Verkalýðurinn að vakna

Í kjölfar vel heppnaðra hallarbyltinga í VR og Eflingu hafa málefni verkalýðs og sjómanna loks komist á dagskrá. Ég hélt satt að segja að sjómönnum væri ekki viðbjargandi og kenndi þar um hinni undirliggjandi atvinnukúgun, sem útgerðarauðvaldið beitir sjómenn sína.  En upp er risinn spámaður sem boðar breytingu á áratuga kúgun sjómannastéttarinnar. Því fagna ég og ekki skemmir það fyrir henni að þurfa í leiðinni að velta spilltri stjórn Sjómannafélags Íslands úr sessi. Mafían í kringum Jónas Garðarsson hefur allt of lengi farið með það félag eins og sitt eigið prívat einkahlutafélag. Menn hljóta að muna hvernig Birgir Björgvinsson tók tímabundið við formennsku á meðan glæpamaðurinn Jónas Garðarsson sat af sér dóminn vegna manndrápanna á skemmtibátnum. Man ekki til þess að félagsmenn hafi fengið neitt um það að segja.

Þess vegna fagna ég framboði ungu konunnar og treysti því að fjárreiður félagsins verði rannsakaðar til hlítar því þessi kennitölubreyting sem fyrirhuguð var með sameiningu við 4 önnur félög lyktar eins og eitthvað hafi þurft að fela í rekstri félagsins. Þetta hringl með fundargerðir og lög félagsins varða við hegningarlög því þetta er ekkert annað en skjalafals. Og ef stjórnin hefur eitthvað að fela þá mun það komast upp.

Áfram sjómenn!

„Algjörlega óboðleg vinnubrögð“

Mogginn kaupir valda ársreikninga

Þótt ég sé almennt sammála um að ársreikningar allra félaga eigi fullt erindi til almennings þá er líka hægt að misnota slíkar upplýsingar eins og hér er reynt að gera.  Það er nefnilega ekki verið að upplýsa almenning um félagið Nýjan kafla ehf. heldur er verið að kasta rýrð á Sólveigu Önnu Jónsdóttur formann Eflingar og hún sökuð um blekkingar gagnvart stjórn stéttarfélagsins! Svona lævísi virkar áreiðanlega á flesta sem lesa "fréttina" en fyrir okkur hin er þetta bara enn einn naglinn sem verið er að reka í líkkistu Gunnars Smára! Gunnar Smári er persona non grata í Valhöll og hann á að taka niður hvað sem það kostar. Sólveig Anna er svo sögð viljalaust verkfæri hins djöfullega plots Gunnars Smára, sem beinist að hinum ríku og voldugu.  

Þegar Sólveig Anna bauð sig fram gegn þaulsetunum í Eflingu var við ramman reip að draga.  Kosningarnar sýndu svo hversu grasrótin var illa upplýst um stöðu sína og réttindi og því var augljóst að það þurfti eitthvað róttækt að gera til að vekja áhuga félagsmanna, almennings og fjölmiðla á stöðu hinna lægst launuðu í landinu sem vill svo til að eru flestir í Eflingu. Þess vegna var ráðist í þetta átaksverkefni, "Fólkið í Eflingu" og ákveðið að kosta til þess 4 milljónum króna!  Ekkert bendir til að sá kostnaður hafi farið fram út áætlun. Að blanda Gunnari Smára inn í þetta mál lýsir bara lúalegum hugsunarhætti spunameistara sem trúa því að aldrei sé neitt sem sýnist.

En sjálfstæðisflokkurinn þekkir spuna.  Hann er meira að segja með heilu fyrirtækin í vinnu við að spinna upp alls konar blekkingar til að rugla fólk í ríminu. Hvernig væri að upplýsa almenning um hvað það kostar flokkinn? Sannfærður er ég um að þær upphæðir skipta tugum milljón en ekki bara 4 milljónir!

Fyrir valdaflokk skipta völd öllu máli. Völdin hafa engan verðmiða. Það er ekki spurt hvað hlutirnir kosta það er spurt hvort völdin séu í hættu.  Út á það gengur hernaðurinn gegn Gunnari Smára.

Gunnar Smári í forsvari

Óábyrg játning!

Hrólfur Jónsson hefur stigið fram og viðurkennt að bera einn ábyrgð á heimildarlausum fjárútlátum fyrir 120 milljónir í sambandi við braggaframkvæmdir. Ekki nokkur maður trúir því.

Alltof margir vissu um framúrkeyrsluna og ómögulegt annað en borgarstjóri hafi verið upplýstur um framvinduna. Fjármálahópurinn vissi allt um málið. Eiga þeir þá ekki líka að axla ábyrgð? Hrólfur Jónsson þótti greinilega góður starfsmaður. Þessa umsögn er enn að finna á vef Reykjavíkurborgar,

"Hrólfur Jónsson skrifstofustjóri skrifstofu eigna og atvinnuþróunar

Hrólfur er menntaður byggingatæknifræðingur með rekstur sem valgrein. Hann hefur einnig stundað nám í brunaverkfræði og fyrir tveimur árum lagði hann stund á nám við opna háskólann í Danmörku (DTU) þar sem hann las m.a. um gerð ársreikninga, áætlanagerð, fjárfestingar og breytingastjórnun.

Hrólfur hefur verið stjórnandi hjá  Reykjavíkurborg í nær þrjá áratugi, fyrst sem varaslökkviliðsstjóri og slökkviliðsstjóri en frá árinu 2004 hefur hann gegnt starfi sviðsstjóra framkvæmda- og eignasviðs. Hann hefur gegnum tíðina leitt fjölbreytt stefnumótunar- og breytingaverkefni, þ.á.m. víðtækar breytingar á framkvæmdasviði. Hann hefur því yfirgripsmikla þekkingu á  breytingaferlum, opinberri stjórnsýslu, fjármálum og áætlanagerð.

Hrólfur þykir kraftmikill, kappsamur og úrræðagóður. Hann leitar stöðugt nýrra tækifæra og sýnir frumkvæði. Hann þykir líklegur til að verða öflugur og framsýnn leiðtogi nýrrar skrifstofu eigna og atvinnuþróunar."

Til hvers er þessi maður að stíga fram áður en innri endurskoðun hefur lokið úttekt?  Hvaða baktjaldaplott er í gangi?

„Mistök sem ég tek á mig“

Dulin tengsl við S-hópinn.

Þarna er á ferðinni sonur fyrrum bankastjóra Búnaðarbankans sem vildi lána S-hópnum peninga til að kaupa Búnaðarbankann. Fléttan varð þó öllu skrautlegri því úr varð að Sólon lánaði Bjöggunum en Halldór J. stjórinn í Landsbankanum lánaði S-hópnum. Þetta vitum við en við vitum ekki enn hvert milljarðarnir sem S-hópurinn fékk fóru og ekki var staðið við fullnaðargreiðslur fyrir Landsbankann.  Hvað þetta hefur með tengslin við hótelið í Ármúla að gera eru bara hugrenningatengsl mín því alls staðar er maður að sjá ný nöfn sem hafa auðgast óeðlilega á hruninu.  Sumir stálu úr þrotabúunum eins og fyrrverandi eigendur Skeljungs aðrir eru greinilega að leppa fyrir útrásardólgana eins og sá sem vill kaupa 4 búðir af Bónus armi Haga.

Hvernig stendur á því að sonur bankastjórans fyrrverandi telur sig ekki þurfa að fara eftir þeim reglum sem öðrum eru settar?  Hvers vegna er hann ekki beittur hörðu fyrst og honum skipað að stöðva framkvæmdir og hreinlega rífa það sem gert hefur verið? Hvernig getur byggingarfulltrúinn skrifað upp á að hönnunin sé í lagi og fylgt hafi verið ýtrustu fyrirmælum byggingareglugerðar fyrst engin leyfi voru gefin út. Ætlar byggingarfulltrúinn að bora göt í veggi eða taka röntgenmyndir til að tékka á járnabindingu?  Þetta er allt með ólíkindum og greinilegt að sumir eru jafnari en aðrir þegar kemur að framkvæmdum hjá borginni.

„Nú fer ég að kippa hlutunum í lag“

Borgarlögmaðurinn

Edda Schram var handvalin sem borgarlögmaður af Degi B. borgarstjóra þótt hæfari einstaklingur hefði sótt um. Sjálfstæðismaðurinn í Innkauparáði hefur kvartað undan fálæti borgarlögmanns.Er skýringin pólitísk eða fagleg? Gott væri ef borgarlögmaður stigi fram og bæri af sér sakir.

Félagsbústaðir

Ég hef aldrei skilið þetta concept "Félagsbústaðir"  Þarna er þjónustu sem fellur undir velferðarsvið komið fyrir í sjálfstæðu félagi sem á að vera sjálfbært rekstrarlega og í armslengd frá afskiptum kjörinna fulltrúa.

Það getur vel verið réttlætanlegt að hafa þetta rekstrarform en það á tvímælalaust að skilgreina starfsemina sem velferðarþjónustu sem á ekki að standa undir sjálfri sér heldur njóta styrks úr sameiginlegum sjóði borgarbúa eftir því sem þörf krefur.  Þannig á að setja þak á leigu sem hlutfall af ráðstöfunartekjum leigjenda en á sama tíma verður má ekki slá af kröfum sem leigusölum ber að fullnægja varðandi viðhald og eftirlit með leigðu húsnæði.

Aðkoma samtaka leigjenda að stjórn félagsins er rugl. Leigjendur þurfa bara að þekkja rétt sinn og skyldur og vita hvert á að leita með kvartanir. Ef leigjendur beindu til dæmis kvörtunum varðandi myglu og raka til heilbrigðisnefndar þá myndu örugglega flest mál leysast farsællega.

Varðandi Írabakkamálið þá vil ég vita meira um þær skemmdir sem verið var að lagfæra áður en ég tek undir kommentakórinn. Breiðholtið var byggt með hraði og í blokkirnar var notað gallað sement. Þar fyrir utan eru þær allar komnar á tíma endingarlega sem kallar oftast á stórfellt og dýrt viðhald. Einangrun og klæðning er kostnaðarsöm en það verður líka að gæta aðhalds. Hygginn húseigandi ræður við slíkt en ekki víst að sama gildi þegar einhver verkfræðistofa er fengin til að gera tillögur.  Sérstaklega ekki ef ekkert kostnaðarmat liggur fyrir í upphafi.

Ég myndi til dæmis vilja vita hvað hefði kostað að rífa Írabakka blokkina í stað þess að gera við hana. Þarna liggur ábyrgð stjórnar félagsins fyrst og fremst. Að kalla eftir réttum upplýsingum og geta tekið upplýstar ákvarðanir í framhaldinu.  Heiða Björg er greinilega ekki rétti fulltrúinn til að sitja í þessari stjórn og taka fyrir það þóknun. Þangað á að velja fólk sem kann og getur.  Ekki bjána sem þykjast kunna og geta.

Léleg fjármálastjórn aðeins hluti vandans

Skoðið bara reikningana!

Hvernig skilgreina kjörnir fulltrúar ábyrgð sína? Er fjallað um vel skilgreinda ábyrgð í siðareglum og eru einhver viðurlög þegar þær reglur eru brotnar?  Um þetta ætti næsti borgarstjórnarfundur að fjalla en ekki karp um endurskoðun á augljósum axarsköftum og klúðri sem meirihluti borgarstjórnar ber einn ábyrgð á.  Eru menn að vona að endurskoðun muni leiða eitthvað annað í ljós en þeir vita nú þegar?  Og ef borgarfulltrúar vita ekki hvað fór úrskeiðis þá eru þeir ekki að vinna vinnuna sína!  það er bara svo einfalt. Þið eruð með reikningana. Skoðið þá!

Og ástæðan fyrir því að menn sumir eru ekki að vinna vinnuna sína er sú hefð sem skapast hefur með meirihlutamyndunum sem ganga þvert á lýræðislegt val fulltrúa. Meirihluti sem oftar en ekki veltur á einum fulltrúa er ekki það sem fólk vill. Fólkið, kjósendurnir eru að kjósa til þess að sínir menn hafi áhrif. Þar af leiðir á að breyta lögunum og afnema formlegt meirihlutaræði í sveitafélögum þar sem fleiri en einn listi er borinn fram. Það er lýðræðslegra að allir fulltrúar beri jafna ábyrgð og hafi jafna aðkomu að öllum málum. Sá meirihluti sem þannig myndast er hinn eini rétti.  En það þarf líka að setja reglur um að kjörnir fulltrúar geti ekki jafnframt orðið borgar- eða bæjarstjórar. Kjörnir fulltrúar eiga að sinna stefnumótun og eftirliti en ekki sinna rekstri eins og nú er gert. Og það þarf að minnka þessa yfirstjórn sem engu skilar nema auknum kostnaði og minni ábyrgð.

En fyrst og síðast komið ykkurr saman um siðareglur og ákveðið hvers konar brot leiði sjálfkrafa til afsagnar. Ekki meiri sandkassaleik og fliss!

Segja innri endurskoðun störfum hlaðna

Fyrstu skóflustungur kostuðu okkur 152.910.00

18 glænýjar stunguskóflur voru vígðar í dag. Ekki er annað að sjá en allir hafi verið glaðir með nýju skóflurnar sem keyptar voru í Byko fyrir þetta tilefni. Sýndist þetta vera Fiskars skóflur af dýrustu gerð sem kosta núna 8.495 krónur í vefversluninni. En hverjir ætli hafi hirt þessa leikmuni þegar slökkt var á tökuvélunum?  Ætli ráðamennirnir okkar hafi bara tekið þær með heim í stað þess að afhenda þær Ríkiskaupum?  Ég bíð spenntur eftir að sjá 18 nýjar skóflur auglýstar til sölu á bilauppbod.is  á næstu dögum.  Nema náttúrulega að það sé búið að stela þeim og koma til ættingja og vina...

Varðandi þessar fáránlegu byggingarframkvæmdir ofan í fárveiku fólki þá vona ég að allir þeir sem ábyrgð bera á þessari framkvæmd eigi eftir að leggjast inn á landspítalann á meðan á framkvæmdum stendur til að upplifa þá andlegu pyntingu, sem hávaðinn vegna framkvæmdanna veldur þeim, sem ekkert geta farið.  Að ég tali ekki um starfsfólkið.  Hversu margir munu hreinlega gefast upp og segja upp vegna hávaða og annarra óþæginda sem fyrirsjáanlegt er að verði af þessum framkvæmdum næstu 20 ár!  Því það er örugglega sá tími sem þetta á eftir að taka miðað við þá snillinga sem standa að framkvæmdunum í dag. Hvað ætli sé annars að frétta af sjúkrahótelinu? Þarf kannski að fara í viðgerðir á því áður en það er einu sinni tekið í notkun. Eða skanninn sem ÍE gaf?  Og svo vogaði ráðherrann að tala um tæknilegasta fullkomnast sjúkrahús í heimi spilandi á skófluna sína úr Byko eins og hún væri sjálfur Jimmy Page. Þvílíkir loddarar og auðnuleysingjar.

Tímamót í sögu Landspítala

Dagur var plataður

Það er mín niðurstaða eftir ytri endurskoðun á braggamálinu svonefnda, að Dagur B. Eggertsson hafi verið blekktur til að heimila endurbyggingar á húsarústunum við Reykjavíkurveg 100. Þau gögn sem ég byggi aðallega á er minnisblað sem unnið var fyrir skrifstofu eigna og atvinnuþróunar Reykjavíkurborgar og lagt var fyrir Borgarráð 17.september siðastliðinn auk víðtækrar fjölmiðlaumfjöllunar og yfirlýsinga einstakra aðila varðandi þetta mál.

Af gögnum málsins má ráða að hugmyndasmiður verkefnisins sé Margrét Leifsdóttir arkitekt og starfsmaður hjá Arkibúllunni. Hún hafi svo fengið Ara Jónsson rektor Háskólans í Reykjavík til að leggja verkefninu lið með vilyrði um að Háskólinn myndi engan kostnað bera af verkefninu en njóta umtalsverðs ávinnings í formi ókeypis afnota af nýuppgerðum húsakynnum í göngufæri við skólann á besta stað í Reykjavík! Þetta var upprunalega viðskiptamódelið.

 

Blekking númer 1.

En þau Margrét og Ari vissu sem var að fleira þyrfti til. Þá var gripið til blekkinga og reynt að fá Minjastofnun Íslands til liðs við verkefnið (sbr. bréf dags. 25.júlí 2015) Þótt Minjastofnun hafi bent á, að braggarústirnar féllu ekki undir lög um vernd menningarminja þá var hún samt óbeint orðin aðili að verkefninu eða vitorðsmaður sem vigt var í! 

Blekking númer 2.

Það er sennilega á þessum tímapunkti sem verkefnið er kynnt fyrir Degi borgarstjóra og hann blekktur til að gefa grænt ljós að undangenginni úttekt sem verkfræðistofan Efla vann og var í raun forsendan fyrir því að réttlætanlegt var talið að ráðast í verkefnið.

Blekking númer 3.

Þegar búið var að koma verkinu af stað og Margrét orðin umsjónarmaður og prókúruhafi þá er komið að Ara rektor. Hann fer þá til fundar við Dag borgarstjóra með tilbúinn húsaleigusamning til undirskriftar sem stórskaðar Reykjavíkurborg fjárhagslega en tryggir Háskólanum í Reykjavík stórkostlegan ávinning með því að mega framleigja nýuppgerða braggann til veitingareksturs fyrir tvöfalda þá upphæð sem Háskólinn er látinn borga fyrir allt húsnæðið. Reykjavíkurborg er meira að segja látin bera kostnað af öryggiskerfum Securitas fyrir á aðra milljón og kaupa einhver listaverk til skreytinga af Berlinord fyrir 956.619 krónur

Niðurstaða

Hvað sem líður digurbarkalegum ummælum forseta borgarráðs og fulltrúa Pírata í borgarstjórn, að ekki verði heimilaðar meiri fjárveitingar til verksins þá eru það marklaus orð. Húsaleigusamningurinn um hina leigðu eign bindur hendur borgarfulltrúa og ef Dagur B. stígur ekki fram og viðurkennir, að hann hafi verið blekktur,þá mun þetta mál sennilega leiða til falls núverandi meirihluta. Annað er óhugsandi. 

 

Heimildir: bréf 2 minnisblað skrifstofu eigna og atvinnuþróunar

Dagur farinn í veikindaleyfi

Hvað kostar 1 stk oddviti?

Minni á að Sigurði Inga fannst ekkert mál að nýta forkaupsrétt ríkisins á jörðinni Felli í Suðursveit fyrir rúman einn og hálfan milljarð! Fyrir sömu upphæð mætti kaupa upp öll vatnsréttindi á Vestfjörðum og samt yrði afgangur til að friðþægja oddvitann í Djúpuvík.

Vill kostamat á virkjun og verndun