Jóhönnuraunir

Þótt fólkið hér sé löngu leitt
á lyginni um erlent fé
er lausnarorðið aðeins eitt
umsóknin að ESB

Undir erlend yfirráð
okkur vill hún fela
Svo að ríkum gefist ráð-
rúm hér öllu að stela

Þrautagangan þyrnum stráð
þrællinn illa barinn
Nú Jóhanna er hædd og smáð
hennar tími er farinn

Áfram fetar eyðislóð
undir breima kattakór
Kella orðin ellimóð
að elta það sem kom og fór.

 

Las Jóhanna bloggið mitt?

 Um daginn bloggaði ég um Árna Pál og hneykslaðist á veru hans í Samfylkingunni og nú stendur til að reka hann úr ríkisstjórninni. Í fyrradag bloggaði ég svo um Lárus Welding, og daginn eftir var hann handtekinn. Nú er ég að hugsa um að bjóða mönnum að kaupa sig undan umfjöllun.  Ef einhver vill borga mér 300 milljónir fyrir að hætta að blogga þá stendur ekki á mér

Árni Páll sagður vera á útleið

GMS

Í íslenskunni ekki slyngur
og órótt geðið sönnun þess,
að æruskertur auðkýfingur
er að senda SMS

Lárus tekur skellinn fyrir Jón Ásgeir

Engu er líkara en nokkur forspá hafi falist í síðasta pistli. Þar minnti ég á að Lárusi Welding var mútað til að taka við bankastjórastöðu í Glitni af Bjarna Ármannssyni.     Tölvupóstar frá skuggastjórnanda bankans á þeim tíma, Jóni Ásgeiri Jóhannessyni,  sanna þetta svo ekki verður um villst.  Þess vegna er ekki seinna vænna hjá saksóknaranum, Ólafi Haukssyni að ráðast til atlögu gegn þeim glæpafélögum sem tæmdu Glitni innanfrá með dyggri aðstoð stjórnenda bankans, allt þar til hann féll fyrstur banka og olli þar með domino áhrifum á allt íslenska fjármálakerfið.  En til hvers að hneppa Lárus og 2 undirmenn í varðhald núna 3 árum eftir að meintir glæpir voru fullframdir?  Heldur saksóknari að Lárus og félagar, muni brotna saman og játa glæpi sína við yfirheyrslur núna? Þetta virkar óneitanlega sem sjónarspil af hálfu saksóknara,  líkt og leikritið sem sett var upp fyrir almenning í tengslum við yfirheyrslurnar yfir Kaupþings stjórunum í fyrra. Hvar eru ákærurnar gegn þeim?  

  Óhætt er að segja að allur þorri almennings er orðinn langeygur að bíða eftir ákærum gegn öllum helstu stjórnendum bankanna, og annarra fjármálafyrirtækja, sem fóru í þrot við fall fjármálakerfisins. Því það eru fleiri en Lárus Welding og Sigurður Einarsson og Landsbanka glæponarnir sem eiga að vera í fangelsi. Yfirmenn Byrs, Sjóvár og Sparisjóðs Keflavíkur eiga ekki að sleppa.  Starfsemi þessara fyrirtækja var ekki samkvæmt lögum og það á að ákæra samkvæmt ýtrustu heimildum í lögum.  Bæði til að senda skýr skilaboð og líka til að hreinsa andrúmið í þjóðfélaginu sem orðið er ansi þrúgandi svo ekki sé meira sagt. Eftir því sem fleiri verða ákærðir, þeim mun meiri líkur eru á, að vitorðsmennirnir verði dregnir fram í dagsljósið.  Vitorðsmennirnir sem nú halda sig vera í öruggu skjóli vegna óskiljanlegra tafa og slugsháttar í rannsóknum sérstaks saksóknara og fjármálaeftirlitsins.  

300 milljóna mútugreiðslur

1. Jón Asgeir reyndi að múta Davíð með 300 milljónum!
2. Lárus Welding var keyptur fyrir 300 milljónir!
3. Matís stendur til boða 300 milljóna mútustyrkur frá ESB                                                                                              

 

Árni Páll er verkfæri

 Uppgangur Árna Páls, innan Samfylkingarinnar er dálítið merkilegur miðað við  lífssýn hans og málatilbúnað allan.  Ég myndi halda að hann ætti frekar heima innan Sjálfstæðisflokks en Samfylkingar.  En það á reyndar við um fleiri þingmenn Samfylkingar eins og Magnús Orra og Sigmund Erni.  En Árni Páll sker sig úr vegna þess að hann er áhrifamaður.  Hann er ráðherra og framtíðarleiðtogi að sumra mati.  Þess vegna verður að vera samhljómur milli gerða hans og stefnu flokksins.  Svo er ekki eins og allir vita.  Þess vegna riðar ríkisstjórnin til falls.  Hún setti verkfæri bankamafíunnar yfir skuldavanda heimilanna og þess geldur hún nú í fylgistapi, utan jafnt sem innan þings

Skattpíningin

Á þriðja ári eftir hrun örlar ekki á tillögum um að draga báknið saman. Ennþá eiga íslenskir skattgreiðendur að bera kostnaðinn af óráðsíunni í rekstri ríkisins. Hér má taka til hendi og verður að taka til hendi.  Það þarf ekki að hækka skatta eða breikka skattstofna. Það þarf að skera niður útgjöld! Við höfum ekki efni á gæluverkefnum stjórnmálanna eða sporslum til einkavina. Kerfið ræður við að þjónusta milljón manna þjóðfélag og það verður að skera niður. Og á meðan við erum að ná okkur upp úr mesta skuldafeninu þá verður að skera niður allan óþarfa í fjárlögum.  Það hefur ekki verið gert.

 

1. Til hvers eiga stjórnmálaflokkar að vera á fjárlögum?  
2. Til hvers eiga bændasamtökin að vera á fjárlögum?
3. Til hvers á kirkjan að vera á fjárlögum?
4. Til hvers á RÚV að vera á fjárlögum?
5. Til hvers að eyða milljörðum í utanríkishítina?
6. Til hvers að vera með alltof stórt fjármálakerfi?
7. Af hverju ekki að þjóðnýta olíufélögin, bankana og tryggingafélögin?
8. Af hverju ekki að innheimta réttlátan skatt af útgerð og álverum?
9. Af hverju ekki að draga úr miðstýringu og efla landshlutana?
10. Af hverju ekki að birta bókhald ríkisins og stofnana þess á netinu?

 

Hætt við hækkun kolefnisgjalds

Forsetaembættið er orðið pólitískt

Ég held að enginn geti neitað því að framganga Ólafs Ragnars í embætti forseta Íslands, hefur mótað þetta embætti til framtíðar.  Hér eftir munu allir spyrja væntanlega frambjóðendur um afstöðu þeirra til pólitískra afskipta forsetaembættisins. Við munum svo taka afstöðu , sem byggir á mati á hvaða frambjóðandi muni best fylla út í ímynd Ólafs Ragnars.  Þetta er sá veruleiki sem blasir við. Hvort sem okkur líkar betur eða verr og þrátt fyrir álitshnekki stjórnmálanna þá verður næsti forseti valinn af flokkunum en ekki almenningi.  Enda hafa spunamenn Samfylkingar hafist handa við leitina að eftirmanni Ólafs.  Því tilhugsunin um 4 ár í viðbót með Ólaf sem forseta hugnast þeim ekki. Hann er hinn stóri fleinn sem þau trúa að muni koma í veg fyrir inngöngu Íslands í ESB.  Næsti forseti verður að vera hlynntur ESB aðild og þess vegna hefur nafn Salvarar Nordal verið nefnt.  En dugir það til?  Er ekki líklegra miðað við stemninguna að sá frambjóðandi sem er andvígur aðild að ESB verði kosinn?  Þrátt fyrir að vera kannski sá verðleikaminnsti.  En svona er pólitíkin.  Þeir komast lengst sem hafa minnstu verðleikana!

Ólafur Ragnar dyrfðist að velta upp breyttu hlutverki forsetaembættisins í tillögum Stjórnlagaráðs og það varð allt vitlaust á þingi og menn gengu út undir ræðu hans.  Síðan birtust harðorðar yfirlýsingar frá þessum sömu mönnum vegna ræðunnar, sem þeir hlustuðu ekki á!  Við þurfum samt að taka þessa umræðu núna og það var auðvitað rétt hjá Ólafi að benda þingmönnum á nauðsyn þess að taka stjórnarskrárdrögin til umræðu og afgreiðslu fyrir vorið. Núna verða kannski Alþingiskosningar strax eftir áramót og öll þessi stóru mál órædd og óafgreidd.  það er ekki nógu gott

Úlfur Úlfur

Hæstvirtur forsætisráðherra er í vanda. Hún stýrir ríkisstjórn þar sem hver ráðherra fer sínu fram án samráðs við aðra. Þrátt fyrir fyrirheit um gagnsæi og opið samráðsferli hefur leyndin og baktjaldamakkið  aldrei verið meira hjá neinni ríkisstjórn og fer sjálfur forsætisráðherrann þar fremstur í flokki. Þess vegna þýðir ekki fyrir Jóhönnu Sigurðardóttur að kvarta undan agaleysi í ríkisstjórninni núna. Hún er verkstjórinn.  Annað hvort losar hún sig við Jón Bjarnason eða segir af sér og boðar til kosninga. Hún getur ekki núna eftir það sem á undan er gengið í sambandi við ákvörðun Ögmundar Jónassonar,  leyft Jóni Bjarnasyni að komast upp með að ganga þvert gegn stjórnarsáttmálanum og loforðum beggja stjórnarflokkanna í kosningabaráttunni um uppstokkun á kvótakerfinu. Hún á að sýna LÍÚ hver er húsbóndi á stjórnarheimilinu og leggja sjálf fram nýtt fiskveiðistjórnarfrumvarp sem fari í þjóðaratkvæði að lokinni þinglegri meðferð.  Jón Bjarnason fékk sitt tækifæri og klúðraði því.  Vonandi klúðrar Jóhanna ekki tækifærinu til að losa sig við villugjarnan meðreiðarmann og leiðrétta kúrsinn. 

Þetta er ekki stjórnarfrumvarp

Þarf frekar vitnanna við?

Um innihaldsleysi bloggumræðunnar eða öllu heldur
heimsku og veruleikafirringu þeirra sem hanga á
netmiðlum daginn út og inn. Þegar Eiríkur Jónsson
er í 10. sæti yfir mest lesnu bloggarana en
Þorvaldur Gylfason í 25. sæti!