár fyrir Rakel, yngri dóttur þína." 
Laban svaraði: "Betra er að ég gefi þér hana en að ég gefi hana öðrum manni. Ver þú kyrr hjá mér." 
Síðan vann Jakob fyrir Rakel í sjö ár, og þótti honum sem fáir dagar væru, sakir ástar þeirrar, er hann bar til hennar. 
Og Jakob sagði við Laban: "Fá mér nú konu mína, því að minn ákveðni tími er liðinn, að ég megi ganga inn til hennar." 
Þá bauð Laban til sín öllum mönnum í þeim stað og hélt veislu. 
En um kveldið tók hann Leu dóttur sína og leiddi hana inn til hans, og hann gekk í sæng með henni. 
Og Laban fékk henni Silpu ambátt sína, að hún væri þerna Leu dóttur hans. 
En um morguninn, sjá, þá var það Lea. Og hann sagði við Laban: "Hví hefir þú gjört mér þetta? Hefi ég ekki unnið hjá þér fyrir Rakel? Hví hefir þú þá svikið mig?" 

Skrifborðsstarf en ekki kjarabarátta

Frammistaða SGS er til skammar fyrir verkalýðsfélögin, sem að því standa. Sá væntanlegi árangur sem mun verða þvingaður fram í kjaradeilu ASÍ og SA, verður vegna baráttu Eflingar og VR.  SGS munu svo ganga inní þá samninga en áður verða félögin að punga út með milljónagreiðslur til starfsmanna og samninganefnda, sem hafa ekkert gert og engum árangri náð, meðan Efling hefur látið til sín taka og VR fylgt fast á eftir.  Eru félagsmenn SGS virkilega að sætta sig við svona frammistöðu?  Hvar er stéttarfélagsandinn?

Aðgerðahópurinn fundar í dag

Ný kennitala - sama okrið

Almenna Leigufélagið komst í fréttir fyrir skömmu vegna áforma um svívirðilegar hækkanir á leigutekjum. Nú er komið nýtt nafn og ný kennitala en sama græðgin.

Hvernig má það vera að það sé flokkað sem óhagnaðardrifið leigufélag, þegar félag á ekkert eigið fé, kaupir íbúðir á 100% lánum og lætur leigjendur greiða fjármagnskostnaðinn í botn á meðan eignamyndunin rennur 100% í vasa eigendanna?  Svona er viðskiptamódel Leiguvalla og Alma.  

Hjá Alma er hægt að leigja 3 herb. íbúð á Hverfisgötu fyrir 270 þúsund á mánuði. Svona íbúð fæst keypt á 60 milljón krónur. Fjármagnskostnaður vegna 60 milljóna verðtryggðs láns er kr.237 þúsund á mánuði. Fyrir leigufélögin er greiðslubyrðin umsemjanleg og því örugglega lægri. Þannig að ekki aðeins eru leigjendur látnir kaupa þær íbúðir sem þeir leigja heldur tekur leigusalinn allt tryggingaféð og bætir í sína eigin veltu. Síðan í fyllingu tímans er þessum félögum slitið. Leigjendum hent út á klakann en félagið á allar sínar eignir skuldlausar, þökk sé okurleigukjörum og geta selt þær með svimandi hagnaði sem er ekki einu sinni skattlagður sem mismunur á kaupverði og söluverði.

Fyrst leigufélög komast upp með svona viðskiptamódel, afhverju er þá ekki hægt að hjálpa leigjendum til að kaupa í stað þess að leigja? Meirihluti leigjenda mundi vel ráða við að kaupa ef þeir fengju 100% lán. Nú þegar framboð á húsnæði er að vaxa má stýra svoleiðis 100% lánum þannig að markaðurinn fari ekki kollhnís.

Aðalatriðið er að útrýma þessum svokölluðu óhagnaðardrifnu leigufélögum af markaði.  Mér er alveg sama hverjir eiga þau.  Þau byggja öll á sama viðskiptamódelinu. 0 eigið fé og leigutekjur látnar borga allan kostnað og ábatinn felst í eignamyndun en ekki útborguðum arði.

Fast leiguverð í sjö ár

Fjölmiðlafrumvarpið strax farið að hafa áhrif

Lilja Alfreðsdóttir er með slungnari stjórnmálamönnum á Íslandi í dag. Eldklár og fljót að átta sig á stöðum og hvernig eins dauði verður hennar brauð. Og áróðurstæknin er slík snilld að Alþingi spilar allt upp í hendurnar á henni.

Tökum sem dæmi fjölmiðlafrumvarpið sem hún kom í umræðu áður en hún bar það upp í ríkisstjórn og þegar fjárlögin er skoðuð þá er hún líka búin að tryggja fjármagn til að standa straum af frumvarpi sem ekki er orðið að lögum, sem ekki hefur hlotið samþykki í ríkisstjórn og ekki hefur verið rætt á þingi. 

Og það virðast allir fjölmiðlar keppast við að uppfylla skilyrði Lilju til að fá endurgreiðslu frá ríkinu.  Meira að segja Kjarninn, sem hefur örugglega álitið eigin fréttaritstjórn af öðru kaliberi en slúðurblaðanna, er farinn að búa til fréttir með því að kópíera fésbókarfærslur þeirra, sem þeir flokka sem áhrifavalda.  þannig er nú hægt að lesa á Kjarninn.is hvað Þorsteini Víglundssyni fannst um mótmæli hælisleytenda á Austurvelli og það án þess að ómaka Þorstein með símtali. Magnús endurbirti bara statusinn hans Þorsteins og uppfyllti þannig kvótaskilyrðið um að 40% af fréttum skuli koma frá ritstjórn.

Vel gert Magnús. Það má alveg slá af prinsippunum þegar 30 milljónir eru í húfi

 

Vinnulöggjöfin er stórlega gölluð

Eins og mál hafa fengið að þróast á vinnumarkaði og þá sérstaklega í sambandi við kjararviðræður og samninga, þá er augljóst að eitthvað mikið er að.  Ég held að þetta þurfi ekki að vera svona flókið.  Hægt væri að setja í lög að:

1. Alltaf séu í gangi kjaraviðræður
2. Þegar samningar renni út verði sjálfkrafa búið að semja um breytingar.
3. Þegar samningar stranda geta aðilar strax gripið til aðgerða (ath. enginn skilyrði um sáttaferli)
4. Ef enginn sátt næzt innan hálfs mánaðar frá því að samningar renna út, þá skulu deilur settar í Gerðardóm og hans úrskurður þannig jafngilda samkomulagi sem ekki yrði borið yrði undir aðila til samþykktar eða synjunar.

Með svona fyrirkomulagi gætu samningar aldrei verið lausir lengur en 30 daga.  Og verkföll gætu aldrei staðið lengur en 14 daga.

Kúnst að reka smiðshögg á verkið

Dómsríkið er í nánd

Nú takast á, tvíklofin dómarastétt og margklofin stjórnmálastétt, útaf dómi Mannréttindadómstólsins í Strassburg.  Hinir pólitískt skipuðu dómarar Sjálfstæðisflokksins skipa sér undir merki síns flokks og túlka dóminn útfrá pólitík og einnig virðist afstaða þeirra til áfrýjunar vera pólitísk.  Þetta er óþolandi og rýrir traust á þessum dómurum.

Hinn hópur dómaranna, sem ekki eru brennimerktir af flokkspólitík vilja hins vegar ráða því hverjir eru skipaðir dómarar og fái þannig inngöngu í Frímúrarafélag Dómara.

Þess vegna er það ekki dómur MDE, sem er að valda hér réttaróvissu heldur er það óeining innan dómarastéttarinnar fyrst og fremst. Meirihluti dómara við öll 3 dómsstigin vilja nota þennan dóm, til að fá sjálfdæmi um hverjir verði dómarar.  Sjálfstæðisflokkurinn og Framsóknarflokkarnir 3, leggjast gegn því og vilja ekki breyta 3. kafla Dómstólalaganna, sem kveður á um skipan dómara.

Um þessi ágreiningsmál þarf nú konan með langa nafnið að úrskurða.

1. Ef hún ákveður að áfrýja dóminum til yfirdeildar og breytir ekki dómstólalögunum þá verður til réttaróvissa því Vilhjálmur H. bíður með 9 önnur samskonar mál ,sem hann hefur hótað að senda til MDE 
2. Ef hún ákveður að áfrýja ekki, en hunza dóminn að öðru leyti þá verður líka til réttaróvissa
3. Ef hún áfrýjar ekki og fer að tilmælum meirihluta Dómstólasýslunnar þá  verður Davíð Oddsson súr fyrir hönd frænku

Þess vegna mun hún vonandi leggja til nauðsynlegar breytingar á lögunum um skipanir dómara með það fyrir augum að skipanir allra núverandi dómara verði ógildar og ferlið endurtekið samkvæmt lögum.  Það má alveg hugsa sér að ráðherra geti haft eitthvað um reglur hæfisnefndar um skipun dómara að segja, en krafan verði samt sú, að hæfnisnefndin verði að samþykkja einróma skipan dómara.  

Með slíkri skipan höfum við færst skrefi nær dómsríkinu en það er bara hið bezta mál. Dómsríkið kemst næzt Guðsríkinu og enginn hefur lykil að því nema kannski Davíð Þór Jónsson sem virðist hafa endurfæðst í guðhræddan vínanda.

Hervör lagðist gegn bókuninni

Landsnet borðar virkjanafíl

Snæbjörn Guðmundsson jarðfræðingur hefur nýlokið við að skrifa þriggja greina flokk í Kjarnann, til varnar Drangajökulsvíðernum, sem HS Orka vill gleypa í einum munnbita og spíta útúr sér í smábitum, til að þeir gangi betur í grunlausan almenning. Satt að segja færir hann svo sterk rök fyrir því, að ekki skuli ráðist í neinar þær framkvæmdir, sem raska kunna svæðinu, að ég hélt að það væri borðleggjandi fyrir umhverfisráðherra, að friðlýsa allt þetta svæði með einu pennastriki. Frumkvæði er allt sem þarf.  Rökin liggja fyrir og hægt að birta allar 3 greinar Snæbjörns, sem greinagerð með slíku frumvarpi.

Sjáið bara hve forspár hann er um þátt Landsnets í plottinu. Snæbjörn skrifar í 3. grein sinni, sem hann kallar "Iðnaðarsvæðið á Ófeigsfjarðarheiði"

Að borða virkj­anafíl

Hvert var fram­lag ráð­gjafa HS Orku til þess að almenn­ingur mætti skilja betur þessa heild­ar­mynd af fram­tíð­ar­iðn­að­ar­svæð­inu uppi á Ófeigs­fjarð­ar­heiði? Svarið er: Nákvæm­lega ekk­ert. Ráð­gjaf­inn gerir í raun enga til­raun til að meta áhrif sem yrðu á víð­ernin af Aust­ur­gils­virkjun og Skúfna­vatna­virkj­un, þótt hann þekki vel til þeirra og eigi lögum sam­kvæmt að sýna áhrif tengdra fram­kvæmda.

Kannski mun ein­hver segja að þessar virkj­anir séu í raun ótengd­ar. Það ætti þó að vera auð­sætt hverjum sem horfir á kortin hér að ofan að þær eru það ekki, þó ekki sé nema vegna þess að þær eru allar á sama land­svæð­inu, innan hinna miklu Dranga­jök­ul­svíð­erna. Þar að auki tengj­ast þær allar í gegnum hönn­un­ar­að­il­ann, því ráð­gjafi HS Orku hefur komið að hönnun eða und­ir­bún­ingi allra þriggja, auk þess sem HS Orka er aðal­eig­andi bæði Hvalár- og Skúfna­vatna­virkj­ana­hug­mynd­anna. Að lokum myndu allar þessar virkj­anir tengj­ast á sama stað við raf­orku­flutn­ings­kerfi Lands­nets, vænt­an­lega í nýjum tengi­punkti á Langa­dals­strönd innst í Ísa­fjarð­ar­djúpi. Ráð­gjaf­inn lagði vissu­lega fram teikn­ingu af hugs­an­legri raf­línu­teng­ingu Hval­ár­virkj­unar einnar og sér og (rangri) skerð­ingu víð­erna af henni.

Um leið er alveg skýrt að Aust­ur­gils­virkjun og Skúfna­vatna­virkjun eru taldar alger for­senda teng­ingar Hval­ár­virkj­un­ar­hug­mynd­ar­innar eins og hún er nú. Nú standa meira að segja vonir virkj­ana­að­ila bein­línis til þess að í næstu viku muni stjórn­völd loks­ins bæn­heyra þá end­an­lega og láta Lands­net gefa sér þennan tengi­punkt. Hvað hefur þurft að smyrja, ef það verður svo?

Virkj­ana­hug­mynd­irnar eru því nátengdar að öllu leyti og jafn­vel þótt þetta væru þrír algjör­lega óskyldir aðilar sem hver hygði á sína virkjun óháð öðrum er engin leið fram hjá því að meta þyrfti virkj­an­irnar saman til að sýna heild­ar­á­hrif­in. Á því virð­ist eng­inn taka ábyrgð. Það er allt of auð­velt að klippa þetta í sundur og stjórn­kerfið megnar ekki að halda uppi kröfu um heild­ar­mat áhrifa allra virkj­an­anna ásamt teng­ing­um.

Kort 3

Ef allar virkj­ana­hug­myndir á Ófeigs­fjarð­ar­heiði eru teknar saman eru þær farnar að minna óþyrmi­lega á stór­karla­leg­ustu virkj­ana­hug­myndir Lands­virkj­unar á mið­há­lend­inu, eins og til dæmis í Þjórs­ár­verum og á Skaga­fjarð­ar­há­lend­inu. Grein­ar­höf­undur tók saman helstu hönn­un­ar­gögn sem liggja fyrir tengt virkj­un­unum þremur á einu korti, sem sýnir þá svart á hvítu iðn­að­ar­svæði fram­tíð­ar­innar uppi á Ófeigs­fjarð­ar­heiði.

Hver er þá besta leiðin til að breyta ósnortnum heiða­víð­ernum í risa­stórt orku­iðn­að­ar­svæði? Jú, þú byrjar á að fá sam­þykki í heima­byggð fyrir „smá­veg­ar­spotta“ upp á heiði til að „klára örlitlar rann­sókn­ir“ fyrir „alls ekki svo stóru virkj­un­ina“ sem mun í raun hafa „ósköp lítil áhrif“. Bút­aðu niður eins og þú getur og komdu litlu bút­unum í gegn án þess að tengja hlut­ina saman eða setja í sam­hengi. Þetta lítur ekki svo illa út í byrj­un. Svo held­urðu ein­fald­lega áfram að potast þar til búið er að reisa þrjár virkj­anir með stífl­um, skurð­um, virkj­ana­veg­um, raf­línum og öllu öðru til­heyr­andi. Útkoman er full­kom­lega end­an­leg eyði­legg­ing meira en helm­ings einna merk­ustu og mik­il­væg­ustu víð­erna Íslands, jafn­vel Evr­ópu. Það virð­ist nefni­lega ekk­ert svo flókið mál að láta almenn­ing, sem hefur lítil sem engin tök á að graf­ast fyrir um end­an­lega útkomu svona verk­efna, borða fíl­inn – einn bita í einu, þar til setið er uppi með risa­stórt orku­iðn­að­ar­svæði á Ófeigs­fjarð­ar­heiði.
-----------------------------------------------------------------------------------

Ég biðst forláts að birta þennan hluta greinar Snæbjörns án leyfis, en tilefnið kom í fangið á mér þegar ég sá þessa frétt.  Og mér fannst greinarnar eiga erindi við alla!  En eins skrítið og það er, þá ríkir hér algert sinnuleysi um þetta mál. Það er eins og þeir, sem vilja vernda víðernin séu teiknaðir upp sem óvinir Vestfjarða.  Ég frábið mér slíkar ávirðingar.  Ég hef sterkar taugar til þessa landshluta eftir að hafa aflað mér þar menntunar og búið þar og starfað í 15 ár af ævi minni.  Svo ekki segja mér, að virkjun í þágu HS. Orku, sé virkjun í þágu Vestfirðinga. Og þar sem ég þekkti vel föður drengjanna sem eiga Vesturverk og bera ábyrgð á þessu öllu saman, þá fullyrði ég að hann hefði líka beitt sér gegn þessum hugmyndum og blekkingum stóriðjusinna, sem illu heilli fengu að kaupa HS Orku á sínum tíma. Það var eitt af óheillaverkum Steingríms J. sem vinstri menn bera einir ábyrgð á.

Tenging um Ísafjarðardjúp hefði mest áhrif